PAGDIDISIPULO

ISANG BAGONG MISYON

Alalahanin ninyo na si Cristo ang dapat ninyong parangalan at sundin. Dapat lagi kayong handang magpaliwanag sa sinumang magtatanong sa inyo tungkol sa pag-asa ninyo.
1 Pedro 3:15

Nang sumasakay na si Jesus sa bangka, nakiusap sa kanya ang lalaking gumaling na isama siya. Pero hindi pumayag si Jesus. Sa halip, sinabi niya sa lalaki, “Umuwi ka sa pamilya mo at sabihin mo sa kanila ang lahat ng ginawa sa iyo ng Panginoon at kung paano ka niya kinaawaan.
Marcos 5:18,19

Kung ikaw ay isang doktor na nakagawa ng gamot para sa sakit na kanser, hindi mo ba nanaising ipaalam sa lahat ang iyong nagawa? Hawak mo ngayon ang gamot para sa isang bagay na mas malubha pa sa sakit na kanser.

Hawak mo ang solusyon para sa kasalanan. Ang pagtuturo sa mga tao kung paano sumunod kay Jesus ay nagsisimula sa pababahagi ng mabuting balita tungkol sa solusyon ng Diyos para sa kasalanan sa iyong pamilya at mga kaibigan.

Upang maging handa na gawin ito, kailangan nating matutunan kung paano ibahagi ang ating patotoo at ang ebanghelyo. Sa ating paggawa nito, tayo ay makatutulong sa mga tao kung paano maging tagasunod ni Jesus.

PAANO MAGBAHAGI NG IYONG PATOTOO
Sa isang korte, ang isang saksi ay nagsasabi ng “katotohanan, at pawang katotohanan lamang,” tungkol sa kanyang mga nakita, narinig, at naranasan.

Tayo ay tinawag upang maging mga saksi ng Diyos. Dapat nating ibahagi ang katotohanang ginawa Niya para sa atin at sa pamamagitan natin.

Ang pagiging isang saksi ay nangangahulugan na dapat tayong mamuhay sa paraang magpapakita ng kabutihan ng Diyos sa ating mga buhay.

Ang pagiging saksi ay tumutukoy sa kung sino tayo at hindi kung ano ang ginagawa natin. Dapat tayong “maging” mga saksi.

Ang tanging paraan upang tayo ay maging mga saksi ay sa pamamagitan ng kapangyarihan ng Banal na Espiritu, na Siyang nagbibigay sa atin ng kakayahan na ipahayag ang ating patotoo at maging ang ebanghelyo.
Ang iyong patotoo ay mahalaga. Ito ay isang personal at hindi matututulang salaysay ng mga ginawa ni Jesus para sa iyo at mga paraan kung paano ka Niya binago.

May tatlong bahagi ang iyong patotoo, na dapat mong matutunang sabihin sa loob ng dalawang minuto:

1. Magbigay ng maikling paglalarawan ng iyong buhay bago mo nakilala si Cristo.
2. Ipaliwanag kung paano ka nakarating sa punto ng pagsuko ng iyong buhay kay Cristo.
3. Malugod mong ilarawan ang iyong buhay ngayong si Jesus na ang iyong Panginoon. Bigyan ng mas mahabang oras ang pagpapaliwanag ng mga pagbabagong nangyari sa iyo simula ng isuko mo ang iyong buhay kay Cristo.

Ngunit natalo na siya ng ating mga kapatid sa pamamagitan ng dugo ng Tupa at ng katotohanang ipinangangaral nila. Hindi sila takot na ialay ang kanilang buhay alang-alang sa kanilang pananampalataya.
Pahayag 12:11

PAANO MAGBAHAGI NG MAGANDANG BALITA
Ang ebanghelyo ay ang kapangyarihan ng Diyos na nagdadala ng kaligtasan sa lahat ng mananampalataya. Ito ang dahilan kung bakit tayo nagpupunta sa iba’t-ibang kultura at komunidad, nagiging mga saksi, at nagbabahagi ng ating mga patotoo.

