Daily Bread

April 25, 2024 • Pastor David Lah • 2 Kings 4:1–7

             ဘုရားသခင်သည်ကောင်းမြတ်တော်မူ၍ ဂရုဏာတော်သည် အစဥ်အမြဲတည်သောကြောင့် ဂုဏ်ကျေးဇူးတော်ကို ချီးမွမ်းပါတယ်။ ဘုရားသခင်သည် အင်မတန်မှ ကောင်းမြတ်တော်မူသော ဘုရားရှင်ဖြစ်ပါတယ်။ ယနေ့မှာလည်း နှုတ်ကပတ်‌တော် ဝေငှခွင့်ပေးတဲ့ ဘုရားရှင်ရဲ့ကျေးဇူးတော်ကို ချီးမွမ်းပါတယ်။                 ယေရမိမြည်တမ်း စကားထဲမှာ ဘုရားသခင်သည် ကောင်းမြတ်တော်မူ၍ ဂရုဏာတော်သည် မကုန်သောကြောင့် ငါတို့သည် ဆုံးရှုံးခြင်းသို့ မရောက်ပဲ နေကြ၏။ နံနက်တိုင်း ဂရုဏာအသစ်ကို ခံစားရ၏။ သစ္စာတော်သည် ကြီးမြတ်ပါ၏။ ငါ့ဝိညာဥ်၏ သဘောမူကား ထာဝရဘုရားသည် ငါ့အဖို့ဖြစ်တော်မူ၏။ ထို့ကြောင့် ကိုယ်တော့်ကို ငါမျှော်လင့်ပါ၏။ ကိုယ်တော့်ကို မျှော်လင့်သောသူနှင့် ကိုယ်တော့်ကို ရှာသောသူ၏ စိတ်ဝိညာဥ်ကို ထာဝရဘုရားသည် ကျေးဇူးပြုတော်မူ၏။ ကယ်တင်တော်မူမည်ဟု မျှော်လင့်လျက် ငြိမ်ဝပ်စွာ စောင့်လျက် နေကောင်း၏။ လို့ နှုတ်ကပတ်တော်ရှိတယ်။ ဘုရားရှင်က အံ့သြဖွယ်အမှုတွေကို ပြုတဲ့ ဘုရားရှင်ဖြစ်တယ်။ အင်မတန်မှ ကောင်းမြတ်တဲ့ဘုရားရှင်ဖြစ်တယ်။                ဒီအချိန်ဒီကာလက သမ္မာတရားကို ပိုင်းခြားနားလည်ဖို့ သိပ်လိုအပ်နေတဲ့အချိန်ကာလဖြစ်တယ်။ ဒီကနေ့ ဘုရားသခင်က ဘာစကားပြောနေပြီလဲ? ဘာတွေ ပြင်ဆင်ခိုင်းနေပြီလဲ? ဘာတွေလုပ်စေချင်လဲ ဆိုတာ နှုတ်ကပတ်တော်နဲ့ ကျွန်တော်တို့ လေ့လာသွားကြရအောင်ပါ။  “ပရောဖက်အမျိုးသား၏ မယားတယောက် သည် ဧလိရှဲထံသို့လာ၍၊ ကိုယ်တော်ကျွန်၊ ကျွန်မ၏ ခင်ပွန်းသေပါပြီ၊ ကိုယ်တော်ကျွန်သည် ထာဝရဘုရားကို ရိုသေသောသူဖြစ်သည်ကို ကိုယ်တော်သိတော်မူ၏။ ယခုမှာ ကြွေးရှင်သည် ကျွန်မ၏သားနှစ်ယောက်ကို ကျွန်ခံစေခြင်းငှါ လာပါပြီဟု ကြွေးကြော်လေ၏။ဧလိရှဲကလည်း၊ သင့်အဘို့အဘယ်သို့ ငါပြုရ မည်နည်း။ သင့်အိမ်၌ အဘယ်ဥစ္စာရှိသနည်းဟု မေးလျှင်၊ ကိုယ်တော်ကျွန်မအိမ်၌ ဆီအိုးတလုံးမှတပါး အဘယ်ဥစ္စာမျှ မရှိပါဟု ပြောဆိုသော်၊ဧလိရှဲက သွားလော့။ အိမ်နီးချင်းရှိသမျှတို့တွင် လပ်သောအိုးတို့ကို ငှါးယူလော့။ များစွာသော အိုးတို့ကို ငှားယူလော့။ကိုယ်အိမ်သို့ ရောက်သောအခါ၊ သားတို့ကို ခေါ်၍ တံခါးကို ပိတ်ပြီးမှ ငှါးယူသော အိုးများအထဲသို့ ဆီကို အပြည့်လောင်း၍ ထားလော့ ဟုစီရင်သည်အတိုင်း၊ထိုမိန်းမသည် သွား၍သားတို့သည် အိုးများကို ယူခဲ့ပြီးမှ၊ မိန်းမသည် သားတို့နှင့်အတူ အိမ်ထဲသို့ဝင်၍ တံခါးကိုပိတ်လျက် ဆီကို လောင်းလေ၏။အိုးများ၌ ဆီပြည့်သောအခါ၊ အိုးတလုံးကို ယူခဲ့ဦးဟုသားအားဆိုလျှင်၊ အိုးလပ်မရှိပါဟု ပြန်ပြောသော်၊ ဆီသည် တန့်လျက် နေ၏။ထိုမိန်းမသည်လာ၍ ဘုရားသခင်၏ လူကို ကြားပြောလျှင်၊ သူက ထိုဆီကိုသွား၍ ရောင်းပြီးလျှင် ကြွေးကို ဆပ်လော့။ ကြွင်းသောဆီကို အမှီပြု၍ သင်နှင့် သားတို့သည် အသက်မွေးကြလော့ဟု ဆို၏။”  (၄ရာ 4: 1-7) (၄ရာ 4: 1-7) အထိဖတ်သွားတဲ့အခါမှာ ပရောဖက်အမျိူးသားရဲ့ မိန်းမက ယောက်ျားလဲသေပြီး ကျန်တဲ့ သားနှစ်ယောက်ကို လဲ ကြွေးရှင်က သူ့ဆီမှာ ကျွန်အဖြစ်သိမ်းအုံးမယ် ဆိုတော့ မိခင်တစ်ယောက် အနေနဲ့ သားတွေကို ကျွန်အဖြစ် မရောက်စေချင်ဘူး။ အဲ့ဒီအခါ ဧလိရှဲဆီလာတယ်။ ဧလိရှဲဆိုတာက ဘုရားလူဖြစ်တယ်။ ဧလိရှဲက မုဆိုးမကို သင့်အိမ်မှာ ဘာရှိသလဲလို့မေးတဲ့အခါ ဆီအိုးတစ်လုံးကလွဲပြီး ဘာမှ မရှိဘူးလို့ မုဆိုးမက ပြန်ဖြေတယ်။ ဒီနေရာမှာ ကျွန်တော့်ကို ဘုရားရှင်ဖွင့်ပြတဲ့ အရာကတော့ အခုခေတ်ကာလ မျိူးဆက်သစ်တွေကို စာတန်က လောကရဲ့ကျွန် အသွေးအသားရဲ့ကျွန် မာရ်နတ်ရဲ့ကျွန်ဖြစ်စေချင်နေတယ်။ သိမ်းပိုက်ဖို့ ကြံစည်တယ်။ ဆွဲချဖို့ ကြံစည်တယ်။ နလန်မထူနိုင်အောင် ကြံစည်နေတာ ဖြစ်တယ်။                                အဲ့ဒီအထဲကနေ လွတ်မြောက်ဖို့ရန်အတွက် ဧလိရှဲက သူမအိမ်မှာ ဘာရှိသလဲလို့ မေးတဲ့အခါမှာ လွတ်နေတဲ့ ဆီအိုး တစ်လုံးကလွဲပြီး ဘာမှမရှိပါဘူးလို့ မုဆိုးမက ဧလိရှဲကို ပြန်ဖြေခဲ့တယ်။ အိမ်တော်ဆိုတာ အသင်းတော်ကို ပြောနေတာဖြစ်တယ်။ ဘုရားသခင်ရဲ့အိမ်တော်မှာ ဆီရှိရဲ့လား? နောက်ဆုံးသောအချိန်ကာလမှာ ယုံကြည်သူ အသင်းတော်တွေ သန့်ရှင်းသော ဝိညာဥ်တော်ကို တကယ်နေရာပေးပြီး ဦးစားပေးတတ်တဲ့ အသင်းတော် ဖြစ်ရဲ့လား? သန့်ရှင်းသော ဝိညာဥ်တော်ဆိုတဲ့ ဆီနဲ့ပြည့်တဲ့ အသင်းတော်ဖြစ်ရဲ့လား? ရိုးရာထုံးတမ်းအစဥ်အလာထဲမှာပဲ ရှိနေတဲ့ အသင်းတော်ဖြစ်နေလား? ပုံမှန်ဝတ်ပြုကိုးကွယ်ခြင်းပဲ လုပ်ပြီး သန့်ရှင်းသောဝိညာဥ်တော်ရဲ့ ဦးဆောင်လမ်းပြခြင်း မရှိပဲနဲ့ အနာဂတ်အတွက် မျိူးဆက်သစ်တွေကို သင်ဘယ်လိုမှ မကယ်တင်နိုင်ဘူး။ အိမ်ဆိုတဲ့ သင်တို့စုဝေးနေတဲ့ အသင်းတော်မှာ တကယ်ပဲ သန့်ရှင်းသောဝိညာဥ်တော်ဆိုတဲ့ ဆီနဲ့ပြည့်နေတဲ့ အသင်းတော်ြဖစ်ပြီလား? နောက်ဆုံးသောကာလမှာ ကြွေးရှင်ဆိုတဲ့ မာရ်နတ်က လာပြီး သိမ်းပိုက်ဖို့ ဖျက်ဆီးဖို့ ကြံစည်လိမ့်မယ်။                    အသင်းတော်တွေမှာ သန့်ရှင်းသောဝိညာဥ်တော်နဲ့ ပြည့်ဖို့ ဘုရားအလိုတော်ရှိတယ်။ ဝိညာဥ်တော် တကယ်ဦးဆောင် လမ်းပြတဲ့ အသင်းတော်ဖြစ်ဖို့အတွက် လိုအပ်နေပြီ။ နောက်ဆုံးသောကာလမှာ စာတန်က မျိူးဆက်သစ် တွေကို သူ့ရဲ့ကျွန်အဖြစ် သိမ်းပိုက်ဖို့ ကြံစည်နေပြီ။ သင့်အိမ်မှာ ဆီအိုးရှိနေလား? ဆီဆိုတာ ဘုရားရဲ့ဘိသိက် သန့်ရှင်းသောဝိညာဥ်တော် ဘုရားရဲ့တန်ခိုး ကိုပြောနေတာဖြစ်တယ်။ ဘိသိက်နဲ့ အလုပ်လုပ်တဲ့ အသင်းတော်တွေ ဖြစ်စေချင်ပြီ။                 နောက်ဆုံးသောကာလ အချိန်မှာ ကျွန်တော်တို့ရဲ့ အစွမ်းအစတွေ ကျွန်တော်တို့ရဲ့အစီအစဥ်တွေ ကျွန်တော်တို့ရဲ့ အတွေးအခေါ်တွေနဲ့ ဘာတစ်ခုမှ လုပ်လို့ မရတော့ဘူး ညီအစ်ကို မောင်နှမတို့။ ဘုရားသခင်က သန့်ရှင်းသောဝိညာဥ်တော်ရဲ့ တန်ခိုးနဲ့ အသင်းတော်ကို လုပ်ဆောင်စေချင်နေပြီ။ ဘုရားဘက်က သန့်ရှင်းသောဝိညာဥ်တော်ဆိုတဲ့ ဆီနဲ့ ဖြည့်ပေးဖို့ အဆင်သင့်ရှိနေတယ်။ လောကမှာ ကြောက်စရာဆိုတဲ့အရာတွေအားလုံးကို ဘုရားသခင်ဆီက ဘိသိက်တန်ခိုးနဲ့ ကျော်ဖြတ်ခွင့် ရတဲ့အခါ ကြောက်စရာဘာမှ မရှိတော့ဘူးဖြစ်တယ်။ ကျွန်တ်ောတို့ကို ဆီဖြည့်ပေးချင်တဲ့ဘုရားဖြစ်တယ်။ ဆီက ပြဿနာ မဟုတ်ဘူး။ အဓီက ကတော့ ဆီထည့်ဖို့အတွက် အိုးက အလွတ်ရှိနေရဲ့လား? အိုးအလွတ်ဖြစ်နေရဲ့လား? ဘုရားသခင်က သူ့အကြံအစည်တွေကို သင့်အထဲမှာ ပြည့်စေချင်ပေမယ့် အိုးအလွတ်ရှိရဲ့လား?                     