𝗪𝗔𝗥𝗠 𝗨𝗣

• Ikwento ang isa sa mga pinakamahalaga mong gamit. Ano ang dahilan bakit espesyal ito?

• Ano ang isang bagay na inaabangan mo sa mga darating na linggo? Paano nakakaapekto sa mga ginagawa mo ngayon ang pananabik mo para dito?

• Balikan ang isang pagkakataon na nawalan ka ng gana o lakas para gawin ang isang bagay. Paano bumalik ang sigla mo na gawin ulit ito?

𝗪𝗢𝗥𝗗

𝘔𝘨𝘢 𝘮𝘪𝘯𝘢𝘮𝘢𝘩𝘢𝘭, 𝘬𝘢𝘩𝘪𝘵 𝘯𝘢 𝘨𝘢𝘯𝘪𝘵𝘰 𝘢𝘯𝘨 𝘴𝘪𝘯𝘢𝘴𝘢𝘣𝘪 𝘯𝘢𝘮𝘪𝘯, 𝘯𝘢𝘬𝘢𝘬𝘢𝘵𝘪𝘺𝘢𝘬 𝘬𝘢𝘮𝘪𝘯𝘨 𝘯𝘢𝘴𝘢 𝘮𝘢𝘣𝘶𝘵𝘪 𝘬𝘢𝘺𝘰𝘯𝘨 𝘬𝘢𝘭𝘢𝘨𝘢𝘺𝘢𝘯 𝘵𝘶𝘯𝘨𝘬𝘰𝘭 𝘴𝘢 𝘬𝘢𝘭𝘪𝘨𝘵𝘢𝘴𝘢𝘯 𝘯𝘪𝘯𝘺𝘰. 𝗛𝗘𝗕𝗥𝗘𝗢 𝟲:𝟵

(Basahin din ang 𝗛𝗘𝗕𝗥𝗘𝗢 𝟲:𝟭𝟬–𝟮𝟬.)

Dahil tinanggap na natin si Jesus bilang Panginoon at Tagapagligtas, wala na ang dati nating buhay at dumating na ang mga bagong bagay. Kasama sa mga bagong bagay na ito ang pangako ng Diyos na pagkakaroon ng mabuting kalagayan—𝘬𝘢𝘭𝘢𝘨𝘢𝘺𝘢𝘯 𝘵𝘶𝘯𝘨𝘬𝘰𝘭 𝘴𝘢 𝘬𝘢𝘭𝘪𝘨𝘵𝘢𝘴𝘢𝘯. Ang mga ito ay bahagi ng pamana na ipinangako ng Diyos sa Kanyang mga anak. Ang Diyos ay tapat at mapagkakatiwalaan at ito ay bahagi ng Kanyang likas na katangian na hindi nagbabago. Kapag nangako ang Diyos, makakasiguro tayo na ito’y Kanyang tutuparin. Dahil tiyak ang mas mabubuting bagay para sa atin kay Cristo, paano tayo tutugon?

𝟭. 𝗠𝗮𝗸𝗮𝗸𝗮𝗽𝗮𝗴𝗽𝗮𝘁𝘂𝗹𝗼𝘆 𝘁𝗮𝘆𝗼 𝘀𝗮 𝗺𝗮𝘁𝗮𝗽𝗮𝘁 𝗻𝗮 𝗽𝗮𝗻𝗶𝗻𝗶𝗹𝗯𝗶𝗵𝗮𝗻 𝘀𝗮 𝗗𝗶𝘆𝗼𝘀.

