IGLESYA

MGA BAGONG RELASYON

Sumagot si Simon Pedro, "Kayo po ang Cristo, ang Anak ng Diyos na buhay." Sinabi ni Jesus sa kanya, "Pinagpala ka ng Diyos, Simon na anak ni Jonas. Sapagkat hindi tao ang nagpahayag sa iyo ng bagay na ito kundi ang aking Amang nasa langit. At ngayon sinasabi ko sa iyo na ikaw si Pedro, at sa batong ito, itatayo ko ang aking iglesya, at hindi ito malulupig kahit ng kapangyarihan ng kamatayan."
Mateo 16:16-18

Sa pamamagitan ng paghahayag ng Banal na Espiritu, sinabi ni Pedro kung sino ba talaga si Jesus, ang Anak ng Diyos na buhay. Sinabi ni Jesus na ang katotohanang ito ang magiging pundasyong bato kung saan itatatag ang iglesya.

Kanya ring isinalarawan ang uri ng iglesya na Kanyang itatayo, isang matagumpay na iglesya na magwawagi laban sa kaharian ng kadiliman. Ginamit ni Jesus at ni Pablo ang salitang iglesya bilang pagtukoy sa mga mamamayan ng Diyos.

Ang iglesya ay hindi kailanman tumutukoy sa isang gusali. Ang mga sumusunod ay apat na pakinabang na makakamit natin kung tayo ay bahagi ng isang lokal na iglesya.

PAGKAKAIBIGAN
Tunay na mga kaibigan. Lahat ng tao ay nangangailangan nito. Kaunti lamang ang nakakahanap nito. Ang pinakamainam na lugar kung saan tayo makakakita ng totoong kaibigan ay sa iglesya, sa mga mamamayan ng Diyos.

Ang mga tunay na kaibigan ay ang mga naghahangad ng ating kabutihan. Kasama natin sila sa lahat ng hirap at ginhawa. Ang mga tunay na kaibigan ay hindi maglalayo sa atin sa Diyos. Sa halip, tayo’y kanilang isinusulong sa kabanalan.

Ang kaibigan ay nagmamahal sa lahat ng panahon, nagkaroon tayo ng kapatid upang sa kagipitan ay tumulong.
Kawikaan 17:17

May mga pagkakaibigang hindi nagtatagal, ngunit may pagkakaibigan din na higit pa sa magkapatid ang pagsasamahan.
Kawikaan 18:24

PAGSASAMAHAN
Kung ang isang nagbabagang uling ay tatanggalin sa tumpok ng apoy, ito ay manlalamig. Kung ito ay ibabalik sa gitna ng tumpok ng nagbabagang uling, ito ay muling mag-iinit.

Gayundin ang mangyayari sa mga Kristiyano. Kung ang isang Kristiyano ay mawawalay sa mga “nagbabagang” Kristiyano, siya ay “manlalamig” sa kanyang pananampalataya.

Kung ang isang Kristiyano ay mananatiling kaugnay ng iba pang Kristiyano, siya ay mananaliting “nagbabaga” para sa Diyos.

Naging masigasig sila sa pag-aaral ng mga itinuturo ng mga apostol, sa pagtitipon bilang magkakapatid, sa paghahati-hati ng tinapay, at sa pananalangin....Maganda ang pagsasamahan ng mga mananampalataya, at pinag-isa nila ang kanilang mga ari-arian para makabahagi ang lahat. Ipinagbili nila ang kanilang mga lupa at ari-arian, at ang pera’y ipinamahagi nila sa kanilang mga kasama ayon sa pangangailangan ng bawat isa. Araw-araw, nagtitipon sila sa templo at naghahati-hati ng tinapay sa kanilang mga bahay. Lubos ang kagalakan nila sa kanilang pakikibahagi sa pagkain.
Mga Gawa 2:42,44-46

Huwag kayong makiisa sa mga hindi mananampalataya. Sapagkat hindi maaaring magkaisa ang kabutihan at kasamaan, gaya ng liwanag at dilim . . .
2 Corinto 6:14

PAGSAMBA
Naghahanap ang Diyos ng mga tunay na sumasamba. Ang pagsamba ay simpleng paghahayag ng ating pag-ibig, debosyon, at dedikasyon sa Diyos.