ဒီကျမ်းပိုဒ်မှာ ရရှိလာတဲ့အိုးတွေမှာ ဆီဖြည့်ပြီးတဲ့နောက် ထပ်ဖြည့်ဖို့အတွက် နောက်ထပ်အိုးတစ်လုံးကို သားဆီမှာတောင်းတဲ့အခါ အိုးအလွတ်မရှိတော့ဘူးလို့ သားကဖြေတာနဲ့ ဆီက ရပ်သွားတာကို တွေ့ရတယ်။ ဒီနေရာမှာ ဘုရားသခင်က အရည်အချင်းရှိတဲ့သူကို အသုံးပြုချင်တာထက် ဘုရားသခင်အတွက် အမြဲတမ်း အချိန်အဆင်သင့် ရှိနေပါတယ်ဆိုတဲ့ availity မဟုတ်ပဲ  available ဖြစ်နေတဲ့သူကို ဘုရားသခင်က အလိုရှိတာဖြစ်တယ်။ အိုးအလွတ်အနေနဲ့ ဘုရားသဘောအတိုင်း ပုံသွင်းခံတဲ့ အသက်တာဖြစ်ဖို့ ဘုရားရှင် အလိုရှိတယ်။ မယ်တော်မာရိက ဘုရားရဲ့အလိုတော်ကို ဝန်ခံလိုက်တဲ့အခါမှာ ပဋိသန္ဓေ တည်ဖို့အကြောင်းဖြစ်လာတယ်။ မယ်တော်မာရိအထဲမှာ ဘာဖြစ်လို့ ဘုရားသခင်ရဲ့အလိုကို ပြည့်စုံစေနိုင်တာလဲဆိုတော့ မယ်တော်မာရိက ဘုရားသခင်အတွက် အဆင်သင့်ရှိနေသောကြောင့်ပဲဖြစ်တယ်။                         ဘုရားသခင်က ကျွန်တော်တို့ကို တန်ခိုးပါတဲ့စိတ် ချစ်တတ်တဲ့စိတ် ရှင်းလင်းတဲ့စိတ် ထည့်ပေးချင်တယ်။ အရေးကြီးတာက ကျွန်တော်တို့က ဘုရားပေးတဲ့အရာတွေ လက်ခံနိုင်ဖို့ အသင့်ဖြစ်ရဲ့လား? လောကအရာတွေနဲ့ ပဲ အသက်တာကို ဖြည့်ထားတာလား? ကိုယ်တော့်အလိုတော်က ကောင်းကင်ဘုံမှာ ပြည့်စုံသလို ကျွန်တော့်အသက်တာထဲမှာလဲ ပြည့်စုံပါစေလို့ ပြောနိုင်တဲ့အသက်တာ ဖြစ်ဖို့လိုတယ်။ ဂျူးလူမျိူးတွေက သူတို့ထုံးစံမှာ သူတို့သေရင်ထားဖို့ သူတို့မြေ ဆိုတာကို ဝယ်ရတယ်။ ယေရှုခရစ်တော်က တော့ ဘာတစ်ခုဝယ်မသွားခဲ့ဘူး၊ ဒီလောကကြီးက ငါနဲ့မဆိုင်တဲ့အတွက် အကုန် သူငှားသွားခဲ့တယ်။ ထူးဆန်းတာ တစ်ခုကတော့ ကျွန်တော်တို့တွေကို သူ့ရဲ့အသွေးတော်နဲ့ ဝယ်သွားခဲ့ပါတယ်။ အဲဒီ ရွေးဝယ်ထားခြင်းခံရတဲ့ သူရဲ့အသက်တာထဲမှာ သူ့ဆီနဲ့ ပြည့်စေချင်တယ်။ သူ့ဆီကို ဖြည့်ပေးချင်တယ်။ ဘာဖြစ်လို့ ဖြည့်ပေးချင်တာလဲ? နောက်ဆုံးသောကာလမှာ ကျွန်တော်တို့ကို ကြီးမားစွာ အသုံးပြုချင်တယ်။ လာမယ့် မျိူးဆက်သစ်တွေကို ကယ်တင်ဖို့ရန်အတွက် ကျွန်တော်တို့ကို ဘုရားက အလိုရှိတာဖြစ်တယ်။                           မာရ်နတ်က ခိုးမယ် သတ်မယ် ဖျက်ဆီးမယ် ။ လူငယ်တွေကို စာတန်က ပျက်ဆီးအောင်လုပ်မယ့် အချိန်မှာ မျိူးဆက်သစ်လူငယ်တွေကို ကူညီဖို့ရန်အတွက် ဘုရားသခင် အလိုရှိနေတာ အိုးအလွတ် လပ်သောအိုး ဖြစ်တယ်။ ဘုရားသခင်ကို ကျွန်တော် အသုံးပြုခံဖို့ အဆင်သင့်ရှိပါတယ်။ ကျွန်တော့်ကို သခင့်ရဲ့ဆီနဲ့ ဖြည့်ပေးပါ။ ကျွန်တော့်ကို သခင့်ရဲ့တန်ခိုးနဲ့ ဖြည့်ပေးပါ။ ကျွန်တော့်ကို သခင့်ရဲ့ချစ်ခြင်းတွေနဲ့ လွှမ်းခြုံပါ။ လို့ ဝန်ခံသောသူကို ဘုရားက စောင့်နေပါတယ်။ သင့်ရဲ့အသက်တာနဲ့ ဘုရားက အလုပ်လုပ်ချင်ပါတယ်။ သင်ကရော ဘုရားသခင်အတွက် အဆင်သင့်ရှိနေတဲ့ အိုးအလွတ် ဖြစ်ပြီလား?                          ဘယ်အရာတွေက သင့်ရဲ့အသက်တာကို အုပ်စိုးနေလဲ? ဘယ်အရာတွေက နေရာယူထားလဲ? သင့်ဘာသာသင် ကြိုးစားဖယ်ရှားလို့မရပါဘူး။ ကိုယ်တော်ထံက လာတဲ့ ဘိသိက် နဲ့အလုပ်လုပ်နိုင်ဖို့ ကိုယ်တော်ဖြည့်ပေးမယ့် ဆီကို လိုအပ်ပါတယ်လို့ သင်ဝန်ခံပါ။ သန့်ရှင်းသောဝိညာဥ်တော်ဆိုတဲ့ ဆီမပါပဲနဲ့ ဝိညာဥ်တွေ လွတ်မြောက်အောင် သင်မလုပ်နိုင်ဘူး၊ ဘယ်သူမှ မလွတ်မြောက်နိုင်ဘူး။ ဆီအိုးမရှိပါလို့ ပြောတဲ့အချိန်မှာ ဆီက ရပ်သွားခဲ့တယ်။ လောကအရာတွေရှိနေတဲ့ သင့်ကို လောကအရာတွေဆွဲထုတ်ပေးဖို့ ဘုရားကို ‌တောင်းပါ။ ဘုရားသခင်ရဲ့ မစခြင်းကို တောင်းခံပါ။ သန့်ရှင်းသောဝိညာဥ်တော်ရဲ့ ကူမခြင်းကို ခံယူပါ။ ကျွန်တော်တို့ အထဲမှာရှိနေတဲ့ လောကရဲ့ပူလောင်ခြင်းတွေကို ဖယ်ရှားပေးပြီး အိုးအလွတ်ဖြစ်ဖို့ ဘုရားသခင်ဆီမှာ တောင်းခံပါ။ ဘုရားအလိုတော် ပြည့်စုံစေဖို့ သင်အဆင်သင့်ဖြစ်ပါပြီလို့ ဘုရားကို ဝန်ခံနိုင်ဖို့ ဘုရားသခင်ဆီမှာ အကူအညီတောင်းပါ။                     တံခါးကိုပိတ်ပြီးမှ ငှားယူသောအိုးများအထဲသို့ ဆီကို အပြည့်လောင်း၍ လို့ပြောထားတာ တံခါးဆိုတာ လောကအရာတွေကို ပြောနေတာဖြစ်ပါတယ်။ သင့် အိုးထဲကိုဆီဖြည့်နိုင်ဖို့အတွက်က သင်လောကအရာတွေ အားလုံးကို ဖြတ်တောက်ပစ်ဖို့ သတိပေးနေပြီဖြစ်တယ်။ သင့်အသက်တာအတွက် ဆီထည့်ပေးမှာက ဘုရားဘက်က လုပ်ပေးမယ့်အရာဖြစ်တယ်။ သင်လုပ်ရာမှာက သင့်မှာအိုးအလွတ်ဖြစ်နေဖို့ ပဲဖြစ်တယ်။ ကျမ်းစာထဲမှာ ဆီဖြည့်ပြီးတဲ့နောက် ပြည့်သွားတဲ့ ဆီများအားဖြင့် မုဆိုးမရဲ့သားတွေ ကျွန်အဖြစ်က လွတ်မြောက်ခွင့်ရခဲ့သလို သင့်အသက်တာမှာလဲ အဲ့ဒီဆီအားဖြင့် လွတ်မြောက်ရတဲ့အခွင့်ကို ဘုရားရှင်ပေးလိမ့်မယ်။                    အဲ့ဒီဆီကို ရရှိနိုင်ဖို့က သင့်အသက်တာကို ပြုပြင်ခြင်း သွန်သင်ခြင်းတော့ သင်ခံရပါလိမ်မယ်။ သံလွင်ဆီနဲ့ ဥပမာ ပေးရရင် သံလွင်ဆီဆိုတာ သိပ်တန်ဖိုးရှိပါတယ်။ သံလွင်ဆီဖြစ်လာဖို့ သံလွင်သီးကို ကြိတ်ပစ်လိုက်ရသလို သင့်အသက်တာထဲမှာ ဘုရားသခင်က အလုပ်လုပ်နိုင်ဖို့က သင့်အသက်တာကို အကြိတ်ခံနိုင်ရမှာဖြစ်တယ်။ မုဆိုးမအိမ်မှာ အဖြည့်ခံရတဲ့ ဆီအားဖြင့် သူမရဲ့သားတွေ ကျွန်အဖြစ်က လွတ်မြောက်ခွင့် ရခဲ့သလို ဆီဆိုတဲ့ သန့်ရှင်းသော ဝိညာဥ်တော်အားဖြင့် သင့်အသက်တာကို အသုံးပြုပြီး မျိူးဆက်သစ်တွေ သင့်အားဖြင့် စာတန် လက်မှ လွတ်မြောက်ပါစေ။                     အသက်တာကို အိုးအလွတ်ကဲ့သို့ ဖြစ်စေခြင်းဖြင့် ဘုရားသခင်အတွက် အဆင်သင့်ရှိနေသောသူများ ဖြစ်ကြပါစေ။ အယောက်စီတိုင်းကို ဘုရားသခင် အသုံးပြုချီးမြှောက်ပါစေ။                                                                                                                                  