Hindi ko ikinakahiya ang Magandang Balita tungkol kay Cristo, dahil ito ang kapangyarihan ng Diyos sa ikaliligtas ng lahat ng sumasampalataya—una ang mga Judio at gayon din ang mga hindi Judio.
Mga Taga-Roma 1:16

Ibahagi ang ebanghelyo sa iyong pamilya at mga kaibigan gamit ang dalawang talata mula sa Bibliya.

Sapagkat ang lahat ay nagkasala at hindi naging karapat-dapat sa paningin ng Diyos.
Mga Taga-Roma 3:23

Ang lahat ay nagkasala. Ang kasalanan ay bunga ng hindi pagsunod o kaya ay pagmamatigas laban sa Diyos. Sa katunayan, walang sinumang tao ang ganap na nakasunod sa lahat ng ipinag-utos ng Diyos.

Sapagkat ang kabayaran ng kasalanan ay kamatayan, ngunit ang kaloob ng Diyos ay buhay na walang hanggan sa pamamagitan ni Cristo Jesus na ating Panginoon.
Mga Taga-Roma 6:23

Dahil sa lahat tayo ay nagkasala, lahat tayo’y dapat makatanggap ng kamatayan at mawalay sa piling ng Diyos. Ang magandang balita ay ibinigay ng Diyos ang kaligtasan bilang isang libreng regalo!

Ang kaligtasang ito ay makakamit sa pamamagitan ni Cristo lamang,dahil Siya y namatay sa krus para sa atin. Matatanggap natin ang regalong ito ng Diyos sa pamamagitan ng pananampalataya sa ginawa ni Jesus sa krus.

PAANO GUMAWA NG MGA DISIPULO
Tayo ay gumagawa ng mga disipulo habang ipinapakilala natin si Jesus sa mga tao at tinuturuan silang sumunod sa mga kautusan ng Diyos.

Sinabi ni Pablo kay Timoteo na dapat niyang ipasa ang lahat ng kanyang natutunan sa iba pang tao na siya namang magpapasa ng mga ito sa mas marami pang tao. Ito ang pagdidisipulo.

“Kaya puntahan ninyo ang lahat ng mga lahi at gawin silang mga tagasunod ko. Bautismuhan ninyo sila sa pangalan ng Ama at ng Anak at ng Banal na Espiritu. Turuan ninyo silang sumunod sa lahat ng iniutos ko sa inyo. At tandaan ninyo: lagi ninyo akong kasama hanggang sa katapusan ng mundo.”
Mateo 28:19,20

Ituro mo rin sa mga mapagkakatiwalaang tao, na makakapagturo rin sa iba, ang mga aral na narinig mo sa akin sa harapan ng maraming saksi.
2 Timoteo 2:2

PERSONAL NA PAGSASABUHAY
Ang buhay mo ba ay isang saksi para sa Diyos?
Ibahagi ang iyong patotoo sa taong kasama mo ngayon, sa loob lamang ng dalawang minuto.
Ipanalangin ang iyong pamilya at mga kaibigan na hindi pa nakarinig ng ebanghelyo. Hingin sa Diyos na bigyan ka ng mga pagkakataon na maibahagi ang Magandang Balita sa kanila.
Humayo ka at gumawa ng mga disipulo!