“Tandaan mo, darating ang panahon, at narito na nga, na ang mga tunay na sumasamba ay sasamba sa Ama sa espiritu at katotohanan. Ganito ang uri ng mga sumasamba na hinahanap ng Ama. Ang Diyos ay espiritu, kaya ang sumasamba sa kanya ay dapat sumamba sa pamamagitan ng espiritu at katotohanan.”
Juan 4:23,24

PAGDIDISIPULO
Ang huling utos na ibinigay ng Diyos sa Kanyang mga tagasunod bago Siya umakyat sa langit ay ang pumunta sa lahat ng mga lahi at gawin silang mga tagasunod Niya, bautismuhan sila, at turuan sila kung paano sumunod sa Salita ng Diyos.

Samakatuwid, kailangan muna tayong maging disipulo o tagasunod ni Jesus, bago natin maturuan ang iba kung paano sumunod sa Kanya.

”Kaya puntahan ninyo ang lahat ng mga lahi at gawin silang mga tagasunod ko. Bautismuhan ninyo sila sa pangalan ng Ama at ng Anak at ng Banal na Espiritu. Turuan ninyo silang sumunod sa lahat ng iniutos ko sa inyo. At tandaan ninyo: lagi ninyo akong kasama hanggang sa katapusan ng mundo.”
Mateo 28:19,20

Ituro mo rin sa mga mapagkakatiwalaang tao, na makakapagturo rin sa iba, ang mga aral na narinig mo sa akin sa harapan ng maraming saksi.
2 Timoteo 2:2

PERSONAL NA PAGSASAPAMUHAY
Ikaw ba ay patuloy na natutulungang maging tagasunod ni Jesus, maging isahan man o kaya ay bilang bahagi ng isang small group?

Ikaw ba ay nagtuturo sa mga tao na maging tagasunod ni Jesus? Sino/sinu-sino ang mga tinuturuan mo?
Ikaw ba ay aktibong kasapi ng isang lokal na simbahan?

Magtala ng pangalan ng tatlong Kristiyanong maaari mong matawagan kung nangangailangan ka ng espirituwal na tulong.

TAMANG SIMULA

TAMANG SIMULA Noong 1974-1979, isang aktibong Presbyterian na pastor ng mga kabataan, na ang pangalan ay Ron, ang nagpunta sa mga mataas na paaralan ng Jackson Mississippi. Isa na doon ang paaralan kung saan ako nag-aaral. Sa mga lugar na ito, buong tapang na inihayag ni Ron ang ebanghelyo sa lahat ng nais makinig, at maging sa mga ayaw makinig sa kanya. Sa paglipas ng panahon, hindi mabilang na dami ng kabataan ang sa unang pagkakataon ay nakarinig at nakaunawa ng plano ng Diyos na kaligtasan. Daan-daan ang nanilbihan sa Panginoon bilang mga misyonaryo, pastor, o kaya ay youth ministers. Isa ako sa mga kabataang iyon. Subalit, ang naging tugon ko noong una ay hindi ang magsisi sa aking mga kasalanan, kundi ang tumakbo palayo. Tinakbuhan ko si Ron, ang kanyang mga tagasunod, at ang Diyos. Tinakbuhan ko sila ng mga anim na buwan. Naging mahirap para sa akin na gawin ito dahil nakikita ko si Ron kung saan-saan. Nanonood siya ng lahat ng laro ng football at basketball. Nakikita ko siya sa mga koridor ng paaralan, sa cafeteria, at maging sa paradahan ng mga sasakyan. Siya at ang kanyang grupo ng mga tagasunod ay lagi akong inaanyayahang dumalo ng kanilang retreat, Bible study, prayer meeting, o kaya ay mga pagtitipon ng mga kabataan sa kanilang simbahan. Sa wakas, noong Nobyembre ng taong 1975, tinanggap ko ang mensahe ng ebanghelyo. Nagsisi ako sa aking mga kasalanan at nanampalataya ako kay Cristo. Mabuti na lamang at hindi dito nagwakas ang lahat. Hindi sapat kay Ron na makita lamang ang mga kabataan na nagsusuko ng kanilang buhay kay Cristo. Gusto niyang sila’y maging mga disipulo ni Jesus. Isinama niya ako sa kanyang kilalang “action groups,”kung saan linggu-linggong nagtitipon ang mga walong katao. Dito, inaral namin kung paano mamuhay para sa Diyos. Dahil dito, naniniwala ako sa sistemang “one-to-one,”o personal na pagbabahagi ng ebanghelyo, pagsubaybay, at pagdidisipulo. Si Ron ang nagbahagi ng ebanghelyo sa akin, tinakbuhan ko sya. Hinabol niya ‘ko. Sa loob ng anim na buwan, hindi siya tumigil sa paghabol sa ‘kin, sa pamamagitan ng pagbabahagi ng Salita ng Diyos at sa pananalangin para sa ‘kin. Iyan ang personal na pagsubaybay. Matapos kong tanggapin si Cristo, sinimulan ni Ron ang pagdidisipulo sa ‘kin. Isinali niya ‘ko sa kanyang grupo. Tinuruan niya ‘ko kung paano pag-aralan at isapamuhay ang Bibliya. Tinuruan niya ‘ko kung paano magdasal. Tinuruan niya ‘ko kung paano ibahagi ang aking pananampalataya at kung paano subaybayan ang mga disipulo. Iyan ang personal na pagdidisipulo. Personal na pagsubaybay at pagdidisipulo. Iyan ang Dakilang Komisyon. Tungkol dito ang munting aklat na ito. Ang ONE 2 ONE ay isinulat upang magamit sa personal na pagsubaybay at pagdidisipulo. Ito ay isang gabay. Hindi ito makagagawa ng mga disipulo subalit makatutulong ito sa ‘yo sa pagsubaybay mo sa mga disipulo ni Cristo. At ang pinakamahalaga sa lahat, makatutulong ito upang ang isang bagong disipulo ay magkaroon ng tamang simula. (Salin mula sa akdang panimula ni Steve Murrell para sa ONE 2 ONE noong 1996 sa Manila, Philippines)

PAGHAHANDA SA PAGSISIMULA

Sinabi ni Jesus sa kanila, "Sumunod kayo sa akin at gagawin ko kayong mangingisda ng mga tao." Marcos 1:17 Ang anim na hakbang na ito ang magsisilbing gabay mo sa tamang SIMULA sa pagsunod kay Jesu-Cristo. Simulang magtiwala kay Jesus lamang para sa iyong kaligtasan at hindi sa iyong sarili at mabubuting gawa. Dahil sa biyaya ng Diyos, naligtas kayo nang sumampalataya kayo kay Cristo. Kaloob ito ng Diyos, at hindi galing sa inyo. 9Hindi ito nakasalalay sa mabubuti ninyong gawa, para walang maipagmalaki ang sinuman. Mga Taga Efeso 2:8,9 Iwaksi ang lahat ng sinasabi sa Bibliya na kasalanan. Ganoon pa man, mananatiling matibay ang saligang itinatag ng Diyos at may nakasulat na "Alam ng Panginoon kung sino ang sa kanya," at "Dapat lumayo sa kasamaan ang bawat taong nagsasabi na siya’y sa Panginoon." 2 Timoteo 2:19 Makibahagi sa lingguhang pagsamba. Huwag nating pababayaan ang mga pagtitipon natin gaya ng nakaugalian na ng ilan. Sa halip, palakasin natin ang loob ng bawat isa, lalo na ngayong nalalapit na ang huling araw. Hebreo 10:25 Ugaliin ang pagdalo sa isang maliit na grupo na linggu-linggong nagtitipon para sa pag-aaral ng Bibliya at pagdidisipulo. Ituro mo rin sa mga mapagkakatiwalaang tao, na makakapagturo rin sa iba, ang mga aral na narinig mo sa akin sa harapan ng maraming saksi. 2 Timoteo 2:2 Laging maging handang ibahagi sa iba ang nagawa ni Cristo para sa iyo. Alalahanin n’yo na si Cristo ang dapat ninyong parangalan at sundin. Dapat lagi kayong handang magpaliwanag sa kanino mang magtatanong sa inyo tungkol sa pag-asa n’yo. 1 Pedro 3:15 Araw-arawin ang pagbabasa ng Bibliya at sundin ang mga nakasulat dito. Huwag mong kalimutang basahin ang Aklat ng Kautusan. Pagbulay-bulayan mo ito araw at gabi para malaman mo kung paano mo matutupad ang lahat ng nakasulat dito. Kung gagawin mo ito, uunlad ka at magtatagumpay. Josue 1:8