ယဇ် - Sacrifice | Sya Judson

April 24, 2024 • Sya Judson

ယဇ် - Sacrifice | Sya Judson #dmi #dmimorningdevotion

Daily Bread

April 24, 2024 • Pastor David Lah • Deuteronomy 11:14, Jeremiah 5:23–24, John 2:24, Joel 2:24, Acts 2:15–18

              ဒီကနေ့မှာ ကျွန်တော်ဝေငှချင်တဲ့ အကြောင်းအရာလေးက ရိတ်သိမ်းခြင်းဆိုတာ ဖြစ်ပါတယ်။ ရိတ်သိမ်းရာကာလမှာ မရိတ်သိမ်းသောသူက ဘုရားသခင်ဘုန်းကို ရှုတ်ချသူဖြစ်တယ်။ ကျမ်းစာထဲမှာတော့ ရိတ်သိမ်းခြင်းဆိုတာ မိုး နဲ့ အမြဲတမ်း တွဲနေပါတယ်။ မိုးတောင်မှ ရိုးရိုးတန်းတန်းမိုး မဟုတ်ပါဘူး။  အရင်မိုးနဲ့ နောက်မိုး လို့ပြောထားတာတွေ့ရတယ်။ အရင်မိုးနဲ့နောက်မိုးပြီးတဲ့အခါမှာ ရိတ်သိမ်းခြင်းကာလ လာတာတွေ့တယ်။ မိုးမရွာပဲနဲ့ ဘယ်တော့မှ ရိတ်သိမ်းခြင်းမရှိပါဘူး။ “သင်တို့သည် စပါး၊ စပျစ်ရည်၊ ဆီတို့ကို စုသိမ်း စေခြင်းငှာ အရင်မိုဃ်း၊ နောက်မိုဃ်း တည်းဟူသော သင်တို့ပြည်နှင့် ဆိုင်သော မိုဃ်းရေကို ငါပေးမည်။” (တရားဟော 11:14) မိုးမရွာရင် မြေက စိုက်ပျိူးနိုင်တဲ့မြေမဖြစ်ဘူး။ ဘယ်လောက်ပဲကြိုးစားစိုက်ပါစေ အသီးအနှံမဖြစ်ထွန်းဘူး။ မင်းတို့တိုင်းပြည်မှာ ကြွယ်ဝစွာ ရိတ်သိမ်းနိုင်ဖို့  မင်းတို့ပြည်နဲ့ဆိုင်တဲ့ မိုးကို ရွာစေမယ်လို့ပြောထားတာဖြစ်တယ်။  အရင်မိုးဆိုတာက မြေကြီးကို စိုစွတ်စေပြီး မြေသားကို နူးညံ့သွားအောင် လုပ်ပေးတယ်။ ပထမမိုးက မြေကြီးကို တူးဆွလို့ ရအောင် မြေသြဇာ ကောင်းကောင်း ထည့်လို့ရတဲ့ မြေဖြစ်ဖို့ ရွာသွန်းစေတာဖြစ်တယ်။ ပြီးတော့ နောက်ရွာလာတဲ့မိုးက အပင်ကို ရေဝအောင် စုပ်ယူနိုင်တဲ့အတွက် အပင်ကြီးထွားအပြီး အသီး သီးဖို့အတွက် ဖြစ်တယ်။ ဒါတွေပြီးတဲ့နောက်မှာ ရိတ်သိမ်းရတော့မှာ ဖြစ်တယ်။ အရင်မိုး နောက်မိုး မရပဲနဲ့ အသီးအနှံကို ရိတ်သိမ်းဖို့ ခက်တယ်ဆိုတာကို ပြောခြင်းဖြစ်ပါတယ်။ “သင်တို့သည် စပါး၊ စပျစ်ရည်၊ ဆီတို့ကို စုသိမ်း စေခြင်းငှာ အရင်မိုဃ်း၊ နောက်မိုဃ်း တည်းဟူသော သင်တို့ပြည်နှင့်ဆိုင်သော မိုဃ်းရေကို ငါပေးမည်။အချိန်တန်မှ အရင်မိုဃ်းနှင့် နောက်မိုဃ်းကို ရွာစေ၍၊ အသီးအနှံသိမ်းမြဲသိမ်းရာ ကာလကို ငါတို့အဘို့ သိုထားတော်မူသော ငါတို့၏ ဘုရားသခင် ထာဝရဘုရား ကို ယခုကြောက်ကြကုန်အံ့ဟု၊ သူတို့သည် စိတ်နှလုံးထဲ၌ မဆိုတတ်ကြ။” (ယေရမိ 5:23-24)                       ဒီကျမ်းစာထဲမှာ အရင်မိုး နဲ့ နောက်မိုးကို ရွာစေနိုင်တဲ့ ဘုရားရှင် ရှိတယ်ဆိုတာ ဒီလူမျိူးတွေ မသိကြဘူး လို့ရေးထားတာတွေ့ရတယ်။ ကောင်းကြီးမင်္ဂလာကို ဖြစ်စေတဲ့ အရင်မိုးနဲ့နောက်မိုးကို ရွာစေပြီး အသီးအနှံတွေကို သိုထားပေးပြီးသား  ဘုရားရှင်ကို တစ်ခုလေးပဲ ငါတို့လုပ်ရမှာ ဝန်ခံတတ်တဲ့ အသက်တာဖြစ်ဖို့ သူတို့စိတ်နှလုံးထဲမှာ မရှိဘူးကွာ တဲ့။ ကျမ်းစာမှာ သတိထားကြည့်ရင် ရိတ်သိမ်းခြင်းရဲ့ အရှေ့မှာ ရွာသွန်းခြင်းက အမြဲပါနေတယ်။ ဘာရွာတာလဲ? အရင်မိုးနဲ့နောက်မိုး အမြဲတမ်း ကပ်ပြီးပါနေတယ်။                         အပင်စိုက်လို့ ရတဲ့မြေဖြစ်ဖို့ ပထမ မြေကြီးပျော့ပြီးနူးညံ့အောင် အရင်မိုးကို ရွာစေတယ်။ ပထမ အရင်မိုး ရွာသွန်းပြီးတဲ့အခါမှာ မျိူးစေ့ကို ချလို့ရပြီဖြစ်တယ်။ အပင်လေးတွေ နည်းနည်း စထွက်ပြီး အညှောင့်ပေါက်လာတဲ့အခါမှာ တားလို့တောင်မရနိုင်တဲ့ နောက်မိုးကိုရွာစေတယ်၊ နောက်မိုးရွာခြင်းက ပေါက်လာတဲ့အပင်တွေကို ကြီးထွားရန်အတွက် အသီးသီးရန်အတွက် ပြင်ဆင်ပေးတာဖြစ်တယ်။ ဘာကို ပုံဆောင်တာလဲ ဆိုတာကို ဒီနေ့နားလည်ဆင်ခြင်စေချင်ပါတယ်။                         “အိုဇိအုန်မြို့သားတို့၊ ဝမ်းမြောက်၍ သင်တို့၏ ဘုရားသခင်ထာဝရဘုရားကို အမှီပြုလျက် ရွှင်လန်း ကြလော့။ အကြောင်းမူကား၊ ဓမ္မဆရာကို ပေးတော်မူ၍ အစအဦး၌လည်း အရင်မိုဃ်းနှင့်နောက်မိုဃ်းကို သင်တို့ အပေါ်မှာ ရွာစေတော်မူမည်။ ကောက်နယ်တလင်းတို့သည် စပါးနှင့်ပြည့်၍၊ အသီးနယ်ရာ ကျင်းတို့၌လည်း စပျစ်ရည်နှင့်ဆီ လျှံကြ လိမ့်မည်။”(ယောလ 2:24) ဒီမှာပြောထားတဲ့ ဓမ္မဆရာဆိုတာ သန့်ရှင်းသောဝိညာဥ်တော်ကို ပြောတာဖြစ်တယ်။ စပါး စပျစ်ရည်နဲ့ ဆီတွေက လျှံထွက်မယ် လို့ပြောထားတာတွေ့ရတယ်။ “ထိုနောက်မှ လူမျိုးတကာတို့ အပေါ်သို့ ငါ၏ ဝိညာဉ်တော်ကို ငါသွန်းလောင်းမည်။ သင်တို့၏ သားသမီးတို့သည် ပရောဖက်ဉာဏ်နှင့် ဟောပြောရကြ လိမ့်မည်။ အသက်ကြီးသောသူတို့သည် နိမိတ်အိပ်မက် တို့ကို မြင်မက်ရကြလိမ့်မည်။ အသက်ငယ်သော သူတို့ သည်လည်း ဗျာဒိတ်ရူပါရုံတို့ကို မြင်ရကြလိမ့်မည်။” (ယောလ 2:24)             ဝိညာဥ်တော်ကို ငါသွန်းလောင်းမည်လို့ ကျမ်းစာထဲမှာ တွေ့ရတယ်။ မိုးရွာသွန်းခြင်းဆိုတာ ဝိညာဥ်တော် သွန်းလောင်းခြင်းကို ပြောနေတာဖြစ်တယ်။ ဝိညာဥ်တော်ရဲ့မစခြင်း ဝိညာဥ်တော်ရဲ့ သွန်းလောင်းခြင်း ဝိညာဥ်တော်ရဲ့ ဖြည့်ဆည်းပေးခြင်း မရှိပဲနဲ့ ဘယ်သူတစ်ဦးတစ်ယောက်ကမှ မပြောင်းလဲနိုင်ဘူး။ ဘယ်သူမှလည်း ရိတ်သိမ်းခြင်း ကာလဆိုတာ ကို ရမှာမဟုတ်ဘူး။                ခုနက ကျွန်တော်ပြောခဲ့ပြီးပြီဖြစ်တယ်။ မိုးရွာခြင်းမရှိရင် ရိတ်သိမ်းခြင်းမရှိဘူး။ ဘာဖြစ်လို့ မိုးရွာရတာလဲဆိုတော့ အပင်စိုက်လို့ရအောင် မျိူးစေ့ကို အဆင်သင့် ဖြစ်နေအောင် ပထမမိုးကရွာသွန်းပေးမယ်။ မိုးရွာပြီးရင် လယ်သမားက သူလုပ်ရမယ့် အရာတွေ သူလုပ်ဆောင်ပြီဖြစ်တယ်။ အပင်လေးတွေ စထွက်လာတဲ့အခါ နောက်မိုးက အပင်ကြီးထွားပြီး အသီးများစွာ သီးဖို့ရန်အတွက် ရွာပေးပြီဖြစ်တယ်။ နောက်မိုးရွာပြီး သိပ်မကြာဘူး သင်က ရိတ်သိမ်းရတော့မယ်။  ဒါကို ရှင်ပေတရုက တမန်တော်ဝတ္ထုမှာ ပြန်ပြောထားတာတွေ့ရတယ်။ “ယခုအချိန်ကားနံနက်တချက်တီးအချိန်သာရှိသည်ဖြစ်၍၊ သင်တို့ထင်သည်အတိုင်း ဤသူတို့သည် ယစ်မူးကြသည်မဟုတ်။ ဤအရာကားပရောဖက်ယောလဟောဘူးသောအရာ ဖြစ်သတည်း။ ဟောဘူးအချက်ကား၊ နောင်ကာလ၌ လူမျိုးတကာတို့အပေါ်သို့ ငါ၏ဝိညာဉ်တော်ကို ငါသွန်းလောင်း မည်။ သင်တို့၏ သားသမီးတို့သည် ပရောဖက်ဥာဏ်နှင့် ဟောပြောရကြလိမ့်မည်။ အသက်ငယ်သောသူတို့သည် ဗျာဒိတ်ရှုပါရုံတို့ကို မြင်ရကြလိမ့်မည်။ အသက်ကြီးသော သူတို့သည်လည်း နိမိတ်အိမ်မက်တို့ကို မြင်ရကြလိမ့်မည်။ ထိုကာလ၌လည်း ငါ၏အမှုကို ဆောင်ရွက်သော ယောက်ျားမိန်းမတို့ အပေါ်သို့ ငါ၏ဝိညာဉ်တော်ကို ငါ သွန်းလောင်း၍၊ သူတို့သည် ပရောဖက်ဥာဏ်နှင့် ဟောပြောရကြလိမ့်မည်။”( တမန်တော်2: 15-18) အဲဒါက ပထမမိုးကိုပြောနေတာဖြစ်တယ်။ ပထမဆုံးတမန်တော်တွေအပေါ်မှာ သန့်ရှင်းသောဝိညာဥ်တော် သွန်းလောင်းတဲ့ အခါမှာ လူသုံးထောင် ပြောင်းလဲခဲ့တယ်။ ဟာလေလုယာ ဘုရားနာမဘုန်းကြီးပါစေ။ အဲ့ဒါက အစဖြစ်တယ်။ နောက်မိုးရွာသွန်းခြင်း ဆိုတာက ၁၉၀၀ ခုနှစ်မှာ Topeka kansas  ဆိုတဲ့မြို့လေးက ကျမ်းစာကျောင်းတစ်ကျောင်းမှာ ကျောင်းလာတက်တဲ့ အမျိူးသမီးလေးက ကျမ်းစာကျောင်းက ဆရာတွေကို ဘာပြောခဲ့လဲဆိုတော့၊ ကျမ်းစာထဲမှာ လက်တင်ပြီးတော့ ဆုတောင်းပေးတဲ့အခါ အနာရောဂါငြိမ်းတာကို တွေ့ရတယ်။ ကျမ်းစာထဲမှာပဲ ရှိတာမျိူး ကျမက မဖြစ်ချင်ဘူး။ ဒါကြောင့် ဆရာတို့ လက်တင်ဆုတောင်းပေးရင် ဖြစ်ကို ဖြစ်ရမယ်လို့ ကျမယုံကြည်တယ်လို့ သူ့ဆရာတွေကို ပြောတဲ့အခါ ဆရာတွေကတော့ မယုံဘူး။ ဒါပေမယ့် သူမက ယုံတယ်။ ဆရာတို့ လက်တင်ဆုတောင်းပေးပါလို့ ပြောတဲ့အခါမှာ ဆရာတွေကလည်း နှုတ်ကပတ်တော်ထဲမှာတော့ ရှိတာပဲဆိုပြီး အားလုံးက လက်တင်ပြီးစဆုတောင်းတဲ့ အချိန်မှာ အဲ့ဒီအမျိူးသမီးလေးဆီမှာ ဝိညာဥ်တော်က ဆင်းသက်ပြီး သူတို့အထဲမှာ ဝိညာဥ်တော်စတင်လှုပ်ရှားလာတယ်။ ဒုတိယမိုးက စတင်လှုပ်ရှားလာတယ်။ ၁၉၀၄ ခုနှစ်မှာတော့ အဇူဇာ နိုးထမှုဆိုတာ စဖြစ်လာတယ်။ အဇူဇာ နိုးထမှုကို စဖြစ်စေခဲ့တဲ့သူက အာဖရိကန်လူမျိူးဖြစ်တယ်။ မက်သဒစ် ကနေလာတာဖြစ်တယ်။ ဒါပေမယ့် သန့်ရှင်းသောဝိညာဥ်တော် ဆင်းသက်လာတဲ့အခါ သန့်ရှင်းသောဝိညာဥ်တော်ရဲ့ လုပ်ဆောင်မှူနောက်ကို သူလိုက်တဲ့အခါ သူ့ဂိုဏ်းဂဏ ကသူ့ကို ထုတ်ပယ်လိုက်တယ်။ ပယ်ခံထိပေမယ့်လဲ သူက အဇူဇာနိုးထမှုပွဲကို လုပ်တဲ့အခါ ကြီးမားသောနိုးထမှုကြီးက ကယ်လီဖိုးနီးယားပြည်နယ် လော့စ်အိန်ဂျလိစ်မှာ စပြီးတော့ဖြစ်ခဲ့တယ်။အဇူဇာနိုးထမှုဖြစ်ခဲ့တဲ့ အဇူဇာလမ်းဆိုတာ အခုထိရှိနေခဲ့တယ်။ အဲ့ဒီကနေ စလိုက်တဲ့အရာကနေ အခုကျွန်တော်တို့ ခေတ်ကို ရောက်ရှိလာပြီဖြစ်တယ်။               ဒါဆိုရင် ကျွန်တော်တို့ခေတ်က ဘာကာလလဲ ? ရိတ်သိမ်းရာ ကာလဖြစ်တယ် ညီအစ်ကိုမောင်နှမတို့။ အဲ့ဒီရိတ်သိမ်းရာ ကာလထဲမှာ သင်ပါဖို့ရန်အတွက်က ရွာသွန်းနေဆဲဖြစ်တဲ့ နောက်မိုးကို ခံယူကြရအောင်။ မိုးရွာသွန်းခြင်း မရှိပဲနဲ့ ဘယ်တော့မှ ရိတ်သိမ်းခြင်း မရှိဘူးဆိုတာ သတိပြုပါ။ ဝိညာဥ်တော်သွန်းလောင်းခြင်းမရှိပဲ ရိတ်သိမ်းခြင်းဆိုတာလဲ မရှိဘူး။ “ထိုကြောင့် ဘုရားသခင်၏ ဝိညာဉ်တော်အားဖြင့် ဟောပြော၍ အဘယ်သူမျှယေရှုကို မကျိန်ဆဲ နိုင်သည်ကို၎င်း၊ ယေရှုသည် သခင်ဘုရား ဖြစ်တော်မူ၏ဟု သန့်ရှင်းသောဝိညာဉ်တော်ကို အမှီမပြုလျှင်၊ အဘယ်သူမျှ မပြောနိုင်သည်ကို၎င်း၊ သင်တို့သည် သိနားလည် စေခြင်းငှါ ငါသတိပေး၏။” (၁ကော 12:3) သန့်ရှင်းသောဝိညာဥ်တော်ကို လက်မခံပဲနဲ့ယေရှုအကြောင်းသင်မပြောပါနဲ့။ သန့်ရှင်းသောဝိညာဥ်‌တော် မစခြင်းမရှိပဲ ဘယ်သူတစ်ဦးတစ်ယောက်မှ ပြောင်းလဲမှာ မဟုတ်ပါဘူး။ အရင်မိုး နောက်မိုး နှစ်ခုလုံးပေါင်းပြီး ရွာသွန်းတဲ့ ဒီအချိန်ကာလပြီးရင် ရိတ်သိမ်းခြင်းကာလက လာပြီဖြစ်တယ်။ရိတ်သိမ်းခြင်းကာလ ပြီးသွားတဲ့အခါမှာ ချီဆောင်ခြင်းကာလက လာတော့မှာဖြစ်တယ်။ “ထိုကြောင့်၊ ညီအစ်ကိုတို့၊ သခင်ဘုရားကြွလာတော်မူသည်တိုင်အောင် သည်းခံလျက် စောင့်နေကြ လော့။ အကယ်၍လယ်လုပ်သော သူသည်အရင်မိုဃ်း၊ နောက်မိုဃ်းကိုရသည်တိုင်အောင်၊ အဘိုးထိုက်သော မြေအသီးကို သည်းခံလျက် စောင့်နေ၍ မြော်လင့်တတ်၏။ သင်တို့သည်လည်း သည်းခံလျက်စောင့် နေကြလော့။ ကိုယ်စိတ် နှလုံးကိုမြဲမြံစေကြလော့။ သခင်ဘုရား ကြွလာတော်မူသောအချိန်ရောက်လုနီးပြီ။” (ယာကုပ် 5:7-8)                  သခင်ဘုရားကြွလာတော်မူခြင်း အကြောင်းနဲ့ မိုးရွာခြင်းနဲ့ ရိတ်သိမ်းခြင်းအကြောင်းကို ‌ရောပြီးတော့ ဒီမှာ ဘာပါလာလဲ ဆိုတဲ့အခါမှာ အရင်မိုးနောက်မိုးပြီးသွားရင် လယ်သမားက များစွာသောအသီးကို ရိတ်သိမ်းရတော့မယ်လို့ မျှော်လင့်သကဲ့သို့ တဲ့ ကျွန်တော်တို့အသက်တာမှာလဲ ရိတ်သိမ်းရာကာလပြီးရင် ယေရှုခရစ်တော်လာတော့မှာမို့ ဒီအရာလေးကို မီးမောင်းထိုးပြနေခြင်းဖြစ်တယ်။ ဧဝံဂေလိ တရားကို ဟောပြောတဲ့အခါကျရင် သန့်ရှင်းသောဝိညာဥ်တော် ပါရမယ်။ “လူမျိုးအပေါင်းတို့အား သက်သေဖြစ်မည်အကြောင်း နိုင်ငံတော်နှင့်ယှဉ်သော ဧဝံဂေလိတရားကို လောကီနိုင်ငံ အရပ်ရပ် ရှိသမျှတို့၌ ဟောရလိမ့်မည်။ သို့ပြီးမှ အဆုံးသည်ဖြစ်လတံ့။” (မဿဲ 24:14)                 သန့်ရှင်းသောဝိညာဥ်တော်က အလုပ်လုပ်နေဆဲဖြစ်တယ်။ သန့်ရှင်းသောဝိညာဥ်တော်ကို ဆီးတားသူမဖြစ်စေပဲ လက်ခံယူပြီး ဝိညာဥ်တော်ရဲ့ မစခြင်းတန်ခိုးနဲ့ ရိတ်သိမ်းခြင်းထဲမှာ ကျွန်တော်တို့ကို ကြီးမားစွာ အသုံးပြုပြီး လူပေါင်း မြောက်များစွာကို သင့်ရဲ့အသက်တာအားဖြင့် ပြောင်းလဲသွားစေလိမ့်မယ်။ “အသီးသီးသောအချိန်၌ သိမ်းယူသောသူသည် ပညာရှိသောသား ဖြစ်၏။ စပါးရိတ်ရာကာလ၌ အိပ် တတ်သောသူမူကား၊ အရှက်ခွဲတတ်သောသားဖြစ်၏။” (သုတ္တံ 10:5)               ရိတ်သိမ်းရာကာလမှာ မိမိကိုယ်မိမိဘုရားထံ ပြန်လည်ဆက်ကပ်အပ်နှံပါ။ ရိတ်သိမ်းရာကာလမှာ အိပ်နေသူက ဘုရားဘုန်းကိုရှုတ်ချသူဖြစ်တယ်။ သန့်ရှင်းသောဝိညာဥ်တော်ရဲ့ သွန်းလောင်းခြင်းကို သင်တကယ်ခံယူပြီး အသက်ရှင်မယ် ဆိုရင် သင်က အားကြီးသောလူမျိူးဖြစ်ပြီး သင့်အားဖြင့် လူပေါင်းမြောက်များစွာ ပြောင်းလဲမှာဖြစ်ပါတယ်။ အယောက်စီတိုင်းကို သခင်ယေရှုနာမ၌ ဆု‌တောင်းကောင်းကြီးပေးလိုက်ပါတယ်။

DMI Wednesday Bible Study | 24 Apr 2024

April 24, 2024

ယဇ် - Sacrifice | Pastor Seng Awng

April 23, 2024 • Pastor Seng Awng

ယဇ် - Sacrifice | Pastor Seng Awng #dmi #dmimorningdevotion

Daily Bread

April 23, 2024 • Pastor David Lah • Psalm 103:1–5, Hebrews 12:18–24, Genesis 4:9–10, 1 Peter 1:18–19, Romans 5:16–18