𝘔𝘢𝘬𝘢𝘵𝘢𝘳𝘶𝘯𝘨𝘢𝘯 𝘢𝘯𝘨 𝘋𝘪𝘰𝘴, 𝘢𝘵 𝘩𝘪𝘯𝘥𝘪 𝘯𝘪𝘺𝘢 𝘮𝘢𝘨𝘢𝘨𝘢𝘸𝘢𝘯𝘨 𝘬𝘢𝘭𝘪𝘮𝘶𝘵𝘢𝘯 𝘢𝘯𝘨 𝘪𝘯𝘺𝘰𝘯𝘨 𝘮𝘢𝘣𝘶𝘣𝘶𝘵𝘪𝘯𝘨 𝘨𝘢𝘸𝘢 𝘢𝘵 𝘢𝘯𝘨 𝘱𝘢𝘨𝘮𝘢𝘮𝘢𝘩𝘢𝘭 𝘯𝘢 𝘪𝘱𝘪𝘯𝘢𝘬𝘪𝘵𝘢 𝘯𝘪𝘯𝘺𝘰 𝘴𝘢 𝘬𝘢𝘯𝘺𝘢 𝘢𝘵 𝘱𝘢𝘵𝘶𝘭𝘰𝘺 𝘯𝘢 𝘪𝘱𝘪𝘯𝘢𝘱𝘢𝘬𝘪𝘵𝘢 𝘴𝘢 𝘱𝘢𝘮𝘢𝘮𝘢𝘨𝘪𝘵𝘢𝘯 𝘯𝘨 𝘱𝘢𝘨𝘵𝘶𝘭𝘰𝘯𝘨 𝘴𝘢 𝘮𝘨𝘢 𝘬𝘢𝘱𝘸𝘢 𝘱𝘪𝘯𝘢𝘣𝘢𝘯𝘢𝘭 𝘯𝘨 𝘋𝘪𝘰𝘴. 𝘕𝘢𝘪𝘴 𝘯𝘢𝘮𝘪𝘯𝘨 𝘱𝘢𝘵𝘶𝘭𝘰𝘺 𝘯𝘢 𝘮𝘢𝘨𝘪𝘯𝘨 𝘮𝘢𝘴𝘪𝘨𝘢𝘴𝘪𝘨 𝘢𝘯𝘨 𝘣𝘢𝘸𝘢𝘵 𝘪𝘴𝘢 𝘴𝘢 𝘪𝘯𝘺𝘰 𝘴𝘢 𝘱𝘢𝘨-𝘢𝘴𝘢 𝘯ʼ𝘺𝘰 𝘴𝘢 𝘋𝘪𝘰𝘴 𝘩𝘢𝘯𝘨𝘨𝘢𝘯𝘨 𝘴𝘢 𝘸𝘢𝘬𝘢𝘴 . . . 𝗛𝗘𝗕𝗥𝗘𝗢 𝟲:𝟭𝟬–𝟭𝟭

Dahil sa mas mabubuting bagay na mayroon tayo kay Cristo, hinihikayat tayong patuloy at buong pusong isagawa ang gawain na ipinagkatiwala Niya sa atin—na maging asin at ilaw, magmahal sa kapwa, at ipakilala si Jesus sa kanila. Ibig sabihin nito ay magpatuloy tayo kahit may kabiguan, sumulong kahit may humahadlang, at manatiling matatag sa gitna ng mga pagsubok. Makakasiguro tayo na hindi masasayang ang anumang paglilingkod natin sa Panginoon. Hindi tayo naglilingkod para sa isang bagay na walang kasiguraduhan o mula sa pagdududa. Sa halip, may matibay tayong katiyakan na kasama ng lahat ng mabubuting bagay na inihanda ng Diyos para sa atin, gagantimpalaan Niya ang tapat nating paglilingkod sa pagbabalik ni Jesus. Magkwento tungkol sa panahong nakatulong sa ’yo ang katotohanang ito upang paglingkuran ang Diyos kung saan ka Niya tinawag.

𝟮. 𝗠𝗮𝗮𝗮𝗿𝗶 𝗻𝗮𝘁𝗶𝗻𝗴 𝘁𝘂𝗹𝗮𝗿𝗮𝗻 𝗮𝗻𝗴 𝗺𝗴𝗮 𝘁𝗮𝗼𝗻𝗴 𝗻𝗮𝗴𝗺𝗮𝗻𝗮 𝗻𝗴 𝗺𝗴𝗮 𝗽𝗮𝗻𝗴𝗮𝗸𝗼 𝗻𝗴 𝗗𝗶𝘆𝗼𝘀.

