КИЕЛІ РУХҚА КЕНЕЛУ

One 2 One

КИЕЛІ РУХҚА КЕНЕЛУ

ЖАҢА ӨМІР

Петiр оларға былай деп жауап бердi: — Әркiм күнәсының кешiрiлуi үшiн терiс жолдан қайтып, шомылдыру рәсiмiнен өтсiн! Сонда сендер Құдайдың сыйын — Оның Киелi Рухын қабылдайсыңдар. Оның сөзiн қабылдағандар шомылдыру рәсiмiнен өттi. Осылайша бұл күнi қауымға үш мыңдай адам қосылды (Елш. 2:38,41).

Халық Петірдің уағызын тыңдағаннан кейін, енді не істеу керектігін сұрайды. Петір оларға үш нәрсені айтып, бұйырды: теріс жолдан қайту, шомылдыру рәсімінен өту және Киелі Рухты қабылдау. Олардың мыңдағаны оны тыңдап, сенушілердің қоғамына қосылды. Киелі жазбаға сәйкес, шомылдыру рәсімінен өткен әркім Исаға сенетін бауырластардың қатарына қосылуы тиіс. Киелі Рухты қабылдаған әркім өз қауымының іс-әрекетіне белсенді қатысуы қажет.

ШОМЫЛДЫРУ РӘСІМІ
Шомылдыру рәсімінен өту арқылы біз Иса Мәсіхтің біз үшін айқышта не істегенін жариялаймыз. Бұл біздің құтқарылғандығымызды білдірмейді, бұл біздің Ізгі хабарға сеніп, Құдайға бет бұрғаннан кейінгі сенім мен мойынсұнғанымыздың белгісі. Шомылдыру рәсімін дұрыс түсіну үшін Киелі кітап бізге оны бірнеше мысалмен сипаттап көрсетеді. Мысалға, жерлеу және қайта тірілу. Пауыл мәсіхшілердің шомылдыру рәсімін жерлеумен салыстырады. Алайда жерлеу үшін алдымен өлу қажет. Тура сол сияқты, шомылдыру рәсімінің алғы шарты - біз күнә үшін өлуіміз қажет. Біз күнә үшін өліп, жерленген соң, өлімнен жаңа өмірге қайта тірілеміз.

«Бұдан қандай қорытынды шығады? (Құдай күнәларымызды кешiретiндiктен) Оның рақымы молайсын деп күнә жасай берейiк пе?» Жоқ, олай iстеуге болмайды! Өлген адам күнә жасамайды? Бiз (сенушiлер) де сол өлген адамдай күнәға жоқ болдық. Қалайша бұдан былай күнә жасап өмiр сүрмекпiз?! Өздерiң жақсы бiлесiңдер: Иса Мәсiхпен тығыз байланысқан бәрiмiз Онымен бiрге рухани өлдiк. Шомылдыру рәсiмiнен өткенде соны бiлдiрдiк. Демек, Мәсiхпен тығыз байланысқан бiздер Онымен бiрге рухани «өлiп, жерлендiк». Сонымен, Құдай Әке Өзiнiң ұлы құдiретiнiң арқасында Мәсiхтi өлiмнен қайта тiрiлтiп, жаңа өмiр бергендей, бiз де ендi жаңаша өмiр сүруiмiз керек! (Рим. 6:1-4).

Шомылдыру рәсімі арқылы біз бұрынғы күнәһар өмірімізді артта қалдырып, Иса Мәсіхтің билігіне мойынсұнған жаңа өмірді бастаймыз.

КИЕЛІ РУХҚА КЕНЕЛУ
Киелі Рухты және Оның құдіретін қабылдамай, біз Исаға куә бола алмаймыз. Иса Киелі Рух келген кезде бізге бар шындықты жеткізетінін айтып, уәде етті.

7 Сендерге шындығын айтайын: Менiң кететiнiм сендер үшiн жақсы! Себебi Мен кетпесем, сендерге Қамқоршыларың (Құдайдың Рухы) келмейдi; ал Мен барған соң, Оны сендерге жiберемiн.

13 Алайда шындықты бiлдiретiн Құдайдың Рухы келгеннен кейiн сендердi бар шындыққа жеткiзедi. Себебi Ол Өзiнен шыққан сөздi емес, көктегi Әкемнен естiгенiн айтады және болашақта не болатынын сендерге хабарлайды
(Жох. 16:7, 13).