                 အားလုံးမင်္ဂလာပါ။ ဒီကနေ့ ဘုရားသခင်ထံမှ ငြိမ်သက်ခြင်း ဝမ်းမြောက်ခြင်း ပျော်ရွှင်ခြင်း အောင်မြင်ခြင်း ဘုန်းတော်ထင်ရှားခြင်း တို့သည် သင်နှင့်တကွ သင့်မိသားစု အ‌ယောက်စီတိုင်းအပေါ် သက်ရောက်ပါစေလို့ ယေရှု ခရစ်တော်နာမ၌ ဆုတောင်း ကောင်းကြီးပေးပါတယ်။ နေ့ရက်အစဥ်တိုင်းမှာ ဘုရားရှင်ရဲ့ နှုတ်ကပတ်တော်ကို ဆင်ခြင်ခွင့်ပေးတဲ့ ဘုရားနာမ ဘုန်းကြီးပါစေ။ ဒီကနေ့မှာ ယေရှုခရစ်တော်အားဖြင့် ဘုရားသခင်ပြင်ဆင်ပေးတဲ့ ကောင်းကြီးမင်္ဂလာတွေအတွက် ဆင်ခြင်ကြဖို့ ကျွန်တော်ဝေငှသွားချင်ပါတယ်။ “အို ငါ့ဝိညာဉ်၊ ထာဝရဘုရားကို ကောင်းကြီးပေး လော့။ ငါ၏ အထဲမှာ ရှိသမျှတို့၊ သန့်ရှင်းသော နာမတော် ကို ကောင်းကြီးပေးကြလော့။အို ငါ့ဝိညာဉ်၊ ထာဝရဘုရားကို ကောင်းကြီး ပေးလော့။ ကျေးဇူးတော်အပေါင်းကို မမေ့လျော့နှင့်။ သင်၏အပြစ်အလုံးစုံတို့ကို ဖြေလွှတ်၍၊ သင်၏ အနာရောဂါရှိသမျှတို့ကိုလည်း ပျောက်စေတော်မူ၏။ “ (ဆာလံ 103:1-3)                   ဆာလံဆရာက ဘာဖြစ်လို့ ထာဝရဘုရားကို ကောင်းကြီးပေးတာလဲ? ကျေးဇူးတော်အပေါင်းကို မမေ့လျော့နှင့် လို့ပြောထားခဲ့တယ်။ ဘုရားသခင်က ကျွန်တော်တို့ကို ယေရှုခရစ်တော်အားဖြင့် ပြုပေးခဲ့တဲ့ ကျေးဇူးတော်ကို ရေတွက်မယ်ဆိုရင် ရေတွက်လို့ မကုန်နိုင်ပါဘူး။ “သင်၏အသက်ကို ဖျက်ဆီးခြင်းထဲက ရွေး၍ ကျေးဇူးတော်၊ ကရုဏာတော်များနှင့် သင်၏ခေါင်းကို ပတ်ရစ်တော်မူ၏။ သင့်ကို အသက်ကြီးစဉ်၊ ကောင်းသောအရာနှင့် ရောင့်ရဲစေတော်မူသဖြင့်၊ သင်၏အရွယ်သည် ရွှေလင်းတ ၏အရွယ်ကဲ့သို့ ပြုပြင်ခြင်းရှိ၏။” (ဆာလံ103:4-5)                       ကျေးဇူးတော်အပေါင်းကို မမေ့မလျော့နှင့်တဲ့။ ‌ကျေးဇူးတော်ကို သိတဲ့သူပဲ သာ၍ ကျေးဇူးတော်ကို ခံစားရတယ်ဆိုတာ ဒီကနေ့ ညီအစ်ကိုမောင်နှမတွေကို ပြောပြချင်ပါတယ်။ အဲ့ဒီ‌ကျေးဇူးကို နားလည်ဖို့လိုပါတယ်။ ကျေးဇူးတော်ကို သိတဲ့သူက ကျေးဇူးတော်ကို သာ၍ချီးမွမ်းလေလေဖြစ်လာတဲ့အခါ ကျေးဇူးတော်ကို ပိုပြီးခံစားရလာတယ်။ တကယ့်ကို မင်္ဂလာနဲ့ပြည့်နေတာဖြစ်တယ်။ “ထိုမှတပါး၊ သင်တို့သည် လက်နှင့်တွေ့နိုင်သော တောင်သို့၎င်း၊ လောင်သောမီးသို့၎င်း၊ မည်းသော တိမ်တိုက်၊ မှောင်မိုက်၊ မိုဃ်းသက် မုန်တိုင်းသို့၎င်း၊တံပိုးမှုတ်ခြင်းအသံသို့၎င်း၊ နှုတ်ကပတ်တော် အသံသို့၎င်း၊ ရောက်ကြသည်မဟုတ်။ ထိုအသံတော်ကို ကြားသောသူတို့သည်၊ ထပ်၍ မိန့်တော် မမူမည် အကြောင်းတောင်းပန်ကြ၏။အဘယ်ကြောင့်နည်းဟူမူကား တိရိစ္ဆာန်သော်လည်းကောင်း ထိုတောင်ကိုထိမိလျင် ကျောက်ခဲနှင့်ပစ်၍ သေစေဟု ပညတ်တော်မူသံကို လူတို့သည် နား မခံနိုင်ကြ။ ထိုသို့ ထင်ရှားကြသောအရာသည် အလွန်ကြောက်မက်ဘွယ်ဖြစ်၍၊ မောရှေက၊ ငါသည် ကြောက်ရွံ့ တုန်လှုပ်ခြင်းရှိသည်ဟုဆို၏။”(ဟေဗြဲ 12:18-21)              ဒီကျမ်းပိုဒ်ကို ဆင်ခြင်တဲ့အခါ မောရှေတောင်မှ အင်မတန်ကြောက်ရွံ့တုန်လှုပ်ရတယ်။အဲ့ဒီတောင်နားကို ကပ်လို့မရဘူး။ အဲ့ဒီတောင်က သိနတောင်ဖြစ်တယ်။ သိနတောင်ဆိုတာ ပညတ်တရားနဲ့ဆိုင်တယ်။ ပညတ်တရားကို ပုံ‌ဆောင်တယ်။ ဒီကနေ့ ကျွန်တော်တို့က ပညတ်တရားအောက်မှာပဲ ရှိနေရင် ကျိန်ခြင်းအောက်မှာပဲ ရှိနေသေးတယ်။ ပညတ်တရားကို ကုန်စင်အောင် ဘယ်သူမှ မလိုက်လျှောက်နိုင်ဘူး။ ပညတ်တရားဆိုတာက ၂၄နာရီလုံးလုံး စက္ကန့် မိနစ်တိုင်း နာရီတိုင်းမှာ စောင့်ရှောက်ပြီး မချိူးဖောက်ပဲ ကျင့်နိုင်မှ ဖြစ်တယ်။ နေ့ရက်အစဥ်တိုင်းမှာ သင် အိပ်ချိန်ကလွဲပြီး ကျန်တဲ့အချိန်တွေမှာ၊ သွားလာလှုပ်ရှားမှူတွေ လုပ်နေတဲ့အချိန်မှာ သင်ပညတ်တရားကို မချိူးဖောက်ပဲ နေနိုင်လို့လား?                    ဒါဝိတ်မင်းကြီးက နှလုံးသားအကြွင်းမဲ့နဲ့ ဘာလို့ကိုးကွယ်ခိုင်းနေတာလဲ? ဘာလို့ကျေးဇူးတော်ကို ချီးမွမ်းခိုင်းနေတာလဲ? ချီးမွမ်းထိုက်တဲ့ ဘုရားလို့ ဘာလို့ပြောနေတာလဲ? ပညတ်တရားလက်ထက်မှာ လူတွေက မှားလို့မရဘူး၊ မှားတာနဲ့ လဲကျသေတာပဲ။ “သင်တို့သည် ဇိအုန်တောင်သို့၎င်း၊ အသက်ရှင်တော်မူသော ဘုရားသခင်၏ မြို့တော်တည်းဟူသော ကောင်းကင် ယေရုရှလင်မြို့သို့၎င်း၊ အတိုင်းမသိ များစွာသော ကောင်းကင်တမန်တို့၏ စည်းဝေးခြင်းသို့၎င်း၊ ကောင်းကင်စာရင်း၌ ဝင်သော သားဦးတို့၏ အသင်းတော်သို့၎င်း၊ ခပ်သိမ်းသော သူတို့ကို တရားစီရင် တော်မူသော ဘုရားသခင် အထံတော်သို့၎င်း၊ စုံလင်ခြင်းသို့ ရောက်သော သူတော်ကောင်းတို့၏ စိတ်ဝိညာဉ်တို့ ထံသို့၎င်း၊ ပဋိညာဉ်တရားသစ်၏ အာမခံတည်း ဟူသော ယေရှုထံတော်သို့၎င်း၊ အာဗေလ၏ အသွေးပြောဆိုသော အရာထက်သာ၍ မြတ်သော အရာကို ပြောဆိုသော ဖြန်းဆွတ်ခြင်း၏ အသွေးထံသို့၎င်း ရောက်ကြ၏။” (ဟေဗြဲ 12:22-24)                         မောရှေတုန်းက အဲ့ဒီတောင်ကို သွားထိလို့မရဘူး။ တိရိစ္ဆာန်သော်လည်းကောင်း လူသော်လည်းကောင်း အဲ့ဒီတောင်ကို သွားတို့မိတာနဲ့ သေတာပဲ။ ဒါပေမယ့် အခု ပညတ်တရားနဲ့ဆိုင်တဲ့ ပဋိညာဥ်တရားဟောင်းမှာ မရှိတော့ပဲ ပဋိညာဥ် တရားသစ်ကို ယေရှုခရစ်အားဖြင့် အာမခံခဲ့ပြီဖြစ်တယ်။ အဲ့ဒီပဋိညာဥ် တရားထက် သာ၍ထူးမြတ်တာက ဘာလဲဆိုရင် “အာဗေလ၏ အသွေးပြောဆိုသော အရာထက်သာ၍ မြတ်သော အရာကို ပြောဆိုသော ဖြန်းဆွတ်ခြင်း၏ အသွေးထံသို့၎င်း ရောက်ကြ၏။”လို့ ပြောထားတယ်။ ကာဣနက အာဗေလကို သတ်ပြီးဖွက်ထားတယ်။ ဘုရားသခင်က ကာဣနကိုမေးတဲ့အခါ မသိဘူးလို့ ဘုရားကိုလိမ်တယ်။ ဒါပေမယ့် ဘုရားက အာဗေလရဲ့ အသွေးက မြေထဲကနေ သူ့ကိုခေါ်တယ်လို့ပြောခဲ့တယ်။ ဒါဆိုရင် အသွေးက အသက်ဖြစ်တယ် ဆိုတာကို ကျွန်တော်တို့ကို သိစေတယ်။ “ထာဝရဘုရားကလည်း သင့်ညီ အာဗေလသည် အဘယ်မှာရှိသနည်းဟု ကာဣနကို မေးတော်မူလျှင် အကျွန်ုပ်မသိပါ။ အကျွန်ုပ်သည် ညီကို စောင့်ရသော သူဖြစ်ပါသလောဟု လျှောက်ဆို၏။ ဘုရားသခင်ကလည်း၊ သင်သည် အဘယ်သို့ ပြုပြီးသနည်း။ သင်ညီအသွေး၏အသံသည် မြေထဲက ငါ့ကို အော်ဟစ်လျက်ရှိသည်တကား။” (ကမ္ဘာ 4:9-10)          သူ့ညီကိုသတ်လိုက်တဲ့ ကာဣနက ဘုရားကို လိမ်ပေမယ့် အသွေးက စကားပြောတာ ဘုရားကြားခဲ့တယ်။ ကာဣန ဘုရားကိုလိမ်လို့မရခဲ့ဘူး။ ဒါဆိုရင် ဟေဗြဲ 12:24 မှာပြောထားတဲ့ “အာဗေလ၏ အသွေးပြောဆိုသော အရာထက်သာ၍ မြတ်သော အရာ” ဆိုတာ ယေရှုရဲ့အသွေးကို ပြောတာဖြစ်တယ်။ ယေရှုရဲ့အသွေးက ကျွန်တော်တို့အတွက် စကားပြောပေးနေတယ်။ ယေရှုရဲ့အသွေးတော်က ကျွန်တော်တို့အပြစ်ရှိသမျှကို ဆေးကြောတော်မူပြီ။ ယေရှုရဲ့အသွေးတော်က ကျွန်တော်တို့ကို လွတ်မြောက်စေပြီ။ ယေရှုရဲ့အသွေးတော်က ကျွန်တ်ောတို့ကိုဖြူစင်စေခဲ့ပြီ။ ကျွန်တော်တို့ကို အမင်္ဂလာကနေ မင်္ဂလာဖြစ်စေခဲ့ပြီ။ ယေရှုရဲ့အသွေးတော်က ကျွန်တော်တို့ကို ကျန်းမာစေပြီ။ ယေရှုခရစ်တော်ကို မိမိကယ်တင်ပိုင်ရှင်အဖြစ် ယုံကြည်လက်ခံပြီး ယေရှုရဲ့အသွေးတော်အားဖြင့် သင့်ကို အမင်္ဂလာကနေ မင်္ဂလာဖြစ်စေခဲ့ပြီလို့ သင်ဝန်ခံလိုက်တာနဲ့ သင်က ဖြောင့်မတ်သောသူ စင်ကြယ်သောသူ အပြစ်နဲ့ကင်းစင်သောသူ ဖြစ်သွားပြီလို့ ယေရှုရဲ့အသွေးတော်က ကျွန်တော်တို့ကိုယ်စား စကားပြောပေးနေပြီဖြစ်တယ်။ယေရှုရဲ့အသွေးတော်က ကျွန်တော်တို့ကို အာမခံပေးတယ်။ ကျွန်တော်တို့က သာ၍မြတ်သော ပဋိညာဥ် သာ၍မြတ်သော အသွေးနဲ့ ရွေးဝယ်ထားခြင်းခံရသော သူတွေဖြစ်တယ်။ အဲ့ဒီအတွက် ဂုဏ်ယူလိုက်စမ်းပါ။ “မိစဉ်ဘဆက်ကျင်လည်သော အချည်းနှီးကျင့်ကြံပြုမူခြင်းမှ၊ ရွှေငွေအစရှိသော ဖောက်ပြန် ပျက်စီး တတ်သော ဥစ္စာနှင့် သင်တို့ကို ရွေးတော်မူသည်မဟုတ်။အဘယ်အပြစ်မျှမရှိ၊ အညစ်အကြေးနှင့် ကင်းစင်သော သိုးသငယ်ကဲ့သို့သော ခရစ်တော်၏ အသွေး တော်မြတ်နှင့် ရွေးတော်မူသည်ကို သိမှတ်ကြလော့။” (၁ပေ 1:18-19)              ယေရှုရဲ့အသွေးက အာဗေလရဲ့အသွေးထက် အသံပိုကျယ်တယ်။ ယေရှုရဲ့အသွေးက လောကရဲ့ ကျိန်ခြင်းအမင်္ဂလာ ဝဋ်ကြွေး ဝဋ်နာ ကျိန်ခြင်းတွေ အားလုံးကို ပယ်ရှင်းပေးနိုင်တဲ့ အသွေးဖြစ်တယ်။ အဲ့ဒီအသွေးတော်ကို ခိုလှုံသော သူတိုင်းအတွက် မင်္ဂလာဖြစ်ရတဲ့ အခွင့်ကို ပြင်ဆင်ထားပေးတယ်။ “ထိုမှတပါး၊ လူတယောက်ပြစ်မှားသောအရာနှင့် ကျေးဇူးတော်အရာမတူ။ အကြောင်းမူကား၊ တရား စီရင်သောအရာမှာ၊ အပြစ်တခုကြောင့် ဒစ်ခံစေဟု စီရင်၏။ ကျေးဇူးတော်အရာမှာ၊ အပြစ်များလျက်ပင် လွှတ်စေဟုစီရင်၏။ထိုမှတပါး၊ လူတယောက်သည် ပြစ်မှားသောကြောင့်၊ ထိုတယောက်သော သူအားဖြင့် သေခြင်းတရား သည် အစိုးရ၏။ ကျေးဇူးတော်၏ ကြွယ်ဝခြင်းကို၎င်း၊ ဖြောင့်မတ်ရာသို့သွင်းပေးတော်မူခြင်းကို၎င်း ခံရသော သူတို့သည် တယောက်သောသူတည်းဟူသော ယေရှုခရစ် အားဖြင့် အသက်ရှင်လျက်သာ၍ စိုးစံရကြလတံ့။ထိုကြောင့်၊ တယောက်သောသူ၏ပြစ်မှားခြင်းအားဖြင့်၊ လူအပေါင်းတို့သည် အပြစ်စီရင်ခြင်းနှင့် တွေ့ကြုံရကြသည်နည်းတူ၊ တယောက်သောသူ၏ ဖြောင့်မတ်ခြင်းအားဖြင့်၊ လူအပေါင်းတို့သည် အသက်နှင့် ယှဉ်သော ဖြောင့်မတ်ရာသို့ ရောက်ခြင်းအခွင့်ကို ရကြ၏။” (ရောမ 5:16-18)                ဟာလေလုယာ.... ဘုရားရှင်နာမ ဘုန်းကြီးပါစေ။ အသက်ရှင်ပြီး ကယ်တင်ခြင်းရရုံသာမက စိုးစံရတဲ့အခွင့် ကိုပါပေးတယ်။ တစ်ယောက်သောသူ အာဒံရဲ့ နာမခံခြင်း ပြစ်မှားခြင်းကြောင့် လူတွေအားလုံးက အမင်္ဂလာတွေ ဖြစ်သွားခဲ့ရပေမယ့် နောက်ဆုံးအာဒံဖြစ်တဲ့ ယေရှုအားဖြင့် အမင်္ဂလာအားလုံး က မင်္ဂလာပြန်ဖြစ်ရတဲ့အခွင့်ကို ဘုရားရှင်က ပြင်ဆင်ပေးတယ်။ သင့်ကြောင့် သင်က ကောင်းကြီးဖြစ်နေတာ မဟုတ်ဘူး၊ ယေရှုကြောင့်သာ သင်က ကောင်းကြီးဖြစ်နေတာဖြစ်တယ်။               သင်အကောင်းဆုံးအသက်ရှင်လို့ သင်ကောင်းကြီးခံစားနေရတာမဟုတ်ပါဘူး။ ဘုရားသခင်၌ မှန်ကန်စွာ အသက်ရှင်ခြင်း ကောင်းမွန်စွာ အသက်ရှင်ခြင်း ဆိုတဲ့အရာတွေက အရေးကြီးပါတယ်။ ဥပမာ သင်က တစ်စုံတစ်ယောက်ကို ချစ်မိသွားတဲ့အခါမှာ ကိုယ်ချစ်တဲ့သူအတွက် သင်က အကောင်းဆုံးအသက်ရှင်ပေးချင်တာ အကောင်းဆုံး လုပ်ပေးချင်တာ ဖြစ်တယ်။ သင်က ကောင်းကြီးခံစားချင်လို့ အကောင်းဆုံးအသက်ရှင်ပေးနေတာ ဆိုရင်‌တော့ သင်မှားနေပြီဖြစ်တယ်။ သင်ဘုရားကို ချစ်တဲ့စိတ်နဲ့ သင်အကောင်းဆုံးအသက်ရှင်တာပဲ ဖြစ်ရမယ်။ သင်ကောင်းကြီးခံစားရတယ်ဆိုတာလဲ သင့်ကြောင့်ခံစားရတာ လုံးဝမဟုတ်ပါဘူး။ ယေရှုကြောင့် သင်ကောင်းကြီးခံစားရတာ ဖြစ်တယ်။ သင်ဖြောင့်မတ်ခြင်း ရတာလဲ ယေရှုကြောင့်ပဲ ဖြစ်တယ်။ “ငါ၏ဘုရားသခင်သည် ဘုန်းအာနုဘော်၌ စံပယ်တော်မူသော စည်းစိမ်ရှိသည်အတိုင်း၊ သင်တို့အလို ရှိသမျှတို့ကို ယေရှုခရစ်အားဖြင့် ပြည့်စုံစေတော်မူလိမ့် မည်။”(ဖိလိပ္ပိ 4:19)            သင့်အလိုရှိသမျှကို ပြည့်စုံစေမှာ သင်ကောင်းတာတွေ သိပ်လုပ်နိုင်လွန်းလို့ လုံးဝမဟုတ်ဘူး။ ယေရှုခရစ်အားဖြင့် ပြည့်စုံစေတာဖြစ်တယ်။            “ငါတို့သခင် ယေရှုခရစ်အားဖြင့် ငါတို့အား အောင်ခြင်းအခွင့်ကို ပေးတော်မူသော ဘုရားသခင်၏ ကျေးဇူးတော်သည် ကြီးလှစွတကား။” (၁ကော15:57)               သင်အောင်မြင်စွာ အသက်ရှင်နေနိုင်တာလဲ ယေရှုခရစ်တော်အားဖြင့်ပဲဖြစ်တယ်။ ကျေးဇူးတော်ကို ပဲချီးမွမ်းပါ။ “အဘယ်ကြောင့်နည်းဟူမူကား၊ ဘုရားသခင် သည်အပြစ်နှင့် ကင်းစင်သောသူကို ငါတို့အတွက်ကြောင့် အပြစ်ရှိသောသူ ဖြစ်စေတော်မူ၏။ အကြောင်းမူကား၊ ငါတို့သည်ထိုသူအားဖြင့် ဘုရားသခင်ရှေ့တော်၌ ဖြောင့်မတ်သောသူ ဖြစ်မည် အကြောင်းတည်း။”(၂ကော5:21)                 ယေရှုခရစ်တော်အားဖြင့် ဘုရားသခင်ရှေ့မှာ ဖြောင့်မတ်သောသူအဖြစ် ရပ်တည်ခွင့်ရနေတာဖြစ်တယ်။ ဒါဆိုရင် ခရစ်ယာန် အသက်တာက ကျေးဇူးတော်ချီးမွမ်းဖို့ပဲဖြစ်တယ်။ သာ၍မြတ်တဲ့ အသွေးတော်နဲ့ ‌ရွေးဝယ်ထားပြီဖြစ်တဲ့ ကျွန်တော်တို့ အသက်တာမှာ ကျန်းမာခြင်း အောင်မြင်ခြင်း လွတ်မြောက်ခြင်း အရာအားလုံးက ယေရှုကြောင့်ဖြစ်တယ်ဆိုတာ နေ့တိုင်းဝန်ခံပါ။ ကိုယ့်ရဲ့နေရာမှန်ကို နားလည်ပြီး ဘုရားသားဖြစ်ရခြင်းအခွင့်ကို နားလည်ပြီး ဘုရားဘုန်းတော်ထင်ရှားခြင်းနဲ့ အသက်ရှင်တတ်သောသူများ ဖြစ်ကြပါစေလို့ ကျေးဇူးတော် အပေါင်းကိုချီးမွမ်းပြီး ဆု‌တောင်းကောင်းကြီးပေးလိုက်ပါတယ်။