TAMANG SIMULA

TAMANG SIMULA Noong 1974-1979, isang aktibong Presbyterian na pastor ng mga kabataan, na ang pangalan ay Ron, ang nagpunta sa mga mataas na paaralan ng Jackson Mississippi. Isa na doon ang paaralan kung saan ako nag-aaral. Sa mga lugar na ito, buong tapang na inihayag ni Ron ang ebanghelyo sa lahat ng nais makinig, at maging sa mga ayaw makinig sa kanya. Sa paglipas ng panahon, hindi mabilang na dami ng kabataan ang sa unang pagkakataon ay nakarinig at nakaunawa ng plano ng Diyos na kaligtasan. Daan-daan ang nanilbihan sa Panginoon bilang mga misyonaryo, pastor, o kaya ay youth ministers. Isa ako sa mga kabataang iyon. Subalit, ang naging tugon ko noong una ay hindi ang magsisi sa aking mga kasalanan, kundi ang tumakbo palayo. Tinakbuhan ko si Ron, ang kanyang mga tagasunod, at ang Diyos. Tinakbuhan ko sila ng mga anim na buwan. Naging mahirap para sa akin na gawin ito dahil nakikita ko si Ron kung saan-saan. Nanonood siya ng lahat ng laro ng football at basketball. Nakikita ko siya sa mga koridor ng paaralan, sa cafeteria, at maging sa paradahan ng mga sasakyan. Siya at ang kanyang grupo ng mga tagasunod ay lagi akong inaanyayahang dumalo ng kanilang retreat, Bible study, prayer meeting, o kaya ay mga pagtitipon ng mga kabataan sa kanilang simbahan. Sa wakas, noong Nobyembre ng taong 1975, tinanggap ko ang mensahe ng ebanghelyo. Nagsisi ako sa aking mga kasalanan at nanampalataya ako kay Cristo. Mabuti na lamang at hindi dito nagwakas ang lahat. Hindi sapat kay Ron na makita lamang ang mga kabataan na nagsusuko ng kanilang buhay kay Cristo. Gusto niyang sila’y maging mga disipulo ni Jesus. Isinama niya ako sa kanyang kilalang “action groups,”kung saan linggu-linggong nagtitipon ang mga walong katao. Dito, inaral namin kung paano mamuhay para sa Diyos. Dahil dito, naniniwala ako sa sistemang “one-to-one,”o personal na pagbabahagi ng ebanghelyo, pagsubaybay, at pagdidisipulo. Si Ron ang nagbahagi ng ebanghelyo sa akin, tinakbuhan ko sya. Hinabol niya ‘ko. Sa loob ng anim na buwan, hindi siya tumigil sa paghabol sa ‘kin, sa pamamagitan ng pagbabahagi ng Salita ng Diyos at sa pananalangin para sa ‘kin. Iyan ang personal na pagsubaybay. Matapos kong tanggapin si Cristo, sinimulan ni Ron ang pagdidisipulo sa ‘kin. Isinali niya ‘ko sa kanyang grupo. Tinuruan niya ‘ko kung paano pag-aralan at isapamuhay ang Bibliya. Tinuruan niya ‘ko kung paano magdasal. Tinuruan niya ‘ko kung paano ibahagi ang aking pananampalataya at kung paano subaybayan ang mga disipulo. Iyan ang personal na pagdidisipulo. Personal na pagsubaybay at pagdidisipulo. Iyan ang Dakilang Komisyon. Tungkol dito ang munting aklat na ito. Ang ONE 2 ONE ay isinulat upang magamit sa personal na pagsubaybay at pagdidisipulo. Ito ay isang gabay. Hindi ito makagagawa ng mga disipulo subalit makatutulong ito sa ‘yo sa pagsubaybay mo sa mga disipulo ni Cristo. At ang pinakamahalaga sa lahat, makatutulong ito upang ang isang bagong disipulo ay magkaroon ng tamang simula. (Salin mula sa akdang panimula ni Steve Murrell para sa ONE 2 ONE noong 1996 sa Manila, Philippines)