Киелі Рух біздің куәлігімізді маңызды етеді. Куәгер тек шындықты айтып ғана қоймай, сондай-ақ шындықпен өмір сүреді. Біз Исаның куәгері ретінде, Киелі Рух бізге өзіміз жасай алмайтын нәрселерге және Құдай туралы шындықты жариялауға, шындықпен өмір сүруге көмектеседі.

Бiрақ сендер Киелi Рух өздерiңе қонғанда Оның құдiретiн қабылдайсыңдар, сөйтiп Иерусалимде, бүкiл Яhудея мен Самария аймақтарында және жердiң шетiне дейiн Маған куә боласыңдар
(Елш. 1:8).

КИЕЛІ РУХҚА ҚАЛАЙ КЕНЕЛУГЕ БОЛАДЫ
Киелі Рухты қабылдау – Алғашқы өнім мейрамына қатысқандарға ғана емес, ол әр сенушіге уәде етілген Құдайдың сыйы. Петір уағызында біз Киелі Рухтың дарындарын қалай қабылдай алатынымызды айтты.

Петiр оларға былай деп жауап бердi: — Әркiм күнәсының кешiрiлуi үшiн терiс жолдан қайтып, шомылдыру рәсiмiнен өтсiн! Сонда сендер Құдайдың сыйын — Оның Киелi Рухын қабылдайсыңдар. Себебi бұл уәде сендерге, балаларыңа және Құдай Иемiз шақыратын алыстағылардың бәрiне арналған
(Елш. 2:38, 39).

Киелі Рухты қабылдау үшін біз оны тек сеніммен сұрауымыз қажет.

Сонымен өздерiң күнәкар бола тұра балаларыңа жақсылық жасауды бiлсеңдер, көктегi Әкенiң Өзiнен сұрағандарға Киелi Рухын сыйлайтыны ешбiр шүбәсыз! (Лұқа 11:13).

Жаңа Өсиеттегі Исаның көптеген шәкірттері Киелі Рухты олардың үстіне қолдарын қойып, сиынған кезде қабылдады.

Екi елшi олардың үстерiне қолдарын қойғанда, самариялық сенушiлер де Киелi Рухты қабылдады (Елш. 8:17).

КИЕЛІ РУХТЫҢ ДАРЫНДАРЫ
Киелі Рухқа кенелген кезде рухани дарындар беріледі. Киелі Рухқа кенелу кезінде Киелі жазбада ерекше дарынды – бөтен тілдерде сөйлеу дарынын атап өтеді.

Бәрi Киелi Рухқа кенелiп, Оның өздерiне берген дарынына қарай бөтен тiлдерде сөйлей бастады
(Елш. 2:4).

Пауыл үстерiне қолын қойғанда, оларға Киелi Рух қонды; бұлар бөтен тiлдерде сөйлеп, Құдайдың хабарларын жеткiзе бастады
(Елш. 19:6).

КУӘ БОЛУҒА ӨКІЛЕТТІ
Иса біздің тиімді куәгер бола алуымыз үшін, бізге Киелі Рухтың қонатынын айтып, уәде берді. Киелі Рух бізге Ізгі хабарды таратуға қайда барсақ та күш-қуат береді.

Бiрақ сендер Киелi Рух өздерiңе қонғанда Оның құдiретiн қабылдайсыңдар, сөйтiп Иерусалимде, бүкiл Яhудея мен Самария аймақтарында және жердiң шетiне дейiн Маған куә боласыңдар (Елш. 1:8).

Жеке қолдану:
Сіз күнәларыңызды мойындап, тәубеге келдіңіз бе?
Құтқарылудың бір ғана жолы бар, ол тек Иса Мәсіх арқылы екендігіне сендіңіз бе?
Сіз Киелі Рухқа кенелдіңіз бе?
Сіз тәубеге келгеннен кейін шомылдыру рәсімінен өттіңіз бе?