ယဇ် - Sacrifice | Sya Win Min Tun

April 22, 2024 • Sya Win Min Tun

ယဇ် - Sacrifice | Sya Win Min Tun #dmi #dmimorningdevotion

Daily Bread

April 22, 2024 • Pastor David Lah • 1 Peter 1:18–19, Galatians 3:9, Luke

         ရှေးဦးစွာ ဘုရားသခင်ရဲ့ နာမတော်ကို အထူးပဲ ချီးမွမ်းပါတယ်။ ဘုရားသခင်ရဲ့ ကျေးဇူးနဲ့ ဂရုဏာတော်က အစဥ်အမြဲ တည်သောာကြောင့် ဂုဏ်ကျေးဇူးတော်ကို ကျွန်တ်ောတို့ ချီးမွမ်းဖို့ပဲ ဖြစ်တယ်။ အယောက်စီတိုင်းကို သခင်ယေရှုခရစ်တော် နာမ၌ မင်္ဂလာပါလို့ နှုတ်ခွန်းဆက်သပါတယ်။ ဘုရားသခင်ကောင်းမြတ်တယ်ဆိုတာကို ကျွန်တော်တို့ နေ့တိုင်းဝန်ခံကြပါ၊ သင့်ရဲ့နှုတ်ခမ်းအသီးကို ဝစွာစားရတဲ့အဖြစ်ကို ဘုရားသခင် ပြင်ဆင်ပေးလိမ့်မယ်။                   တစ်ခါတစ်လေ ဘုရားသခင်ရဲ့ကောင်းမြတ်ခြင်းအကြောင်းကို ဝန်ခံနေရင်းနဲ့ အဆိုးရွားဆုံး အခြေအနေတွေ ကြုံတွေ့ရတဲ့အခါမှာလည်း ဆက်ပြီးချီးမွမ်းပါ။ စာတန်ရဲ့ လှည့်စားခြင်းကို မခံယူမိပါစေနဲ့။ ထာဝရဘုရားက ကောင်းမြတ်တဲ့ ဘုရားဖြစ်တယ်ဆိုတာကို နေ့တိုင်းဝန်ခံချီးမွမ်းတာကို စာတန်က မခံစားနိုင်တဲ့အခါ သင့်ကို မချီးမွမ်းနိုင်အောင် ပြုလုပ်လာမယ်။ သင်က ဆက်လက် ကြွေးကြော်နေရင် ဆက်ပြီးဝန်ခံနိုင်ရင် မာရ်နတ်က ရှုံးနိမ့်ရလိမ့်မယ်။ အခြေအနေက မကောင်းပေမယ့် ဘုရားကောင်းမြတ်တယ်။ ဘုရားကောင်းမြတ်ခြင်းကို ဝန်ခံနေသူအတွက် အဲဒီအခြေအနေကို ဘုရားရှင်က ပြောင်းပြန်လှန်ပေးလိမ့်မယ်။ နာမတော်သည် ကမ္ဘာအဆက်ဆက် ဘုန်းကြီး၍ မင်္ဂလာရှိပါစေ။ဟာလေလုယာ...                အခြေအနေမကောင်းလို့ သင်က ဘုရားကောင်းမြတ်ကြောင်း သင်ဆက်ပြီးမဝန်ခံနိုင်ရင် သင့်ဆီကို ကောင်းကြီးမင်္ဂလာတွေ စီးဆင်းဖို့ ခက်ပါလိမ့်မယ်။ ကျွန်တော်တို့ အသက်တာထဲမှာ နှစ်ပေါင်းများစွာ မသိခဲ့လို့ ရှုံးနိမ့်ခဲ့ကြပြီး။ ကျွန်တော့်အသက် ၁၂ အရွယ် ကျွန်တော့်ဖခင်ဆုံးသွားပြီး အမေလဲအလုပ်လက်မဲ့ဖြစ်ခဲ့တယ်။ နေစရာမရှိဖြစ်ခဲ့ကြတယ်။ ကျွန်တော့်မိခင်က ဘုရားကိုချစ်တဲ့စိတ်တစ်ဖက်မှာ ရှိနေပေမယ့် ပုံမှန်ခရစ်ယာန်တစ်ယောက်ရဲ့ အသက်တာနဲ့ အသက်ရှင်ခဲ့သူဖြစ်တယ်။ အချိန်တန်ရင် ဘုရားကျောင်းသွား ဘုရားကျောင်းမှာ ပါဝင်ဆက်ကပ်ပြီး ဝိုင်းဝန်း လုပ်ဆောင်နေပေမယ့် ဘုရားနဲ့ တကယ်တမ်းကျတော့ မိဿဟာယ မရှိခဲ့ဘူး။ ဒုက္ခတွေကြားမှာ သားသမီးသုံးယောက်ကို ကျွေးမွေးစောင့်ရှောက်ဖို့ ရုန်းကန်နေရင်း ဘာမှ အရာမရောက်ခဲ့ဘူး။ အဲ့ဒီလိုဖြစ်တဲ့အခါမှာ ဘုရားထံတိုးဝင်ဖို့ရာ အကြောင်းဖြစ်လာခဲ့တယ်။ ဘုရားမပါရင်မဖြစ်ဘူးဆိုတာ တဖြည်းဖြည်းနဲ့ကျွန်တ်ော့ရဲ့မိခင်သိလာခဲ့ပြီ။ ဘုရားကို အားကိုးတတ်လာတယ်။ ခိုလှုံတတ်လာတယ်။ အဲ့ဒီအခါမှာ intimate relationship ကို ဘုရားနဲ့ရရှိလာခဲ့ပြီ။ ဒီအခါ သူရရှိသလို သူ့သားသမီးကိုလဲ ရစေချင်ခဲ့တယ်။ မိရိုးဖလာထဲမှာ နှစ်ပေါင်းများစွာနေခဲ့တဲ့ ကျွန်တော်တို့မိသားစုက ဘုရား‌‌ကျောင်းရဲ့ အစီအစဥ်ထဲမှာ ဘာသာရေး လုပ်ဆောင်ချက်တွေထဲမှာ ပုံသေကားချပ် ကျနေခဲ့ပြီဖြစ်တယ်။ နောက်ဆုံးမှာတော့ သူ့ရဲ့နည်းဥပဒေသကို တကယ်နားလည်ပြီး ဘုရားစကားပေါ်မှာ တကယ်ရပ်တည်တတ်လာရင် ယေရှုခရစ်တော်က သင့်ဘဝအတွက် ဘာလုပ်ပေးခဲ့လဲဆိုတာ သင်တကယ်သိသွားရင် သင့်ဘဝကြီးက လုံးဝကြီး ပြောင်းလဲ သွားခဲ့ရတာဖြစ်တယ်။            ခရစ်ယာန်အသက်တာဆိုတာ သင့်လုပ်‌‌ဆောင်ချက်တွေ အပေါ်မှာ ရပ်တည်ရတာမဟုတ်ပါဘူး။ ခရစ်အသက်တာဆိုတာ ဘုရားစကားအပေါ်မှာ ရပ်တည်ရတာဖြစ်တယ်။ ကျွန်တော်တို့ကို တစ်သက်လုံးဘာသာရေး အယူဝါဒတွေ သင်ပေးခဲ့တာက မင်းအကောင်းဆုံးလုပ်မှဖြစ်မယ် ဆိုတာမျိူး၊ သင်ဘယ်လောက်အကောင်းဆုံးလုပ်နိုင်မလဲ? ဘုရားသခင်မစခြင်းမပါရင် သင်အကောင်းဆုံး လူရှေ့မှာ လုပ်နေပေမယ့် လိမ်နေတဲ့သူတွေချည်းပဲ၊ ဟန်ဆောင်ကောင်းနေတဲ့ လူတွေချည်းပဲဖြစ်တယ်။ တစ်ယောက်မှ ဘုရားသခင်ရှေ့မှာ ပြည့်စုံတယ်ဆိုတာ မရှိဘူး၊ ရှင်ပေါလုကိုယ်တိုင် ပြောခဲ့တာက “ငါ့ကိုခွန်အားနှင့် ပြည့်စုံစေမူသော ယေရှုခရစ်တော်အားဖြင့် ခပ်သိမ်းသော အမှုတို့ကို ငါတတ်စွမ်းနိုင်၏”  ဘုရားအတွက် ငါတို့ဘယ်လောက်ထိ ပါဝင်ဆက်ကပ်ပါတယ် လို့သင်ပြောနေပေမယ့် အဲ့ဒါက စစ်မှန်တဲ့မင်္ဂလာ ဖြစ်မလာဘူး။ စစ်မှန်တဲ့ မင်္ဂလာဆိုတာ ဘုရားသခင်က ခရစ်တော်အားဖြင့် ဘာတွေ လုပ်ထားပေးသလဲဆိုတာ သင်သိသွားရင် မင်္ဂလာက စပြီ။ ယေရှုခရစ်တော် လုပ်ဆောင်ပေးခြင်းအပေါ်မှာ ကျွန်တော်တို့ အာရုံစိုက်တတ်ဖို့ အရမ်းအရေးကြီးတာ။                  ဘုရားက သားတော်ကိုပဲ အာရုံစိုက်တယ်။ ယေရှုခရစ်အားဖြင့် ပဲကျွန်တော်တို့က ဘုရားရဲ့ကျေးဇူးကို ခံစားနေရတာဖြစ်တယ်။ “ငါတို့ သခင်ယေရှုအားဖြင့် ငါတို့အား အောင်ခြင်းအခွင့်ကို ပေးတော်မူသော ဘုရားသခင်၏ ကျေးဇူးတော်ကို ချီးမွမ်းခြင်းရှိစေသတည်း” လို့ နှုတ်ကပတ်တော်ရှိထားခဲ့ပြီး ဖြစ်တယ်။ “မိမိသားတော်အရင်းကို မနှမြောပဲ စွန့်တော်မူသောသူသည် သားတော်နှင့်တစ်ကွ ခပ်သိမ်းသော အရာတို့ကို ငါတို့အား အဘယ်သို့မပေးပဲ နေတော်မူမည်နည်း” လို့ပြောထားပြီဖြစ်တယ်။                  ခရစ်တော်အားဖြင့် သာကျွန်တော်တို့က အရာခပ်သိမ်းကို ရနေတာဖြစ်တယ်။ ခရစ်‌တော် လုပ်ဆောင်ပေးခြင်းကို သဘောပေါက်လာရင် ကိုယ်လုပ်ဆောင်တဲ့အရာအားလုံး ဘာမှ မဟုတ်တော့ဘူးဆိုတာ သဘောပေါက်လာမယ်။ သူပေးလို့ သင်ပြန်ပေးနေနိုင်တာဖြစ်တယ်။ သူမစတဲ့အပေါ်မှာ သင် ကပြန်ပြီး မစပေးနိုင်တာ ဖြစ်တယ်။ ကိုယ်ပိုင်တာ တစ်ခုမှ မရှိဘူး။ သင့်မှာ ငွေရှိနေတယ်ဆိုတာ ဘုရားက သင့်ကို မစခြင်းကြောင့်ဖြစ်တယ်။ ဘုရားက သင့်ကို ယုံလို့ ပေးထားတာဖြစ်တယ်။ သူမစခိုင်းတဲ့ နေရာ သူပေးခိုင်းတဲ့နေရာကို သင်က ပြန်ပေးရမှာဖြစ်တယ်။ ငွေရေးကြေးရေး သားသမီး စည်းစိမ်ဥစ္စာ စသဖြင့် သင့်မှာရှိနေတဲ့ အရာခပ်သိမ်းက ဘုရားပဲ ပေးထားတာဖြစ်တယ်။ အဲ့ဒါကို သ‌ဘောမပေါက်ပဲ ငါ့စည်းစိမ် ငါ့အောင်မြင်ခြင်း လုပ်တဲ့သူတွေက ကျဆုံးမှုနဲ့ရင်ဆိုင်ရတယ်။                       ကျွန်တော့်မိသားစုထဲမှာ ကျွန်တော့်အားဖြင့် စပြီးမင်္ဂလာဖြစ်ခဲ့တယ်။ ဘာကြောင့်လဲဆိုတော့ ကျွန်တော့်ကြောင့် မဟုတ်ဘူး ကျွန်တော်လုပ်နိုင်လို့ မဟုတ်ဘူး၊ ခရစ်တော်အားဖြင့် ဘုရားလုပ်ပေးနေတာကို ကျွန်တော် သိပြီး နာခံလိုက်လျှောက်ခဲ့လို့ဖြစ်တယ်။ ယေရှုခရစ်တော်အားဖြင့် မင်္ဂလာတွေ ပြင်ဆင်ပေးထားပြီးသား ဖြစ်တယ်။                လုကာ 13ကို ဆင်ခြင်တဲ့အခါမှာ ယေရှုခရစ်တော်က တစ်ဆယ့်ရှစ်နှစ်ပတ်လုံး နတ်စွဲပြီး ရောဂါနှိပ်စက်ခြင်းကို ခံနေရတဲ့ ကျောကုန်းနေတဲ့ မိန်းမကိုခေါ်ပြီး လက်တင်ဆုတောင်းပေးလိုက်တဲ့အခါ ရောဂါပျောက်ကင်းသွားတယ်။ အဲ့ဒါကိုမြင်တဲ့ တရားဇရပ်မှူးက တစ်ပတ်မှာ အလုပ်လုပ်တဲ့ရက်၆ရက်ရှိတာမို့ အဲ့ဒီ ၆ရက်မှာ အနာငြိမ်းခြင်းကို လုပ်နိုင်တယ်။ ဥပုသ်နေ့မှာ လာမလုပ်နဲ့လို့ ပရိတ်သတ်ကိုပြောတာတွေ့ရတယ်။ လူတွေကို ဘာသာထဲမှာပဲ ကြိုးစားကြလို့ ပြောနေတဲ့ ဘာသာရေးခေါင်းဆောင်တွေရဲ့လုပ်ရပ်ကို တွေ့ရတယ်။ ဘုရားရဲ့လုပ်ဆောင်ပေးခြင်းကြောင့် လွတ်မြောက်ခြင်းအခွင့်ကို ရသွားတာမျိူးကို မကြိုက်တဲ့ ဘာသာရေးခေါင်းဆောင်တွေ ဖြစ်တယ်။                                         ဒီကနေ့ ခရစ်ယာန်ဘာသာရေး ခေါင်းဆောင်တွေထဲမှာလည်း အများကြီးတွေ့ရတယ်။ ကလျက်ခုန်လျက် ချီးမွမ်းဖို့ ဒါဝိတ်ကပြောထားပြီးသား၊ ကလျက်ခုန်လျက် ချီးမွမ်းတာကို မကြိုက်တော့ရင် သင်ဒီကျမ်းစာကို မဖတ်တော့နဲ့။ ငြိမ်ဝပ်စွာ နေရမယ့်အချိန်ရှိသလို ကလျက်ခုန်လျက် ချီးမွမ်းရမယ့်အချိန်လဲ ရှိတယ်၊ လူတစ်ယောက်က လွတ်မြောက်လာပြီး မကမခုန်ပဲ မနေနိုင်ဘူး။ မောရှေက ဣသရေလလူမျိူးတွေကို အဲဂုတ္ထုပြည်ကခေါ်ဆောင်လာပြီး ပင်လယ်ဖြတ်ရတဲ့အခါ မောရှေနဲ့ ဣသရေလလူမျိူးတွေအတွက် ဘုရားသခင်က ပင်လယ်ကို နှစ်ခြမ်းခွဲပြီး ကျော်ဖြတ်စေခဲ့တယ်။ ဖာရောဘုရင် လိုက်လာတဲ့အခါမှာ ပင်လယ်ကပြန်ဆက်သွားပြီး ဖာရောဘုရင်ရဲ့စစ်တပ်ကို ရှုံးနိမ့်သွားစေခဲ့တယ်။ ဣသရေလ လူမျိူးတွေက တစ်ဖက်ကမ်းရောက်တဲ့အခါမှာ လွတ်‌မြောက်ခြင်းအခွင့်အတွက်  မိရိအံဦးဆောင်ပြီး ကလျက်ခုန်လျက် ချီးမွမ်းခဲ့ကြတယ်။                ဒီအမျိူးသမီးကို ကြည့်ကြတဲ့အခါ တစ်ဆယ့်ရှစ်နှစ်ပတ်လုံး ဒီလိုဖြစ်ရခြင်းက ဘုရားနဲ့မှားလို့ ဘယ်လောက်ပဲ ဆုတောင်းပေးပါစေ မပျောက်နိုင်ဘူး။ ဘုရားကျောင်းဘယ်လောက်လာနေပါစေ ပျောက်မှာမဟုတ်ဘူး။ ဘာကြောင့်လဲဆိုတော့ ဒီအမျိူးသမီးက ဘုရားနဲ့မမှန်လို့ဖြစ်တယ်လို့ ပြောကြတယ်။ ပညတ်တရား အောက်ကနေ ကြည့်ကြတယ်။ ယေရှုခရစ်တော်ကတော့ ဒီအမျိူးသမီးကို ကြည့်တဲ့အခါ အာဗြံဟံရဲ့သမီးဖြစ်တယ်လို့ ပြောခဲ့တယ်။ သူမရဲ့အထဲမှာ ယုံကြည်ခြင်းရှိတယ်ဆိုတာ ယေရှုက သိမြင်ခဲ့တယ်။ အာဗြံဟံရဲ့သမီး ၊ယုံကြည်ခြင်းဖခင်ရဲ့သမီး ဆိုတာ ယေရှုပြောခဲ့တာ ကျေးဇူးတရားကြောင့်ဖြစ်တယ်။                     ဇက္ကဲ ရဲ့အိမ်ကို ယေရှုသွားခြင်းကလည်း ဇက္ကဲရဲ့ယုံကြည်ခြင်းကြောင့်ဖြစ်တယ်။ ဤသူသည် အာဗြံဟံ၏ သားဖြစ်သည်နည်းတူလို့ ပြောခဲ့တယ်။ ပညတ်တရားအရ ဇက္ကဲက ကျေးဇူးပြုခြင်းမခံထိုက်တဲ့သူ ဖြစ်တယ်။ အာဗြံဟံရဲ့အနွယ် ဖြစ်တဲ့အတွက် လွတ်မြောက်ခြင်းအခွင့်ကို ပေးခဲ့တယ်။ “မိစဉ်ဘဆက်ကျင်လည်သော အချည်းနှီးကျင့်ကြံပြုမူခြင်းမှ၊ ရွှေငွေအစရှိသော ဖောက်ပြန် ပျက်စီး တတ်သော ဥစ္စာနှင့် သင်တို့ကို ရွေးတော်မူသည်မဟုတ်။ အဘယ်အပြစ်မျှမရှိ၊ အညစ်အကြေးနှင့် ကင်းစင်သော သိုးသငယ်ကဲ့သို့သော ခရစ်တော်၏ အသွေး တော်မြတ်နှင့်ရွေးတော်မူသည်ကို သိမှတ်ကြလော့။” (၁ပေ 1:18-19)                 သန့်ရှင်းပြီး အပြစ်တင်ခြင်းနဲ့ ကင်းလွတ်တဲ့  ယေရှုခရစ်တော်အားဖြင့် ကျွန်တော်တို့ကို ရွေးဝယ်ထားပြီဖြစ်တယ်။ ဒီကနေ့ ကျွန်တော်တို့က ယေရှုခရစ်တော်သည် မိမိ၏ကယ်တင်ပိုင်ရှင်အဖြစ် ယုံကြည်လက်ခံတဲ့ ကျွန်တော်တို့က စုံလင်ခြင်း အဖြစ်ကို ရရှိသွားတယ်။ အာဗြံဟံအားဖြင့် ကျောကုန်းနေတဲ့မိန်းမ လွတ်မြောက်သွားတယ်။ အာဗြံဟံအားဖြင့် ဇက္ကဲက လွတ်မြောက်ခဲ့တယ်။ ဒီကနေ့ ကျွန်တော်တို့က ယေရှုခရစ်တော်က ကျွန်တော်တို့ရဲ့ သခင် ကျွန်တော်တို့ရဲ့အရှင် ဖြစ်တယ်ဆိုတာ သင်ဝန်ခံရင် အာဗြံဟံအားဖြင့် ကျောကုန်းအမျိူးသမီးလွတ်သလို ဇက္ကဲလွတ်သလို ကျွန်တော်တို့က ယေရှုခရစ်တော်အားဖြင့် လွတ်မြောက်ခြင်းအခွင့် ရရှိပြီဖြစ်တယ်။ မင်္ဂလာရှိသောသူဖြစ်တယ်။ “သို့ဖြစ်၍ယုံကြည်ခြင်းရှိသောသူတို့သည် ယုံကြည်သော အာဗြဟံနှင့်အတူ ကောင်းကြီးမင်္ဂလာကို ခံရကြ၏။” (ဂလာတိ 3:9)         ခရစ်တော်၌သင်က ဘယ်လောက်ထိ ချီးမြှောက်ခြင်းခံရမလဲဆိုတာ သင်သိပြီး တစ်နေ့ပြီးတစ်နေ့ သင်ဘုရားသခင်ကို စိတ်ချစွာ ချီးမွမ်းကိုးကွယ်တတ်လာရင် သင့်အသက်တာမှာ စုံလင်ခြင်းရှိပြီဖြစ်တယ်။ သင့်အနာဂတ်မှာ အံ့သြဖွယ်ရာ ဘုရားမစခြင်းကို သင်မြင်တွေ့ရမှာ ဖြစ်ပါတယ်။ အယောက်စီတိုင်းကို ဘုရားရှင်ကောင်းကြီးပေးပါစေ။