PAGHAHANDA SA PAGSISIMULA

Sinabi ni Jesus sa kanila, "Sumunod kayo sa akin at gagawin ko kayong mangingisda ng mga tao." Marcos 1:17 Ang anim na hakbang na ito ang magsisilbing gabay mo sa tamang SIMULA sa pagsunod kay Jesu-Cristo. Simulang magtiwala kay Jesus lamang para sa iyong kaligtasan at hindi sa iyong sarili at mabubuting gawa. Dahil sa biyaya ng Diyos, naligtas kayo nang sumampalataya kayo kay Cristo. Kaloob ito ng Diyos, at hindi galing sa inyo. 9Hindi ito nakasalalay sa mabubuti ninyong gawa, para walang maipagmalaki ang sinuman. Mga Taga Efeso 2:8,9 Iwaksi ang lahat ng sinasabi sa Bibliya na kasalanan. Ganoon pa man, mananatiling matibay ang saligang itinatag ng Diyos at may nakasulat na "Alam ng Panginoon kung sino ang sa kanya," at "Dapat lumayo sa kasamaan ang bawat taong nagsasabi na siya’y sa Panginoon." 2 Timoteo 2:19 Makibahagi sa lingguhang pagsamba. Huwag nating pababayaan ang mga pagtitipon natin gaya ng nakaugalian na ng ilan. Sa halip, palakasin natin ang loob ng bawat isa, lalo na ngayong nalalapit na ang huling araw. Hebreo 10:25 Ugaliin ang pagdalo sa isang maliit na grupo na linggu-linggong nagtitipon para sa pag-aaral ng Bibliya at pagdidisipulo. Ituro mo rin sa mga mapagkakatiwalaang tao, na makakapagturo rin sa iba, ang mga aral na narinig mo sa akin sa harapan ng maraming saksi. 2 Timoteo 2:2 Laging maging handang ibahagi sa iba ang nagawa ni Cristo para sa iyo. Alalahanin n’yo na si Cristo ang dapat ninyong parangalan at sundin. Dapat lagi kayong handang magpaliwanag sa kanino mang magtatanong sa inyo tungkol sa pag-asa n’yo. 1 Pedro 3:15 Araw-arawin ang pagbabasa ng Bibliya at sundin ang mga nakasulat dito. Huwag mong kalimutang basahin ang Aklat ng Kautusan. Pagbulay-bulayan mo ito araw at gabi para malaman mo kung paano mo matutupad ang lahat ng nakasulat dito. Kung gagawin mo ito, uunlad ka at magtatagumpay. Josue 1:8