АЛҒЫСӨЗ

Дұрыс бастама 1974-жылдан 1979-жылға дейін Рон деген жас, жаңа жетекші, бағушы Джексон қаласының (Миссисипи штаты), (бұл қалада мен туып-өстім), барлық мектептерінде Ізгі хабарды әркімге, оны тыңдағандарға немесе тыңдамағандарға, батылдықпен айтты. Осы жылдары сансыз көп жасөспірімдер өмірлерінде бірінші рет Құдайдың құтқару жоспарын естіді және түсінді; жүздеген жасөспірім оны қабылдады. Олардың көбісі жастардың жетекшілері, бақташы, елші ретінде және жаңа қауымды орнатушы ретінде толық уақытты қызметкерлер болды. 70-жылдардың ортасында Ізгі хабарды Ронның айтуымен естігендердің бірі мен болдым. Алайда Рон арқылы Ізгі хабарды алғашқы рет естіген кезде, мен тәубеге келу жайында ойлаған жоқпын, керісінше, мен олардан қаштым. Мен Роннан, оның шәкірттерінен, Құдайдан қаштым. Осылайша мен жарты жылдай Роннан әртүрлі сылтаулармен қашып жүрдім. Әрине бұл оңайға соққан жоқ, себебі бұл адам маған барлық жерде жүрген сияқты болып көрінді. Ол әрбір баскетбол, футбол ойындарында болды. Ол мектептің дәлізінде, асханада, аулада болды. Ол өзінің жанындағы жігіттермен бірге мені үнемі қауымдағы әртүрлі кездесулерге, таурат сабақтарына, сиыну қызметтеріне, жастар кешіне шақырды. Ақырында, 1975-жылы, қараша айында мен Ізгі хабарды қабылдадым. Мен тәубеге келіп, тек Исаға сенім арта бастадым. Бақытыма қарай, осымен барлығы аяқталған жоқ. Ронның мақсаты – өзінің тозығы жеткен Киелі кітабына тағы да бір адамның жаны құтқарылғандығына белгі қою емес еді. Оның қызметінің мәнісі құтқару ғана емес, шәкірттерді тәрбиелеу болды, сондықтан оның менімен жұмысы енді басталды. Ол мені жастардың бір тобына ертіп апарды, сегіз адамнан тұратын топ апта сайын кездесіп, Құдайдың соңынан қалай еруді оқып үйрендік. Мен Ізгі хабарды таратуға, жеке қарым-қатынасты қолдауға және шәкірттікке сенемін. Рон маған Ізгі хабарды айтты, бірақ мен оны қабылдамадым. Мен одан қашып жүрдім, ал ол менен қалмады. Ол менің соңымнен жарты жыл бойы жүгірді, маған уағыз айтты, мен үшін сиынды. Ол менен қалмай қойды. Бұны жеке қарым-қатынасты қолдау деп айтайды. Мен Ізгі хабарды қабылдағаннан кейін, Рон мені шағын топмен бірге оқытып, үйретті. Ол маған Киелі жазбаны қалай оқуды, Құдайдың Сөзімен қалай өмір сүруді үйретті. Қалай сиынуды үйретті. Сеніммен қалай бөлісуді және шәкірттерді қалай тәрбиелеуді үйретті. Бұл жеке шәкірттік болды. Жеке қарым-қатынас және шәкірттік. Бұл ұлы аманат. Бұл кішкентай кітап осы туралы. «Жеке, көзбе-көз, оңаша» (Один на один) кітабы жеке қарым-қатынасты және шәкірттікті қолдау үшін қарапайым оқу құралы ретінде жазылған. Бұл оқу құралы. Ол шәкіртті тәрбиелемейді, бірақ сізге осыған көмектеседі. Сондай-ақ, ең маңыздысы, сенімге жаңа келген адамға дұрыс бастама алуға көмектеседі. Стив Мюррелл Манила (Филиппин), 1996 жыл