Daily Bread

April 21, 2024 • Pastor David Lah • John 3:16, Luke 18:8, Genesis 20

အားလုံးပဲမင်္ဂလာပါ။ ဘုရားသခင်ပြင်ဆင်ပေးခြင်းကြောင့် တစ်နေ့ပြီးတစ်နေ့ တစ်လပြီးတစ်လ တစ်နှစ်ပြီးတစ်နှစ် ပို့ဆောင်ခဲ့တဲ့ ကျေးဇူးတော်က အင်မတန်ကြီးလှပါတယ်။ ရှေးဦးစွာ နှုတ်ကပတ်တော် မဝေငှခင်မှာ ဘုရားသခင်ထံမှ လာသော ငြိမ်သက်ခြင်း ကျန်းမာခြင်း ဝမ်းမြောက်ခြင်းများက သင်နှင့်သင့်မိသားစုအပေါ် မှာကျရောက်ပါစေလို့ ကျွန်တော် သခင်ယေရှုနာမ၌ ဆုတောင်း ကောင်းကြီးပေးလိုက်ပါတယ်။               ဒီကနေ့ ကျွန်တော် အဓိက ဝေငှပေးသွားမယ့် အကြောင်းအရာကတော့ ယုံကြည်ခြင်းဖြစ်တယ်။ ကျွန်တော်တို့ ဒီကနေ့ ဒီနှစ်ခုကို ပိုင်းခြား နားလည်တတ်ဖို့ သိပ်အရေးကြီးပါတယ်။ လောကသားတွေအတွက် ဆိုရင် ကိုယ်ကျင့်တရားကို ကြည့်ကြတယ်။ ဒါပေမယ့် ယုံကြည်သူ ဘုရားသားသမီးတွေကတော့ ယုံကြည်ခြင်းကို ကြည့်တတ်ဖို့ သိပ်အရေးကြီးပါတယ်။               လူတွေက လူတစ်ယောက်ရဲ့အကျင့်၊ ကိုယ်ကျင့်တရားကို ကြည့်ပြီးဆုံးဖြတ်တတ်ကြတယ်။ ဘုရားကတော့ ယုံကြည်ခြင်းကို ကြည့်ပြီး ဆုံးဖြတ်တတ်ကြတယ်။ ဒါကို ကျွန်တော်တို့နားမလည်ရင် ကျွန်တော်တို့အသက်တာက ဆုံးရှုံးတယ် ဆိုတာထက် ဘုရားသခင်ပြင်ဆင်တဲ့ မင်္ဂလာကို မရလိုက်မှာ သိပ်စိုးရိမ်စရာ ဖြစ်တယ်။                 “ဘုရားသခင်၏သားတော်ကို ယုံကြည်သောသူအပေါင်းတို့သည်၊ ပျက်စီးခြင်းသို့ မရောက်၊ ထာဝရ အသက်ကို ရစေခြင်းငှါ၊ ဘုရားသခင်သည် မိမိ၌ တပါးတည်းသော သားတော်ကို စွန့်တော်မူသည်တိုင်အောင် လောကီသားကို ချစ်တော်မူ၏။ “(ယောဟန် 3:16)                  အကျင့်ကောင်းသောသူ အပေါင်းတို့သည် ပျက်စီးခြင်းသို့မ‌ရောက် လို့မပြောထားဘူး၊ စစ်မှန်တဲ့ယုံကြည်ခြင်းနဲ့ ကိုးကွယ်တဲ့သူမှန်ရင် အချိန်တန်ရင် ဘုရားပြုပြင်ပြီးတော့ အလိုလို ပုံသွင်းသွားတယ်။ ဘုရားက သူ့ရဲ့အထဲကနေ ဝင်ရောက်လုပ်ဆောင် ပေးသွားတဲ့အခါမှာ မင်္ဂလာရှိသွားစေတယ်။ အကျင့်ကောင်းခြင်းကိုပဲ အာရုံစိုက်တတ်တဲ့ လောကကြီးထဲမှာ ယုံကြည်ခြင်းကို တည်ဆောက်ပြီး အသက်ရှင်တတ်သွားဖို့ သိပ်အရေးကြီးတယ်။ ကိုယ့်ရဲ့ဖြောင့်မတ်ခြင်းအပေါ်မှာ ရပ်တည်ပြီး အသက်ရှင်တတ်သူတွေမှာ ယုံကြည်ခြင်းမရှိတဲ့အခါ ဘုရားရဲ့စိတ်တော်နဲ့ မတွေ့နိုင်ဘူး။                လောကရဲ့အမြင့်ဆုံးက ကောင်းသောအကျင့်ဖြစ်ပေမယ့် ကျွန်တော်တို့ ဘုရားသားသမီးတွေအတွက် အမြင့်ဆုံးက ယုံကြည်ခြင်းဖြစ်တယ်။ ဘုရားသခင်ထံကို တိုးဝင်တဲ့အခါမှာ ကောင်းသောအကျင့်နဲ့တိုးဝင်ခိုင်းတာမဟုတ်ဘူး၊ ယုံကြည်ခြင်းနဲ့ တိုးဝင်ခိုင်းတာဖြစ်တယ်။ လောကမှာတော့ သင်က ကောင်းသောအကျင့်နဲ့ကျင်လည်ဖို့ လိုအပ်သလို ယုံကြည်ခြင်းနဲ့ လျှောက်လှမ်းသွားဖို့ လည်းအရေးကြီးပါတယ်။  If you lose your money, you have lost nothing. If you lose your health, you lose something. If you lose your character, you lose everything. ဆိုတဲ့စာကြောင်းကို တစ်ရက်မှာ ကျွန်တော်ဖတ်လိုက်ရတယ်။ သင့်ငွေတွေ ဆုံးရှုံးတယ် ဆိုတာ ဘာမှ မဆုံးရှုံးသေးပါဘူး၊ သင့်ရဲ့ကျန်းမားရေးထိခိုက်လာပြီဆိုရင်တော့ သင်တစ်ခုခုကို အနည်းငယ် ဆုံးရှုံးလိုက်ရတာ ဖြစ်တယ်။ သင့်ရဲ့အကျင့်မကောင်းတော့ရင် သင့်အသက်တာက လုံးဝဆုံးရှုံးသွားရမှာဖြစ်တယ်။ ဒါကလောကရဲ့ စံချိန်စံနှုန်း ဖြစ်တယ်။            If you lose your money, you have lost nothing. If you lose your health, you lose something. If you lose your Faith , you lose everything. ငွေဆုံးရှုံးတာက ပြန်ရှာလို့ရတယ်၊ ကျန်းမာရေးမကောင်းတာက  ကျန်းမာအောင် ပြန်ပြီး ဂရုစိုက်လို့ ရပါတယ်။ ကျွန်တော်တို့ယုံကြည်သူ သားသမီးတွေက အကျင့်ဆိုတဲ့အရာထက် ယုံကြည်ခြင်းမရှိရင် သင့်ဘဝတစ်ခုလုံး ဆုံးရှုံးခြင်းပဲရှိတော့မှာ ဖြစ်တယ်။ သင့်အသက်တာမှာ ယခုဘဝ နောင်ဘဝ ပျက်စီးခြင်းမရောက်ဖို့ အရေးကြီးဆုံးအရာက ယုံကြည်ခြင်းပဲဖြစ်တယ်။              လူတစ်ယောက်ကို စီရင်မိရင် လူတစ်ယောက်ကို အပြစ်တင်ရင် သင်သတိထားပါ။ လူတစ်ယောက်ရဲ့အပြင်ပန်းကို ကြည့်ပြီးမှ သူ့ကိုသွားပြီး မစီရင်မိပါစေနဲ့။ အဲ့ဒီလူက သူဘယ်သူ့ကို ယုံနေလဲဆိုတာ သင်မသိဘူး၊ သူက ဘုရားကို တကယ်ပဲ ယုံကြည်ကိုးစားသူဖြစ်နေရင် သင်သူ့ကို စီရင်မိတဲ့အတွက် သင့်အသက်တာမှာ အမင်္ဂလာတွေ ဖြစ်လာမယ်။ ဘုရားသခင်က ယုံကြည်ခြင်းကိုပဲ ကြည့်ပြီးစီရင်တယ်။ အကျင့်ကို ကြည့်ပြီး စီရင်တဲ့ဘုရားမဟုတ်ဘူး။               ဧဒင်ဥယျာဥ်အလယ်မှာ ရှိတဲ့အပင်က အသီးကို မစားဖို့  စားခဲ့ရင် ဧကန်အမှန် သေရလိမ့်မည်လို့ ဘုရားက သူဖန်ဆင်းတဲ့ လူသားကို မှာထားခဲ့ပေမယ့် စာတန်ရောက်လာတဲ့အခါမှာ စာတန်က ဧကန်အမှန် သေရလိမ့်မည် မဟုတ်လို့ ပြောတယ်။ လူက မစားနဲ့ဆိုတဲ့ ဘုရားစကားထက် စားလို့ရတယ် ဆိုတဲ့ မာရ်နတ်စကားကိုယုံသွားခဲ့တယ်။ အဲ့ဒီအသီးကို သွားစားခဲ့တယ်။ စားတာက အရင်မလာခင် စကားကို ယုံတာက အရင်လာတာဖြစ်တယ်။ မာရ်နတ်စကားကို ယုံပြီး အသီးကို စားလိုက်တယ်။ ယုံကြည်ခြင်းက အရင်လာပြီး လုပ်ဆောင်ချက်က မှားသွားခဲ့တာဖြစ်တယ်။                 ဒါကြောင့်မို့ ကျမ်းစာထဲမှာ ယုံကြည်ခြင်းက အမြစ်ဖြစ်တယ်။ လုပ်ဆောင်ခြင်းဆိုတဲ့ အကျင့်က အသီးဖြစ်တယ် လို့ပြောထားတာဖြစ်တယ်။ ကျွန်တော်တို့ က အသီးသီးဖို့ ဆိုတာကို သိပ်မျှော်လင့်ကြတယ်။ အသီးက အရင်လာတာ မဟုတ်ပါဘူး၊ယုံကြည်ခြင်းက အမြစ်ဖြစ်နေတဲ့အခါ အမြစ်တွယ်ပြီး အပင်က သန်မာမှ အသီးက သီးနိုင်တာဖြစ်တယ်။ ကျွန်တော်တို့က အသီးကိုပဲ စိတ်ဝင်စားနေကြတယ်။ ဘုရားက အမြစ်ကိုပဲ စိတ်ဝင်စားတဲ့ဘုရားဖြစ်တယ်။                  ရုသက မောဘအနွယ်ကနေ လာတဲ့သူဖြစ်တယ်။ ကျိန်စာတိုက်ခံထားရတဲ့ အမင်္ဂလာမျိူးရိုးက လာသူဖြစ်တယ်။ ဒါပေမယ့် နောမိ ကိုးကွယ်တဲ့ ဘုရားကို ယုံကြည်ပြီး ကိုးကွယ်လိုက်တဲ့အခါမှာ အမင်္ဂလာကနေ မင်္ဂလာပြောင်းသွားခဲ့တယ်။ ယေရှုခရစ်တော်ရဲ့  မင်္ဂလာဖြစ်ရတဲ့ မျိူးနွယ်ဆက်ထဲမှာ ပါရတဲ့အခွင့်ကို ပြင်ဆင်ပေးလိုက်တယ်။                    ရာခတ်ကို ကြည့်တဲ့အခါမှာလဲ ပြည့်တန်ဆာမ ဖြစ်လျက်နဲ့ သမိုင်းမှာ အရေးကြီးတဲ့အခန်းမှာ ပါဝင်လာတာကို တွေ့ရတယ်။ စာလမုန် ဆိုတဲ့ ယုဒအမျိူးနွယ် မင်းသားနဲ့ရတဲ့အခွင့်ကို ရပြီး ယေရှုခရစ်တော်ရဲ့ မျိူးနွယ်ဆက်ထဲ့ပါလာတယ်။ အကျင့်မကောင်းခဲ့ပေမယ့် ဘာြဖစ်လို့ ယေရှုခရစ်တော်ရဲ့ မျိူးနွယ်ဆက်ထဲမှာ ချီးမြှောက်ခံတဲ့ မိန်းမတွေ ဖြစ်လာရတာလဲ ဆိုတော့ ယုံကြည်ခြင်းကြောင့်ပဲ ဖြစ်တယ်။                        ယုံကြည်ခြင်းက သိပ်အရေးကြီးပါတယ်။ သူတို့ရဲ့အတိတ်က မကောင်းခဲ့ပေမယ့် ယုံကြည်ခြင်းရှိလိုက်တာနဲ့ အမင်္ဂလာကနေ မင်္ဂလာရှိတဲ့ မျိူးရိုး အဖြစ်ပြောင်းသွားခဲ့ရတယ်။ ခုနက လောကစကားက အကျင့်မကောင်းရင် သင်အားလုံးဆုံးရှုံးမယ်လို့ ပြောပေမယ့် ကျွန်တော့်အနေနဲ့ကတော့ ယုံကြည်ခြင်း မရှိရင် သင်အားလုံးဆုံးရှုံးရမှာ ဖြစ်တယ်။                အာဗြံဟံ အသက်တာကို ဆင်ခြင်တဲ့အခါမှာ အာဗြံဟံက သူ့အမျိူးအနွယ်ထဲက သူထွက်လာပြီး ဘုရားသခင် ပို့ဆောင်တဲ့ နေရာကို သွားနေရင်း ခါနန်ပြည်မှာ အစာခေါင်းပါးတာကို မြင်တော့ အဲဂုတ္ထုပြည်ကို သွားနေခဲ့တယ်။ အဲဂုတ္ထုပြည်က လူတွေရဲ့ အကျင့်ဆိုးတွေနဲ့ စိတ်ဓါတ်ကို သူကောင်းကောင်းသိတယ်။ ဒီလူမျိူးတွေ အကျင့်ကို သူသိတာမို့ သူ့မိန်းမလို့ မပြောပဲ သူ့ညီမလို့ ပြောရင် သူအသက်ဘေးကလွတ်မယ့်အကြောင်း သူ့မိန်းမကို သူပြောခဲ့တယ်။ သူ့မိန်းမကို သူ့ညီမလို့ လိမ်ပြောခဲ့တယ်။ သူ့မိန်းမက လှတော့ ဖာရောဘုရင်က သိမ်းယူသွားခဲ့တယ်။ စာရာအားဖြင့် အာဗြံဟံကိုလည်း ချီးမြှောက်ပြီး သေချာဂရုစိုက်တယ်။ ဒါပေမယ့် ဘုရားက ဖာရောဘုရင်ရဲ့နန်းတော် တစ်ခုလုံးကို ဆုံးမတော့ ဖာရောဘုရင်က ကြောက်လန့်ပြီး အာဗြံဟံကို ပြန်မေးတဲ့အခါ အာဗြံဟံက စာရာက သူ့မိန်းမဖြစ်ကြောင်း ဝန်ခံခဲ့တယ်၊ ဒီအခါ ဖာရောဘုရင်က ကြောက်ပြီး စည်းစိမ်ဥစ္စာတွေနဲ့ စာရာကိုရော အာဗြံဟံကို ပြန်ပေးလိုက်တယ်။ အာဗြံဟံက နန်းတော်ကနေ ပစ္စည်းဥစ္စာ အပြည့်အစုံနဲ့ ပြန်ထွက်လာရတယ်။                အာဗြံဟံလူလည်ကျသလို ငါတို့လဲ လူလည်ကျလို့ ရပါတယ်လို့ သင်မတွေးလိုက်ပါနဲ့။ အာြဗံဟံဘက်မှာ ဘုရားပါနေခဲ့တာ အာဗြံဟံအကျင့်ကြောင့်မဟုတ်ခဲ့ဘူး၊ ဘုရားပါနေတဲ့အတွက်ကြောင့်ဖြစ်တယ်။ အာဗြံဟံကို မင်းရဲ့ အသိုင်းဝိုင်း အမျိူးအနွယ်ထဲက ထွက်ခဲ့လို့ ပြောတဲ့အခါမှာ ထွက်လာတဲ့အာဗြံဟံရဲ့ ယုံကြည်ခြင်းကြောင့်ဖြစ်တယ်။ အာဗြံဟံက သူ့အသိုင်းအဝိုင်းထဲမှာ သူနေသားကျနေပြီဖြစ်ပေမယ့် ဘုရားစကားကို ယုံပြီး သူ့ရဲ့အဆင်ပြေနေတဲ့ ဘဝကနေ ထွက်လာခဲ့တာဖြစ်တယ်။ တကယ်တော့ ဖာရောဘုရင်က မမှားခဲ့ဘူး၊ အာဗြံဟံလိမ်တာကို ယုံပြီး စာရာကို သူသိမ်းခဲ့တာဖြစ်တယ်။ အကျင့်အားဖြင့်ကြည့်ရင် ဖာရောမှန်နေပြီး အာဗြဟံက အကျင့်မကောင်းဘူးလို့ ယူဆလို့ရတယ်။ ဘုရားသခင်က မတရားဘူးလို့ မြင်နိုင်တယ်။ ဒါပေမယ့် မဟုတ်ဘူး။            ဘုရားက ယုံကြည်ခြင်းကို ထောက်ရှုပြီး စီရင်တဲ့ဘုရားဖြစ်တယ်။ ယုံကြည်ခြင်းကို ထောက်ပြီး စောင့်မတဲ့ ဘုရားဖြစ်တယ်။ သင့်ရဲ့အသက်တာထဲမှာ မှားနေခဲ့ရင်တောင်မှ သင့်ရဲ့အသက်တာကို ဘုရားသခင်နဲ့ပြန်တိုးဝင်ပြီး ယုံကြည်ခြင်းနဲ့ ပြန်ဆက်ကပ် တဲ့အခါ သင့်ရဲ့အသက်တာကို ဘုရားသခင်က ပြန်ပြုပြင်ပေးပြီး ဆက်လက် လမ်းပြသွားမှာ ဖြစ်တယ်။ စာတန်က သင့်ရဲ့ယုံကြည်ခြင်းကို ပဲ တိုက်နေတာဖြစ်တယ်။ သင်ဘယ်သူ့ကို ယုံသလဲဆိုတာ သင့်ကိုယ်သင် ကောင်းကောင်းသိနေသရွေ့ သင်ဘယ်သူလဲဆိုတာ သင့်ကိုယ်သင် ကောင်းကောင်းသိတယ်။ သူများဘာပဲ လာပြောနေပါစေ ကိုယ်ဘယ်သူလဲဆိုတာ ကိုယ့်ကိုယ်ကို သိလို့  ငြိမ်ဝပ်စွာနဲ့ ကျေးဇူးတော် ချီးမွမ်းပြီးနေတယ်။                “ငါဆိုသည်ကား၊ သူတို့ဘက်၌ အလျင်အမြန် တရားစီရင်တော်မူမည်။ သို့သော်လည်း လူသားသည် ကြွလာသောအခါ ယုံကြည်ခြင်းကို မြေကြီးပေါ်မှာ တွေ့မည်လောဟု သခင်ဘုရားသည် မိန့်တော်မူ၏။” (လုကာ18:8)         ယေရှုခရစ်တော်က နောက်တစ်ခါ ပြန်ကြွလာချိန်မှာ ယုံကြည်ခြင်းကို မြေကြီးပေါ်မှာ တွေ့မည်လော ဆိုပြီးမေးထားတာ တွေ့ရတယ်။ အကျင့်ကောင်းသူကို တွေ့မည်လောလို့ မမေးထားခဲ့ဘူး။               ကမ္ဘာဦးကျမ်း 20 ကိုဆင်ခြင်တဲ့အခါမှာ အဘိမလက် မင်းကို အာဗြံဟံက စာရာကို သူ့ညီမပါလို့ ထပ်လိမ်သေးတယ်။ ဒီမှာကြည့်ရင် လိမ်တဲ့သူက အဘိမလက်မဟုတ်ဘူး၊ အာဗြံဟံနဲ့စာရာက လိမ်နေတဲ့သူဖြစ်တယ်။ ညဘက်မှာ အဘိမလက်ကို ဘုရားက အိမ်မက်အားဖြင့် စကားပြောတဲ့အခါ အဘိမလက်မင်းကို လူသေလို့ပြောခဲ့တယ်။ အဘိမလက်က သူက ဖြောင့်မတ်သောသူ တစ်ယောက်ဖြစ်တာ ကိုယ်တော်သိပါတယ်။ သူမသိလို့ပါ။ အာဗြံဟံက လဲညီမလို့ လိမ်သလို စာရာကလဲ အာဗြံဟံက သူ့အစ်ကိုပါလို့ နှစ်ယောက်စလုံးက ပြောလို့ သူယူဖို့ လုပ်မိတာပါ။ သူမယူရသေးဘူး ဆိုတာ ပြောခဲ့တယ်။ ဒီအခါမှာ ဘုရားသခင်ကလည်း အဘိမလက်ကို သင်ဖြောင့်မတ်တာ ငါသိတယ်။ သင့်ကို ငါဆီးတားပြီ။ သူ့မိန်းမကို မင်းသိမ်းယူခွင့်မရှိဘူး။ အာဗြံဟံက ပရောဖက်ဖြစ်တယ်။ အာဗြံဟံပြန်ဆုတောင်းပေးမှ မင်းသေမယ့်အဖြစ်က လွတ်မယ်လို့ ဘုရားက အဘိမလက်မင်းကို ပြောခဲ့တယ်။ ဒါကိုကြည့်တဲ့အခါမှာ ဘုရားကမျက်နှာလိုက်တယ် ထင်နိုင်တယ်။ ဘုရားက မျက်နှာလိုက်တဲ့ဘုရားမဟုတ်ဘူး၊ ယုံကြည်ခြင်းကို ကြည့်တဲ့ဘုရားဖြစ်တယ်။                       အာဗြံဟံ အမှားလုပ်ပေမယ့် အာဗြံဟံရဲ့ယုံကြည်ခြင်းကို ကြည့်ပြီးချီးမြှောက်ခဲ့တယ်။ အာဗြံဟံရဲ့ ယုံကြည်ခြင်းကို ဖြောင့်မတ်ခြင်းကဲ့သို့  ဘုရားက မှတ်ယူခဲ့ခြင်းဖြစ်တယ်။ ဘဝတိုက်ပွဲတိုင်းမှာ သင်အောင်မြင်ချင်ရင် တစ်ခုပဲ သင်လိုအပ်ပါတယ်။ယုံကြည်ခြင်းဖြစ်တယ်။ အကျင့်ကို တည်ဆောက်တဲ့သူတွေ အများကြီးရှိပေမယ့် ယုံကြည်ခြင်းရှိတဲ့သူနဲ့ပဲ ဘုရားသခင်က အလုပ်လုပ်သွားတာဖြစ်တယ်။ သင့်ရဲ့အားနည်းချက်ကို သင်မစဥ်းစားနဲ့။ ယုံကြည်ခြင်းနဲ့ အသက်ရှင်တဲ့သူက အချိန်တန်ရင် ဘုရားက ပြုပြင်သွားပေးတာဖြစ်တယ်။ ယေရှုခရစ်တော် အသစ်တဖန်ပြန်ကြွလာတဲ့အခါ လောကအလယ်မှာ ကိုယ်တော့်ကို ယုံကြည်သောသူ ကျွန်တော် ကျွန်မတို့ ရှိနေပါတယ်လို့ ပြောနိုင်သောသူများဖြစ်ပါစေ။ အယောက်စီတိုင်း အပေါ်မှာ ဘုရားသခင်ကောင်းကြီးပေးပါစေ။                      