KALIGTASAN

ISANG BAGONG SIMULA Ang sinumang na kay Cristo ay isa nang bagong nilalang. Wala na ang dati niyang pagkatao; binago na siya. 2 Corinto 5:17 Isang bagong nilalang. Isang bagong simula. Para sa ating lahat na humihiling ng pagkakataon na makapagsimulang muli, ito ay isang magandang balita. Subalit, bago natin tuluyang ikatuwa ang magandang balitang ito, dapat nating lubusang maintindihan kung bakit natin kailangan ng panibagong simula. Bakit natin kailangang maging isang "bagong nilalang?" Bakit natin kailangan ang kaligtasan? ANG SULIRANIN:Pagkahiwalay Dahil sa Ating Kasalanan May isang hindi masusukat na pagitan na naghihiwalay sa Diyos at tao. Ang dahilan ng walang hanggang pagkakahiwalay na ito ay ang mga kasalanan ng tao. Naramdaman mo na ba na parang malayo ka sa Diyos? Lahat tayo ay nakaranas nito. Ito ay pangkaraniwan lamang. Marami sa mga nakaramdam nito ay nag-akala na kung sila ay mag-iisip lamang ng mabuti, mag-aaral ng husto ng kanilang relihiyon, o kaya ay mapapadaan sa isang lugar ng pagsamba, sila ay mapapalapit na sa Diyos. Subalit dahil sa ang pagkakawalay natin sa Diyos ay hindi pisikal o intelektuwal, ang pag-iisip o pag-iipon ng karunungan ay hindi magagawang ilapit tayo sa Diyos. Ano ang dahilan ng pagkakahiwalay ng Diyos at ng tao? Makinig kayo! Ang Panginoon ay hindi mahina para hindi makapagligtas. Hindi rin siya bingi para hindi makarinig kapag tumawag kayo sa kanya. Ang inyong mga kasalanan ang siyang naglayo sa inyo sa Diyos at iyon ang dahilan kung bakit niya kayo tinalikuran at ayaw nang makinig sa inyong mga dalangin. Isaias 59:1,2 Ang pagkakalayo ng Diyos at tao ay isang moral at di lamang pisikal na pagkakahiwalay. Ang Diyos ay banal; ang tao ay hindi. Ang Diyos ay mabuti; ang tao ay hindi. Ang Diyos ay makatarungan; ang tao ay hindi. Ang lahat ng tao ay nagkasala; samakatuwid, ang lahat ay nalalayo sa Diyos. Pagdurusahan ng lahat ang bunga ng kasalanan—ang kamatayang walang hanggan. Sapagkat ang lahat ay nagkasala at hindi naging karapat-dapat sa paningin ng Diyos. Mga Taga-Roma 3:23 Sapagkat ang kabayaran ng kasalanan ay kamatayan, ngunit ang kaloob ng Diyos ay buhay na walang hanggan sa pamamagitan ni Cristo Jesus na ating Panginoon. Mga Taga-Roma 6:23 ANG SOLUSYON: Ang Sakripisyo at Paghalili ng Diyos Ang pagkamakatarungan ng Diyos ay humihingi ng sakripisyo para sa kasalanan ng tao. Si Jesu-Cristo ang naging sakripisyong ito at nagbayad sa krus ng kaparusahan para sa ating mga kasalanan. Dahil sa ang Diyos ay banal, matuwid, at makatarungan, hindi Niya maaaring pabayaan na mawalan ng kaparusahan ang kasalanan. Ngunit dahil Siya rin ay mapagmahal at maawain, hindi Niya nais na walang hanggang mawalay sa Kanya ang sanlibutan. Ang tugon dito ng Diyos ay ang pagsasakripisyo ni Jesus, ang Kanyang bugtong na anak, para sa ating