Алдымен

Иса оларға: — Соңымнан ерiңдер! Мен сендердi балық аулағандарың сияқты бұдан былай адамдарды жинап әкелетiн етемiн, - дедi (Марқа 1:17). Бұл бес қадам сізге Иса Мәсіхтің соңынан еруді дұрыс бастауға көмектеседі. Құтқарылу үшін сіз өзіңізге, өзіңіздің жақсы істеріңізге ғана сенуді қойып, тек Иса Мәсіхке ғана сенім арта бастаңыз. Себебi Құдайдың рақымымен, Мәсiхке деген сенiмдерiң арқылы құтқарылдыңдар. Бұл — өздерiңнiң жетiстiктерiң емес, Құдайдан келген сый, сондықтан игi iстерiмнiң арқасында құтқарылдым деп ешкiм мақтанбасын (Еф.2:8,9). Киелі жазба күнә деп атағандардың барлығын бас тартыңыз. Бiрақ Құдайдың салған негiзi берiк тұрады, онда мына сөздер «мөрленiп» жазылған: «Иемiз қарамағындағыларын жақсы бiледi» және «Иемiздiң атына сиынатын әркiм жамандықтан алшақтасын!» (2 Тім.2:19). Шағын шәкірттер тобына және апта сайын болатын Құдайға арналған қызметке барыңыз. Өзара сүйiспеншiлiк көрсетiп, игiлiк iстеуге қозғау салудың қамын ойлайық. Кейбiреулер сенушiлердiң жиналыстарына бармай қалуды дағдыға айналдырып алған сияқты. Ал бiздер солай iстемей, бiр-бiрiмiздi одан бетер жiгерлендiрейiк. Иемiздiң қайтып келетiн күнiнiң таяп қалғанын бiлесiңдер ғой (Евр. 10:24,25). Киелі кітапты күн сайын оқыңыз және оған мойынсұныңыз. Осы Таурат заңы кітабында жазылғандардың бәрін сақтап, орындай алуың үшін оларды аузыңнан тастамай, күні-түні оқып, солар туралы ойланатын бол! Сонда ғана өркендеп табысты боласың (Еш.1:8). Басқаларға өзіңіздің Иса Мәсіхтің соңынан ергеніңіз туралы айтып беріңіз. Бiрақ Иса рұқсат бермей: — Үйiңе қайтып, туысқандарың мен дос-жарандарыңа Жаратқан Иенiң өзiңе не iстегенiн, қалай рақым еткенiн айтып бер! — дедi. Әлгi адам барып, Исаның өзiне не iстегенiн Онқала аймағында жариялай бастады. Естiгендердiң бәрi таңданып, қайран қалысты (Мар. ).