KALIGTASAN

ISANG BAGONG SIMULA Ang sinumang na kay Cristo ay isa nang bagong nilalang. Wala na ang dati niyang pagkatao; binago na siya. 2 Corinto 5:17 Isang bagong nilalang. Isang bagong simula. Para sa ating lahat na humihiling ng pagkakataon na makapagsimulang muli, ito ay isang magandang balita. Subalit, bago natin tuluyang ikatuwa ang magandang balitang ito, dapat nating lubusang maintindihan kung bakit natin kailangan ng panibagong simula. Bakit natin kailangang maging isang "bagong nilalang?" Bakit natin kailangan ang kaligtasan? ANG SULIRANIN:Pagkahiwalay Dahil sa Ating Kasalanan May isang hindi masusukat na pagitan na naghihiwalay sa Diyos at tao. Ang dahilan ng walang hanggang pagkakahiwalay na ito ay ang mga kasalanan ng tao. Naramdaman mo na ba na parang malayo ka sa Diyos? Lahat tayo ay nakaranas nito. Ito ay pangkaraniwan lamang. Marami sa mga nakaramdam nito ay nag-akala na kung sila ay mag-iisip lamang ng mabuti, mag-aaral ng husto ng kanilang relihiyon, o kaya ay mapapadaan sa isang lugar ng pagsamba, sila ay mapapalapit na sa Diyos. Subalit dahil sa ang pagkakawalay natin sa Diyos ay hindi pisikal o intelektuwal, ang pag-iisip o pag-iipon ng karunungan ay hindi magagawang ilapit tayo sa Diyos. Ano ang dahilan ng pagkakahiwalay ng Diyos at ng tao? Makinig kayo! Ang Panginoon ay hindi mahina para hindi makapagligtas. Hindi rin siya bingi para hindi makarinig kapag tumawag kayo sa kanya. Ang inyong mga kasalanan ang siyang naglayo sa inyo sa Diyos at iyon ang dahilan kung bakit niya kayo tinalikuran at ayaw nang makinig sa inyong mga dalangin. Isaias 59:1,2 Ang pagkakalayo ng Diyos at tao ay isang moral at di lamang pisikal na pagkakahiwalay. Ang Diyos ay banal; ang tao ay hindi. Ang Diyos ay mabuti; ang tao ay hindi. Ang Diyos ay makatarungan; ang tao ay hindi. Ang lahat ng tao ay nagkasala; samakatuwid, ang lahat ay nalalayo sa Diyos. Pagdurusahan ng lahat ang bunga ng kasalanan—ang kamatayang walang hanggan. Sapagkat ang lahat ay nagkasala at hindi naging karapat-dapat sa paningin ng Diyos. Mga Taga-Roma 3:23 Sapagkat ang kabayaran ng kasalanan ay kamatayan, ngunit ang kaloob ng Diyos ay buhay na walang hanggan sa pamamagitan ni Cristo Jesus na ating Panginoon. Mga Taga-Roma 6:23 ANG SOLUSYON: Ang Sakripisyo at Paghalili ng Diyos Ang pagkamakatarungan ng Diyos ay humihingi ng sakripisyo para sa kasalanan ng tao. Si Jesu-Cristo ang naging sakripisyong ito at nagbayad sa krus ng kaparusahan para sa ating mga kasalanan. Dahil sa ang Diyos ay banal, matuwid, at makatarungan, hindi Niya maaaring pabayaan na mawalan ng kaparusahan ang kasalanan. Ngunit dahil Siya rin ay mapagmahal at maawain, hindi Niya nais na walang hanggang mawalay sa Kanya ang sanlibutan. Ang tugon dito ng Diyos ay ang pagsasakripisyo ni Jesus, ang Kanyang bugtong na anak, para sa ating kasalanan. Dahil kung kailangang ulit-ulitin, maraming beses sanang nagdusa si Cristo mula pa nang likhain ang mundo. Pero minsan lamang siya naparito sa mundo para alisin ang mga kasalanan natin sa pamamagitan ng paghahandog ng kanyang sarili. Ginawa niya ito nitong mga huling araw. Itinakda sa mga tao ang mamatay nang minsan at pagkatapos nito’y ang paghuhukom ng Diyos. Ganoon din naman, minsan lang namatay si Cristo nang inihandog niya ang kanyang sarili para alisin ang kasalanan ng mga tao. At muli siyang babalik dito sa mundo, hindi na para akuing muli ang kasalanan ng mga tao, kundi para iligtas ang mga taong naghihintay sa kanya. Hebreo 9:26-28 Ano ba talaga ang nangyari sa krus? Sa pamamagitan ng Kanyang kamatayan sa krus, inako ni Jesus ang kaparusahan na dapat ay tayo ang makatanggap. Ipinagpalit Niya ang Kanyang kabanalan sa ating kasalanan. Inako Niya ang sumpang dapat nating tanggapin at binigyan tayo ng mga pagpapala bilang kapalit. Dahil sa Siya ay hindi nagkasala, si Jesus lamang ang maaaring makapagbayad ng kasalanan at maging tulay sa pagitan ng Diyos at ng tao. Kailanma’y hindi nagkasala si Cristo, ngunit alang-alang sa atin, itinuring siyang makasalanan para sa pamamagitan niya’y maituring tayong matuwid ng Diyos. 