kasalanan. Dahil kung kailangang ulit-ulitin, maraming beses sanang nagdusa si Cristo mula pa nang likhain ang mundo. Pero minsan lamang siya naparito sa mundo para alisin ang mga kasalanan natin sa pamamagitan ng paghahandog ng kanyang sarili. Ginawa niya ito nitong mga huling araw. Itinakda sa mga tao ang mamatay nang minsan at pagkatapos nito’y ang paghuhukom ng Diyos. Ganoon din naman, minsan lang namatay si Cristo nang inihandog niya ang kanyang sarili para alisin ang kasalanan ng mga tao. At muli siyang babalik dito sa mundo, hindi na para akuing muli ang kasalanan ng mga tao, kundi para iligtas ang mga taong naghihintay sa kanya. Hebreo 9:26-28 Ano ba talaga ang nangyari sa krus? Sa pamamagitan ng Kanyang kamatayan sa krus, inako ni Jesus ang kaparusahan na dapat ay tayo ang makatanggap. Ipinagpalit Niya ang Kanyang kabanalan sa ating kasalanan. Inako Niya ang sumpang dapat nating tanggapin at binigyan tayo ng mga pagpapala bilang kapalit. Dahil sa Siya ay hindi nagkasala, si Jesus lamang ang maaaring makapagbayad ng kasalanan at maging tulay sa pagitan ng Diyos at ng tao. Kailanma’y hindi nagkasala si Cristo, ngunit alang-alang sa atin, itinuring siyang makasalanan para sa pamamagitan niya’y maituring tayong matuwid ng Diyos. 2 Corinto 5:21 Ngunit hindi natin masunod ang lahat ng iniuutos ng Kautusan, kaya sinumpa tayo ng Diyos. Pero ngayon, tinubos na tayo ni Cristo sa sumpang ito. Sinumpa siya alang-alang sa atin, dahil sinasabi sa Kasulatan, "Isinusumpa ang sinumang binibitay sa puno." Mga Taga-Galacia 3:13 ANG RESULTA: Ang Ating Kaligtasan at Pakikipagkasundo Namatay si Cristo sa krus upang tayo ay makatanggap ng kapatawaran para sa ating mga kasalanan, magkaroon ng mabuting relasyon sa Diyos, at makaranas ng buhay na walang hanggan. Lahat tayo’y nagkasala laban sa isang banal at matuwid na Diyos. Ang kabayaran para sa kasalanan ay walang hanggang pagkawalay sa Diyos sa pamamagitan ng pananatili sa impiyerno. Dahil ang Diyos ay makatarungan, kailangan Niyang parusahan ang kasalanan. Subalit dahil sa Siya ay mapagmahal, hindi Niya nais na magdusa ng walang hanggan sa impiyerno ang mga tao. Dahil dito, ipinadala Niya si Jesu-Cristo upang pagbayaran ang kaparusahan para sa ating mga kasalanan. Dahil sa Siya ay hindi kailanman nagkasala, walang kapangyarihan sa Kanya ang kasalanan. Siya ay nabuhay muli sa ikatlong araw. Kay Cristo, tayo ay maibabalik sa tamang katayuan sa harap ng Diyos, at mabibigyan ng bagong buhay bilang Kanyang mga anak. "Sapagkat ganito ang pag-ibig ng Diyos sa mga tao sa sanlibutan: Ibinigay niya ang kanyang kaisa-isang Anak, upang ang sinumang sumasampalataya sa kanya ay hindi mapahamak kundi magkaroon ng buhay na walang hanggang." Juan 3:16 Sa pamamagitan ng dugo ni Cristo, tinubos tayo, na ang ibig sabihin ay pinatawad ang mga kasalanan