ҚҰТҚАРЫЛУ

Жаңа бастама Сонымен, бiреу Мәсiхпен тығыз байланысса, сол — жаңадан жаратылған адам. Ескi өмiрi өтiп кетiп, мiне, жаңасы пайда болды! (2 Қор. 5:17). Жаңа жаратылыс. Жаңа бастама. Біздің бәрін басынан бастағымыз келгені жақсы жаңалық болып табылады. Алайда осы жақсы жаңалықты бағаламас бұрын, біз неге барлығын басынан бастауымыз керектігін жете біліп алуымыз қажет. Біз неге «жаңадан жаратылған адам» болуымыз қажет? Бізге құтқарылудың қажеті қанша? МӘСЕЛЕ (проблема): Біз күнәміздің кесірінен Құдайдан ажырап қалдық Құдай мен адамның арасында алшақтық жатты. Құдай мен адамның арасындағы осы мәңгілік алшақтықтың себебі күнә болып табылады. Құдай мың шақырым алыс жерде сияқты сезімдер сізде болды ма? Сіздің сиынған мінәжатыңыз алысқа бармай, оны ешкім естімейтін сияқты сезім болды ма? Өзіңізді Құдайдан алыс сезіндіңіз бе? Бұл барлығымыздың басымыздан өтті. Құдайдан өзіңді алыс сезіну – бұл кеңінен өріс алған жағдай. Осы алшақтықты cезінген көп адамдар, егер де Құдай туралы ойлауға тырысатын болса, өз діні туралы көбірек білсе немесе қандай да бір ғибадатханаға барса, олар Құдайға жақын боламыз деп ойлайды. Алайда Құдай мен адамның арасындағы алшақтық физикалық та, саналы да нәрсе емес, олай болса, Құдай туралы ойлар да, білім де бізді Құдайға жақындата алмайды. Онда ол не нәрсеге байланысты? Бiлiп алыңдар: Жаратқан Иенiң қолы сендердi құтқауға дәрменсіз емес, Оның құлағы мiнажаттарыңды естуге мүкiс те емес. Қайта, өздерiңнiң әдiлетсiз iстерiң Құдаймен араларыңды ажыратып келедi! Жасаған күнәларың Оның бетiн сендерден бұрып әкетедi. Сондықтан да Құдай Ие мiнажаттарыңа құлақ салмайды (Ишая 59:1,2). Құдай мен адамдардың арасындағы алшақтық – рухани алшақтық. Құдай – киелі, ал адам – киелі емес. Құдай әділетті, адам ондай емес. Бәрі де күнә жасады, сондықтан барлық адамдар Құдайдан мәңгілікке ажырап қалды. Адамдардың бәрі күнәнің салдарынан – мәңгілік өліммен азап шегетін болады. Бәрi де күнә жасап, Құдайдың өздерiне белгiлеген ұлылығынан құр алақан қалды (Рим. 3:23). Күнәның беретiнi — (мәңгiлiк) өлiм, ал Құдайдың беретiн сыйы — Иемiз Иса Мәсiхпен тығыз байланыстағы мәңгiлiк өмiр (Рим. 6:23). ШЕШІМ Құдайдың құрбандығы және алмастыру Құдайдың әділдігі адамдардың күнәсін өтеу үшін құрбандықты талап етеді. Иса Мәсіх біз үшін құрбан болып, күнәміздің жазасын айқыш ағашта өтеді. Құдай киелі, әділ, Ол күнәнің жазасыз қалуына жол бермейді. Құдай сүйіспеншілікке толы, аяушылық танытатын, мейірімді болғандықтан, Ол бүкіл адамзаттың Өзінен мәңгілікке ажырауын қаламады. Осы мәселенің керемет шешімі - Құдайдың рухани Ұлы Иса - күнәнің құнын өтейтін құрбандық болды. Әйтпесе Ол әлем жаратылғаннан берi әлденеше рет азап шегiп өлуге мәжбүр болған болар едi. Керiсiнше, Мәсiх қазiр, дүниенiң ақырғы заманында, бiр-ақ рет жер бетiне келiп, адамдарды күнәларынан бiржола арылту үшiн Өзiн құрбандыққа қиды. Құдай адамның бiр рет өлiп, содан соң қиямет сотының алдында тұратынын белгiлеген. Сол секiлдi Мәсiх бiр рет көптеген адамдардың күнәларын Өз мойнына алып құрбан болды. Ол дүниеге қайта оралған кезде тағы да күнәны өтеу үшiн емес, Өзiн аңсап күтiп жүргендердi түгелдей құтқару үшiн келеді (Евр. 9:26-28). Айқыш ағашта қандай жағдай болды? Иса айқыш ағашта құрбан болуы арқылы, біздің күнәміздің құнын өтеді. Ол әділ болса да, біздің күнәмізді мойнына артты. Ол бізге тиісті қарғысты Өз мойнына алып, оның орнына бізге Өзінің жарылқауын берді. Иса Өзінің кінәратсыз өмірінің арқасында адамзаттың күнәсінің құнын төлеуге лайықты жалғыз Құтқарушы және Құдай мен адамның арасындағы терең құзды Жалғастырушы болды. Құдай бiздiң күнәларымызды ешқашан күнә жасамаған Мәсiхке артты. Онымен тығыз байланысқан бiз осы арқылы Тәңiр алдында ақталдық (2 Қор. 5:21). Алайда айқышқа шегеленiп iлiнген кезде Мәсiх бiзге тиiстi қарғысты Өз мойнына алып, бiздi Таурат заңы мәлiмдеген