2 Corinto 5:21 Ngunit hindi natin masunod ang lahat ng iniuutos ng Kautusan, kaya sinumpa tayo ng Diyos. Pero ngayon, tinubos na tayo ni Cristo sa sumpang ito. Sinumpa siya alang-alang sa atin, dahil sinasabi sa Kasulatan, "Isinusumpa ang sinumang binibitay sa puno." Mga Taga-Galacia 3:13 ANG RESULTA: Ang Ating Kaligtasan at Pakikipagkasundo Namatay si Cristo sa krus upang tayo ay makatanggap ng kapatawaran para sa ating mga kasalanan, magkaroon ng mabuting relasyon sa Diyos, at makaranas ng buhay na walang hanggan. Lahat tayo’y nagkasala laban sa isang banal at matuwid na Diyos. Ang kabayaran para sa kasalanan ay walang hanggang pagkawalay sa Diyos sa pamamagitan ng pananatili sa impiyerno. Dahil ang Diyos ay makatarungan, kailangan Niyang parusahan ang kasalanan. Subalit dahil sa Siya ay mapagmahal, hindi Niya nais na magdusa ng walang hanggan sa impiyerno ang mga tao. Dahil dito, ipinadala Niya si Jesu-Cristo upang pagbayaran ang kaparusahan para sa ating mga kasalanan. Dahil sa Siya ay hindi kailanman nagkasala, walang kapangyarihan sa Kanya ang kasalanan. Siya ay nabuhay muli sa ikatlong araw. Kay Cristo, tayo ay maibabalik sa tamang katayuan sa harap ng Diyos, at mabibigyan ng bagong buhay bilang Kanyang mga anak. "Sapagkat ganito ang pag-ibig ng Diyos sa mga tao sa sanlibutan: Ibinigay niya ang kanyang kaisa-isang Anak, upang ang sinumang sumasampalataya sa kanya ay hindi mapahamak kundi magkaroon ng buhay na walang hanggang." Juan 3:16 Sa pamamagitan ng dugo ni Cristo, tinubos tayo, na ang ibig sabihin ay pinatawad ang mga kasalanan natin. Napakalaki ng biyayang ipinagkaloob sa atin ng Diyos. Mga Taga-Efeso 1:7 Ngunit kayo ngayon ay na kay Cristo na. Kahit na malayo kayo noon sa Diyos, ngayon, malapit na kayo sa kanya sa pamamagitan ng dugo ni Cristo. Mga Taga-Efeso 2:14 ANG TUGON: Tanggapin ang Kaloob ng Diyos sa Pamamagitan ng Pananampalataya Matatanggap natin ang kaligtasan kung tayo ay magtitiwala Kay Cristo at sa Kanyang mga ginawa at hindi sa ating mga sarili. Ang ating kaligtasan ay bunga ng kabutihan ng Diyos. Ito ay dahil sa ginawa ni Jesus sa krus para sa atin. Hindi ito batay sa kung ano man ang nagawa natin para sa Kanya. Hindi natin magagawang iligtas ang ating mga sarili o kaya ay makuha ang pagsang-ayon ng Diyos sa pamamagitan ng mabubuting gawa. Tayo ay maliligtas kung mauunawaan natin na kailangan natin ng Tagapagligtas, tatalikuran natin ang kasalanan, at tatanggapin natin si Jesus bilang Panginoon at Tagapagligtas. Sa Kanya lang natin dapat ipagkatiwala ang ating kaligtasan. http://...na kung ipapahayag mo na si Jesus ay Panginoon at sasampalataya ka ng buong puso na muli siyang binuhay ng Diyos, maliligtas ka. Sapagkat itinuring na matuwid ng Diyos ang taong sumasampalataya sa kanya nang buong puso. At kung ipapahayag niya na siya ay sumampalataya, maliligtas siya. Mga Taga-Roma 10:9,10 Dahil sa biyaya ng Diyos, naligtas kayo nang sumampalataya kayo kay Cristo. Kaloob ito ng Diyos, at hindi galing sa inyo. Hindi ito nakasalalay sa mabubuti ninyong gawa, para walang maipagmalaki ang sinuman. Mga Taga-Efeso 2:8,9 PERSONAL NA PAGSASAPAMUHAY Sinimulan mo na bang ipagkatiwala ang iyong kaligtasan kay Cristo lamang at hindi sa iyong sarili? Tinalikuran mo na ba ang lahat ng alam mong kasalanan? Inihayag mo na ba si Jesus na Panginoon ng iyong buhay? Handa ka na bang sumunod kay Jesus at sundin Siya habang ikaw ay nabubuhay? PANALANGIN PARA SA KALIGTASAN Ama sa langit kinikilala ko na ang pagkakahiwalay ko sa Iyo ay dahil sa aking mga kasalanan. Inihahayag ko na ako ay nagkasala at nagkulang sa pamantayan ng Iyong kaluwalhatian. Nagpapasalamat ako sa pagpapadala mo ng Iyong anak na si Jesus upang pagbayaran ang kaparusahan ng aking mga kasalanan. Naniniwala ako na Siya ay namatay para sa akin sa krus. Naniniwala ako na Siya ay nabuhay muli. Ako ay nagsisisi sa aking mga kasalanan at hinihingi ko ang kapatawaran ng aking mga kasalanan. Gusto kong talikuran ang lahat ng tinatawag ng Bibliya na kasalanan at tanggapin si Jesus bilang aking Panginoon at Tagapagligtas. Tulungan mo akong magmahal, magsilbi, at sumunod sa Iyo habang ako ay nabubuhay . . . Amen! ISANG BAGONG BUHAY Kung taos puso mong idinalangin ang panalangin na ito, ipinapangako ng Bibliya na ikaw ay isa nang bagong nilalang. Ang susunod na anim na aralin ay tungkol sa iba pang mga nagbago sa buhay mo ngayong ikaw ay bago nang nilalang.