natin. Napakalaki ng biyayang ipinagkaloob sa atin ng Diyos. Mga Taga-Efeso 1:7 Ngunit kayo ngayon ay na kay Cristo na. Kahit na malayo kayo noon sa Diyos, ngayon, malapit na kayo sa kanya sa pamamagitan ng dugo ni Cristo. Mga Taga-Efeso 2:14 ANG TUGON: Tanggapin ang Kaloob ng Diyos sa Pamamagitan ng Pananampalataya Matatanggap natin ang kaligtasan kung tayo ay magtitiwala Kay Cristo at sa Kanyang mga ginawa at hindi sa ating mga sarili. Ang ating kaligtasan ay bunga ng kabutihan ng Diyos. Ito ay dahil sa ginawa ni Jesus sa krus para sa atin. Hindi ito batay sa kung ano man ang nagawa natin para sa Kanya. Hindi natin magagawang iligtas ang ating mga sarili o kaya ay makuha ang pagsang-ayon ng Diyos sa pamamagitan ng mabubuting gawa. Tayo ay maliligtas kung mauunawaan natin na kailangan natin ng Tagapagligtas, tatalikuran natin ang kasalanan, at tatanggapin natin si Jesus bilang Panginoon at Tagapagligtas. Sa Kanya lang natin dapat ipagkatiwala ang ating kaligtasan. http://...na kung ipapahayag mo na si Jesus ay Panginoon at sasampalataya ka ng buong puso na muli siyang binuhay ng Diyos, maliligtas ka. Sapagkat itinuring na matuwid ng Diyos ang taong sumasampalataya sa kanya nang buong puso. At kung ipapahayag niya na siya ay sumampalataya, maliligtas siya. Mga Taga-Roma 10:9,10 Dahil sa biyaya ng Diyos, naligtas kayo nang sumampalataya kayo kay Cristo. Kaloob ito ng Diyos, at hindi galing sa inyo. Hindi ito nakasalalay sa mabubuti ninyong gawa, para walang maipagmalaki ang sinuman. Mga Taga-Efeso 2:8,9 PERSONAL NA PAGSASAPAMUHAY Sinimulan mo na bang ipagkatiwala ang iyong kaligtasan kay Cristo lamang at hindi sa iyong sarili? Tinalikuran mo na ba ang lahat ng alam mong kasalanan? Inihayag mo na ba si Jesus na Panginoon ng iyong buhay? Handa ka na bang sumunod kay Jesus at sundin Siya habang ikaw ay nabubuhay? PANALANGIN PARA SA KALIGTASAN Ama sa langit kinikilala ko na ang pagkakahiwalay ko sa Iyo ay dahil sa aking mga kasalanan. Inihahayag ko na ako ay nagkasala at nagkulang sa pamantayan ng Iyong kaluwalhatian. Nagpapasalamat ako sa pagpapadala mo ng Iyong anak na si Jesus upang pagbayaran ang kaparusahan ng aking mga kasalanan. Naniniwala ako na Siya ay namatay para sa akin sa krus. Naniniwala ako na Siya ay nabuhay muli. Ako ay nagsisisi sa aking mga kasalanan at hinihingi ko ang kapatawaran ng aking mga kasalanan. Gusto kong talikuran ang lahat ng tinatawag ng Bibliya na kasalanan at tanggapin si Jesus bilang aking Panginoon at Tagapagligtas. Tulungan mo akong magmahal, magsilbi, at sumunod sa Iyo habang ako ay nabubuhay . . . Amen! ISANG BAGONG BUHAY Kung taos puso mong idinalangin ang panalangin na ito, ipinapangako ng Bibliya na ikaw ay isa nang bagong nilalang. Ang susunod na anim na aralin ay tungkol sa iba pang mga nagbago sa buhay mo ngayong ikaw ay bago nang nilalang.