𝘏𝘶𝘸𝘢𝘨 𝘬𝘢𝘺𝘰𝘯𝘨 𝘮𝘢𝘨𝘪𝘯𝘨 𝘵𝘢𝘮𝘢𝘥, 𝘴𝘢 𝘩𝘢𝘭𝘪𝘱, 𝘵𝘶𝘭𝘢𝘳𝘢𝘯 𝘯ʼ𝘺𝘰 𝘢𝘯𝘨 𝘮𝘨𝘢 𝘵𝘢𝘰 𝘯𝘢 𝘵𝘶𝘮𝘢𝘵𝘢𝘯𝘨𝘨𝘢𝘱 𝘯𝘨 𝘮𝘨𝘢 𝘪𝘱𝘪𝘯𝘢𝘯𝘨𝘢𝘬𝘰 𝘯𝘨 𝘋𝘪𝘰𝘴 𝘴𝘢 𝘱𝘢𝘮𝘢𝘮𝘢𝘨𝘪𝘵𝘢𝘯 𝘯𝘨 𝘱𝘢𝘯𝘢𝘯𝘢𝘮𝘱𝘢𝘭𝘢𝘵𝘢𝘺𝘢 𝘯𝘪𝘭𝘢 𝘢𝘵 𝘱𝘢𝘨𝘵𝘪𝘵𝘪𝘪𝘴. 𝗛𝗘𝗕𝗥𝗘𝗢 𝟲:𝟭𝟮

Ang pangakong mas mabubuting bagay ay hindi nangangahulugan na wala na ang mga pagsubok at tukso. Hindi tayo pinangakuan ng isang buhay na walang problema. Maaaring akalain natin na dahil sa mga mas mabubuting bagay kay Cristo, wala na tayong kailangang gawin o pag-ingatan. Pero 𝘩𝘪𝘯𝘥𝘪 𝘥𝘢𝘱𝘢𝘵 𝘵𝘢𝘺𝘰 𝘮𝘢𝘨𝘪𝘯𝘨 𝘵𝘢𝘮𝘢𝘥 o kampante pagdating sa ating pananampalataya. Hinimok tayo ng talatang ito na tumingin at tularan ang mga taong namuhay nang may 𝘱𝘢𝘯𝘢𝘯𝘢𝘮𝘱𝘢𝘭𝘢𝘵𝘢𝘺𝘢 𝘢𝘵 𝘱𝘢𝘨𝘵𝘪𝘵𝘪𝘪𝘴. Siguro’y alam ng sumulat na susubukin ang ating pasensiya at paninindigan ng mga problema sa buhay habang hinihintay natin ang katuparan ng mga pangako ng Diyos. Sino-sino ang mga taong naging halimbawa sa ’yo ng pananampalataya at pagtitiyaga kay Cristo? Paano ka nila natulungan na isabuhay ang kalooban ng Diyos?

𝟯. 𝗠𝗮𝗽𝗮𝗻𝗴𝗵𝗮𝗵𝗮𝘄𝗮𝗸𝗮𝗻 𝗻𝗮𝘁𝗶𝗻 𝗮𝗻𝗴 𝘀𝗶𝗴𝘂𝗿𝗮𝗱𝗼𝗻𝗴 𝗽𝗮𝗴-𝗮𝘀𝗮.