қарғыстан құтқарды! Себебi «ағашқа iлiнген әркім Құдайдың қарғысына ұшырап тұрады» деп жазылған (Ғал. 3:13). НӘТИЖЕ Біздің құтқарылуымыз және Құдаймен татуласуымыз Біз күнәмізге кешірім алу үшін, Құдаймен татуласу үшін және мәңгілік өмірге ие болу үшін Иса Мәсіх айқышта құрбан болды. Біз бәріміз киелі және әділ Құдайға қарсы күнә жасадық. Күнәнің жазасы – Құдайдан мәңгілікке ажырап, тозаққа түсу. Құдай әділетті және Ол күнәні жазалайды. Алайда Ол – сүйіспеншіліктің Құдайы, Ол біздің мәңгілікте тозақта болғанымызды қаламайды. Сондықтан да Құдай Өзінің Ұлы Иса Мәсіхті біздің күнәміздің құнын төлеу үшін, айқыш ағашта Өз өмірін біз үшін құрбан етуге жіберді. Исаның өмірі таза, күнәсіз болғандықтан, өлім Оған билігін жүргізе алмады, Иса үшінші күні өлімнен қайта тірілді. Иса арқылы біз күнәдан арылып, кешірімге және мәңгілік өмірге ие боламыз. Иса арқылы Құдайдың алдында біз әділ саналып, Оның баласы ретінде жаңа өмірге ие боламыз. Өйткенi Құдай адамзатты сондай қатты сүйгендiктен, Өзiнiң жалғыз рухани Ұлын құрбандыққа бердi. Ендi Оған сенушi әркiм жаны тозаққа түспей, мәңгiлiк өмiрге ие болады (Жохан 3:16). Мәсiхтiң құрбан болып, қаны төгiлуiмен төлемiмiз өтелiп, бiздер жамандықтың құлдығынан азат етiлiп, күнәларымыз кешiрiлдi. Осылайша Құдай шексiз зор рақымын бізге молынан жаудырды (Еф. 1:17). Алайда Иса Мәсiхтiң қанын төгiп, құрбан болғандығы арқылы бұрын қашық жүрген сендер ендi Құдайға жақындадыңдар (Еф. 2:13). ЖАУАП Сенім арқылы Құдайдың дарынын қабылдаңыз Біз өзімізге емес, Иса Мәсіхтің біз үшін істеген әрекетіне сене бастаған кезде құтқарылуды қабылдаймыз. Біздің құтқарылуымыз Құдайдың мол рақымының нәтижесі болып табылады. Ол Исаның біз үшін айқыш ағаштағы әрекетінен басталады. Біздің құтқарылуымыз Құдай үшін істеген біздің жақсы істерімізге ешқандай қатысы жоқ. Біз жақсы іс-әрекетіміз арқылы құтқарыла алмаймыз және Құдайдың қолдауына ие де болмаймыз. Біз Құдайдың рақымы арқылы құтқарылдық, бізге Құтқарушы қажет екенін жете түсінген кезде, біз күнәдан бас тартып, Иса Мәсіхті Жаратушы Ие және Құтқарушы деп қабылдаған кезде, сенімімізді Оған толық артқан кезде біз құтқарыламыз. Өз аузыңмен Исаны Жаратқан Ием деп мойындасаң, жүрегiңде Құдайдың Оны өлiмнен қайта тiрiлткенiне сенсең, онда құтқарыласың. Себебi Мәсiхке жүрегiмен сенуi арқылы адам күнәсынан ақталып, Оны аузымен мойындауы арқылы құтқарылады (Рим. 10:9,10). Себебi Құдайдың рақымымен, Мәсiхке деген сенiмдерiң арқылы құтқарылдыңдар. Бұл — өздерiңнiң жетiстiктерiң емес, Құдайдан келген сый, сондықтан игi iстерiмнiң арқасында құтқарылдым деп ешкiм мақтанбасын (Еф. 2:8,9). Жеке қолдану: Сіз өзіңізге сенуіңізді қойып, тек Иса Мәсіх арқылы ғана құтқарылатыңызға сенесіз бе? Сіз өзіңіздің барлық күнәларыңыздан бас тарттыңыз ба? Иса Мәсіхті Жаратқан Ием деп және өміріңіздің Қожайыны ретінде мойындадыңыз ба? Сіз Исаның соңынан еруге және Оған өміріңіздің аяғына дейін мойынсұнуға дайынсыз ба? Құтқарылу мінәжаты Көктегі Құдай Әке, бізді арамыздағы алшақтық менің күнәмнің кесірінен болғанын мойындаймын. Мен өзімнің күнәһар екендігімді және Сенің маған белгілеген ұлылығыңнан құр алақан қалғанымды мойындаймын. Менің күнәмнің құнын өтеу үшін Сен Өзіңнің ұлың Исаны жібергеніңе алғыс айтамын. Исаның мен үшін айқыш ағашта құрбан болғанына сенемін, Исаны өлімнен қайта тірілткеніңе сенемін. Мен күнәларым үшін өкініп, кешірім сұраймын. Мені күнәларымнан тазартшы. Киелі жазба «күнә» деп атағанның бәрінен бас тартқым келеді. Мен Исаны Жаратқан Ием деп және Құтқарушым деп қабылдаймын. Өмірімнің аяғына дейін Сені сүюге, Саған қызмет етуге, Саған мойынсұнуға көмектесші. Исаның атымен сиындым. Аумин. Жаңа өмір Егер де сіз осы мінәжатпен шын жүректен сиынсаңыз, Киелі кітапта ескінің бәрі өтіп, жаңаның пайда болғанын айтады. Келесі 11 сабақ сіздің өміріңізге енген кейбір жаңа нәрселермен таныстырады.