𝘈𝘵 𝘢𝘯𝘨 𝘥𝘢𝘭𝘢𝘸𝘢𝘯𝘨 𝘣𝘢𝘨𝘢𝘺 𝘯𝘢 𝘪𝘵𝘰—𝘢𝘯𝘨 𝘱𝘢𝘯𝘨𝘢𝘬𝘰 𝘯𝘪𝘺𝘢 𝘢𝘵 𝘱𝘢𝘯𝘶𝘯𝘶𝘮𝘱𝘢—𝘢𝘺 𝘩𝘪𝘯𝘥𝘪 𝘮𝘢𝘣𝘢𝘣𝘢𝘨𝘰, 𝘥𝘢𝘩𝘪𝘭 𝘩𝘪𝘯𝘥𝘪 𝘮𝘢𝘨𝘢𝘨𝘢𝘸𝘢𝘯𝘨 𝘮𝘢𝘨𝘴𝘪𝘯𝘶𝘯𝘨𝘢𝘭𝘪𝘯𝘨 𝘯𝘨 𝘋𝘪𝘰𝘴. 𝘒𝘢𝘺𝘢 𝘵𝘢𝘺𝘰𝘯𝘨 𝘮𝘨𝘢 𝘯𝘢𝘨𝘱𝘢𝘬𝘢𝘭𝘪𝘯𝘨𝘢 𝘴𝘢 𝘬𝘢𝘯𝘺𝘢 𝘢𝘺 𝘮𝘢𝘺 𝘮𝘢𝘵𝘪𝘣𝘢𝘺 𝘯𝘢 𝘱𝘢𝘨-𝘢𝘴𝘢𝘯𝘨 𝘱𝘪𝘯𝘢𝘯𝘨𝘩𝘢𝘩𝘢𝘸𝘢𝘬𝘢𝘯 𝘯𝘢 𝘨𝘢𝘨𝘢𝘸𝘪𝘯 𝘯𝘪𝘺𝘢 𝘢𝘯𝘨 𝘪𝘱𝘪𝘯𝘢𝘯𝘨𝘢𝘬𝘰 𝘯𝘪𝘺𝘢 𝘴𝘢 𝘢𝘵𝘪𝘯. 𝗛𝗘𝗕𝗥𝗘𝗢 𝟲:𝟭𝟴

Dahil sa pangako ng Diyos na mas mabubuting bagay at sa Kanyang katangian na hindi nagbabago, maaari tayong maging panatag habang kumakapit ng mahigpit sa pag-asa natin sa Kanya. Sa Diyos, makakaasa tayo na darating ang panahon na magiging mas mabuti ang lahat. Bilang mga Kristiyano, ang pag-asa natin ay na kay Jesus. Kaya’t kapag hinihikayat tayong kumapit sa pag-asang nasa harapan natin, ibig sabihin nito ay panghawakan natin ang pangako ng buhay na walang hanggan na mayroon tayo dahil kay Jesus at sa Kanyang ginawa sa krus. Ano ang sinasabi ng Roma 8:28 tungkol sa mga umiibig sa Diyos at tinawag ayon sa Kanyang layunin? Paano ito makakatulong upang mapalakas at mapatibay ang loob natin sa araw na ito?

𝗔𝗣𝗣𝗟𝗜𝗖𝗔𝗧𝗜𝗢𝗡

• Ano sa palagay mo ang ipinapagawa sa ‘yo ng Diyos? Paano mo ito tutugunan at buong puso Siyang paglilingkuran dahil sa mas mabubuting bagay na ipinangako Niya?

• Magbanggit ng tatlong tao sa buhay mo na naging huwaran ng pananampalataya kay Cristo at kasama mong maglakbay sa buhay. Paano mo sila tutularan sa kanilang pananampalataya habang sila’y sumusunod sa Diyos?

• Sino ang maaari mong hikayatin sa pag-asang mayroon tayo dahil kay Jesus at sa mga mabubuting bagay na mula sa Diyos? Paano magiging patotoo ang buhay mo bilang isang taong matatag ang pag-asa kay Cristo?

𝗣𝗥𝗔𝗬𝗘𝗥

• Pasalamatan ang Diyos dahil kay Jesus, tayo ay naligtas at naging bahagi ng ipinangako Niyang mas mabubuting bagay. Ipanalangin na palagi kang magalak sa kaligtasang ito at mamuhay sa pananampalataya araw-araw.

• Ipanalangin ang ating komunidad ng iglesya, na sama-sama tayong maglakbay sa paraang karapat-dapat sa ipinapagawa ng Diyos sa ating buhay habang inuudyok natin ang isa’t isa na magmahalan at gumawa ng mabuti (Efeso 4:1; Hebreo 10:24–25).

• Hilingin sa Diyos ang lakas ng loob na buong puso Siyang paglingkuran, magpatuloy sa pananampalataya, at mahigpit na kumapit sa pag-asa sa gitna ng mundong puno ng pagkawasak. Ipanalangin din na habang naglilingkod tayo sa Kanya, magkaroon ang iba ng pagkakataong makilala rin Siya.