Sunday Morning Service | The Light Worship Center | 21 Apr 2024

April 21, 2024

Sunday Evening Service | The Light Worship Center | 21 Apr 2024

April 21, 2024

Daily Bread

April 20, 2024 • Pastor David Lah • Exodus 3:21, 2 Corinthians 1:20, Luke 5

                   အယောက်စီတိုင်း သခင်ယေရှုခရစ်တော် နာမ၌ မင်္ဂလာပါ။ ယခုခေတ်ကာလမှာ ခက်ခဲပင်ပန်းမှုတွေ ပြည့်နှက် လွန်းနေပြီ ဖြစ်တယ်။ ဒါပေမယ့် ကျွန်တော်တို့ ဘုရားသားသမီးတွေရဲ့ နှုတ်က အမင်္ဂလာတွေ မပြောမိစေဖို့ သတိပြုစေချင်ပါတယ်။ နှုတ်ခမ်းအသီးကို စတင်စိုက်ပျိူးကြပါ။ ယုံကြည်သူ ဘုရားသားသမီးတွေရဲ့ နှုတ်က ဆုတောင်းပေးခြင်း မင်္ဂလာက သင်ရှိနေတဲ့ တိုင်းနိုင်ငံမှာ ကောင်းကြီးဖြစ်စေပါမယ်။ ဒီကနေ့ ကျွန်တော်တို့တွေ ဘုရားသခင်ရဲ့ မျက်နှာသာ ရခြင်းအကြောင်း နှုတ်ကပတ်တော် ခံယူသွားကြဖို့ ဖြစ်ပါတယ်။ဘုရားရဲ့ မျက်နှာသာဆိုတာ လူ့ရဲ့အစွမ်းအစနဲ့ လုပ်ယူလို့မရတဲ့ အရာဖြစ်ပြီး မထင်မှတ်ထားတဲ့ အချိန်မှာ မထင်မှတ်ထားတဲ့ နေရာမှာ မမျှော်လင့်နိုင်တဲ့ အနေအထားမှာ ဘုရားသခင်က ပို့ဆောင်ပြီး ရနိုင်ခွင့် ပိုင်ဆိုင်နိုင်ခြင်းကို ခေါ်ခြင်းဖြစ်တယ်။                    အဲ့ဒီမျက်နှာသာရခြင်းနှင့် ပတ်သတ်ပြီး ဆရာကြီး တစ်ဦးက အချက်တွေနဲ့ အဓိပ္ပါယ်ဖွင့်ထားခဲ့ဖူးပါတယ်။ ဘုရားသခင်ရဲ့ မျက်နှာသာရခြင်းဆိုတာ သဘာဝလွန်ဖြစ်စဥ်များ တိုးပွားပြီး နေရာ၊ ရာထူး တိုးတက်ခြင်းဖြစ်တယ် တဲ့။ ဘယ်သူ့အကြောင်း တွေ့ရသလဲ ဆိုရင် “ ယောသပ် “ ဖြစ်တယ်။ ယောသပ်က သူများအိမ်မှာ ကျွန်ဘဝအဖြစ် ရောက်သွားပေမယ့် ကျွန်ထဲမှာ မျက်နှာသာရတဲ့သူ ၊ သူများအားကိုးရသူ ဖြစ်ခဲ့တယ်။ ထောင်ထဲရောက်ပြန်တော့ ထောင်ထဲမှာ ထောင်မှူးတွေက လေးစားပြီး နေရာပေးခြင်းခံရသူ တစ်ဦးဖြစ်လာပြန်တယ်။ နန်းတော်ရောက်သွားခဲ့တဲ့အခါ နန်းတော်မှာ ဘုရင်ရှေ့ မျက်နှာသာရပြီး နိုင်ငံကို အုပ်ချူပ်ရတဲ့သူ ဖြစ်လာခဲ့တယ်။ နောက်တစ်ချက်ကတော့ သင့်ဆီက မာရ်နတ် လှည့်စားပြီး သိမ်းယူသွားတဲ့ အရာအားလုံး သင်က ပြန်လည်သိမ်းပိုက်ခွင့် ရတဲ့အဖြစ်ကို ဘုရားက ပြန်ပေးခြင်း ဖြစ်တယ်။ “ထိုလူမျိုးသည် အဲဂုတ္တုလူတို့ထံ၌ မျက်နှာရသော အခွင့်ကို ငါပေး၍၊ သင်တို့သည် ထွက်သွားသောအခါ လက်ချည်း မသွားရကြ။” (ထွက်မြောက် 3:21)                             ဘုရားမျက်နှာသာရလာရင် ရန်သူတွေအရှေ့မှာ ချီးမြှောက်ခြင်းခံရတဲ့ အခွင့်ကိုရခြင်း၊ ဘုရားမျက်နှာသာပါရင် ဥစ္စာတိုးပွားခြင်းနှင့်အတူ ပိုင်ဆိုင်မှုများ တိုးပွားလာခြင်း၊ ဘုရားမျက်နှာသာရလာရင် အောက်ဆုံးအဆင့် အငယ်ဆုံးကနေ အမြင့်ဆုံးအထိ ချီးမြှောက်ခံရခြင်း၊ ဘုရားမျက်နှာသာရလာရင် သူများတွေရဲ့ အရေးပေးခြင်း အလေးထားခြင်းကို ခံစားလာရခြင်း၊ ဘုရားသခင်ရဲ့ မျက်နှာသာရလာရင် ဘုရားမရှိတဲ့ အာဏာရှင်တွေကတောင် ကိုယ့်ကိုလေးစားပြီး ကိုယ့်ကို ပြန်နေရာပေးရတဲ့အထိ သူတစ်ပါးအရှေ့မှာ မျက်နှာသာရခြင်း၊ ဘုရားမျက်နှာသာရလာတဲ့အခါ လူတွေသတ်မှတ်ထားတဲ့ စည်းမျဥ်းစည်းကမ်းဘောင်တွေကနေ ကိုယ့်အတွက် အဲ့ဒီရှိပြီးသား စည်းကမ်းတွေကိုပါ ပြောင်းပစ်လိုက်တဲ့အထိ ဖြစ်စေခြင်း၊ ဘုရားမျက်နှာသာပါလာရင် ကိုယ်တိုက်စရာမလိုပဲ တိုက်ပွဲတွေကို ဘုရားရှင်က တိုက်ပေးခြင်းအားဖြင့် အောင်ပွဲခံစေခြင်း၊ တို့ပဲဖြစ်တယ်လို့ အနက်ဖွင့်ခဲ့တယ်။                 ဘုရားမျက်နှာသာ ရလာတဲ့အခါ မထင်မှတ်ထားတဲ့အရာတွေ မဖြစ်နိုင်ဘူးလို့တွေးထားတဲ့အရာတွေ ဖြစ်လာတာ တွေ့ရတယ်။ ဒါဝိတ်က ဘုရားရှေ့မှာ မျက်နှာသာရခြင်းအားဖြင့် ဂေါလျက်နဲ့ တိုက်တဲ့အခါ အောင်မြင်ရတဲ့အခွင့်ကို ပေးတယ်။ ဘုရားသခင် မျက်နှာသာပါရင် သင့်ဘဝမှာ မဖြစ်နိုင်ဘူးဆိုတဲ့အရာတွေကို သင်ဝင်စားခွင့်ရတာ တွေ့လာရမှာဖြစ်တယ်။ ၁၉၉၆ခုနှစ်လောက် ကျွန်တော် ထိုင်းနိုင်ငံမှာ နေတုန်းက ကျွန်တော့်မှာ အလုပ်မရှိခဲ့ဘူး။ အမေ့ရဲ့လုပ်စာလေးကို ထိုင်စားပြီး နေရတဲ့ကာလဖြစ်တယ်။ နေ့ခင်းဘက်တွေဆိုရင် ကျွန်တော် နှုတ်ကပတ်တော်ဆင်ခြင်ပြီး ဆုတောင်းတတ်တဲ့အကျင့်ရှိတယ်။ အဲ့ဒီနေ့က ကျွန်တော်ဆုတောင်းနေရင်း ဘုရားသခင်က ကျွန်တော့်ကို ဘာစကားပြောလဲဆိုတော့ GOD FAVOR ဆိုတာဖော်ပြလာတော့ ကျွန်တော်ကနားမလည်လို့ ဘုရားသခင်ကို မေးတဲ့အခါမှာ မင်းညီမင်းသားတွေနဲ့ သင့်ကို ထိုင်စားရတဲ့အခွင့်ကို ငါပေးမယ်လို့ပြောတာဖြစ်တယ်။                       ကျွန်တော်လဲ မြေမှုန့်ထဲမှ ချီးမြှောက်တော်မူ၍ ဆိုတဲ့ သီချင်းကို ချီးမွမ်းရင်း ကျွန်တော် မျက်ရည်ကျခဲ့ရတယ်။ ကျွန်တော် ဘုရားသခင်ကို သိခွင့်ရတာတောင်မှ ကျေနပ်နေခဲ့ပါပြီ ။ ပညာအရည်အချင်းမရှိ ဘာမှမတတ်တဲ့သူက အဲ့လိုရဖို့ဆိုတာ မဖြစ်နိုင်ဘူး။ ၂၀၀၃ ခုနှစ်ရောက်တဲ့အခါ All denomination leadership conference ကိုတက်ရောက်ဖို့ ဖြစ်လာခဲ့တယ်။ ကျွန်တော်လုံးဝထင်မထားခဲ့ပါဘူး။ အဲ့ဒီတုန်းက Four square church president ကကျွန်တော့်ကိုခေါ်ပြီး သူ့ရဲ့ assistant အနေနဲ့ တက်ခိုင်းစေခဲ့တာဖြစ်တယ်။                            ကျွန်တော်လုံးဝထင်မထားခဲ့ဘူး။ ကျွန်တော့်ကို ရွေးပြီး တက်ခွင့်ပေးခဲ့တယ်။ ဘုရားသခင်ကျေးဇူးတော်ကို အရမ်းချီးမွမ်းမိတယ်။ အရင်က အိမ်မက်တောင်မမက်ဖူးခဲ့တဲ့ အပြင်မှာမြင်ဖို့မလွယ်ကူတဲ့ တီဗွီထဲမှာပဲ မြင်ဖူးတဲ့ ဆရာကြီးတွေနဲ့ ထမင်းအတူ ထိုင်စားရတဲ့အခွင့် ကိုဘုရားသခင်က ပြင်ဆင်ပေးခဲ့တယ်။ ထမင်းစားနေရင်းနဲ့ ဝိညာဥ်တော်က ကျွန်တော့်ကို တစ်ချက်ပဲဖွင့်ပြတယ်။ ဘုရားသခင်ရဲ့ မျက်နှာသာပါလာရင် မင်းတွေ့လား? မင်းအနီးအနားတောင် ကပ်လို့မရတဲ့ တီဗွီမှာပဲ မင်းမြင်တွေ့ခဲ့ရတဲ့ ဆရာကြီးတွေနဲ့ အခုမင်းအတူတူ ထမင်းစားခွင့်ရှိပြီ၊ မင်းကိုငါ ၁၉၉၆ ခုနှစ်က ပေးခဲ့တဲ့ကတိတော်ကို မင်းမှတ်မိလား? အဲ့ဒီတုန်းက အစ္စရေးက ဝန်ကြီးချူပ်ပါသလို တကယ့်ကို ကမ္ဘာနဲ့အဝှမ်း ဘုရားအသုံးပြုခြင်းခံနေရတဲ့ ဆရာကြီးတွေပါတယ်။ ကျွန်တော် ထမင်းစားနေရင်းနဲ့ မနေနိုင်တော့လို့ ထပြီး သန့်စင်ခန်းထဲမှာ မျက်ရည်ကျပြီး ကျေးဇူးတော်ချီးမွမ်းရင်း ငိုကြွေးခဲ့ရပါတယ်။ဘုရားသခင်က သိပ်ကတိတည်တဲ့ ဘုရားဖြစ်တယ်။ မဖြစ်နိုင်တဲ့ အိမ်မက်‌တောင် မမက်ရဲ့တဲ့အရာတွေကို ဘုရားသခင်က ဖြစ်စေခဲ့တယ်။                            ဘုရားသခင်ရဲ့ မျက်နှာသာရခြင်းနဲ့ တွဲနေတဲ့အရာက နာခံခြင်းဖြစ်တယ်။ နာခံခြင်းရှိတဲ့သူဆီမှာ မျက်နှာသာရခြင်းက အမြဲတမ်းတွဲပြီး လိုက်လာတတ်တယ်။ ဘုရားသခင်ရဲ့မျက်နှာသာ ရခြင်းကို လိုချင်ရင် သင်က ဘုရားစကားကို နာခံခြင်းရှိပါ။ အဲဒါ သော့ချက်ပဲဖြစ်တယ်။ နောဧကို သင်္ဘောဆောက်ခိုင်းတဲ့အခါ နောဧက တစ်ခွန်းမှ ဇောဒက မတက်ပဲ နာခံတယ်။ သင်္ဘော‌ဆောက်ခဲ့တယ်။ နာခံတဲ့သူနဲ့ ဘုရားက အလုပ်လုပ်သွားတယ်။ နာခံတဲ့သူကိုပဲ မျက်နှာသာပေးသွားတယ်။ နာခံတဲ့သူကို ဘုရားက ကောင်းကြီးပေးပြီး ချီးမြှောက်သွားခဲ့တယ်။ “ထိုသခင်မှာ ဘုရားသခင်၏ ဂတိတော်ရှိသမျှ တို့သည် ငါတို့ အားဖြင့် ဘုန်းအသရေတော်ကို ထင်ရှား စေခြင်းအလိုငှါ၊ ဟုတ်မှန်၏ဟူ၍၎င်း၊ အာမင်ဟူ၍ ၎င်းဖြစ်သည်။” (၂ကော 1:20)                         အမြဲတမ်း ဘုရားစကားကို သင်ဝန်ခံတတ်ရင် ဘုရားမျက်နှာသာရခြင်းက သင့်မှာပါလာမှာ ဖြစ်တယ်။ ရှင်လုကာ ၅ ထဲက အကြောင်းအရာလေးနဲ့ ကျွန်တော် ဝေငှသွားချင်ပါတယ်။ ဒီမှာ ကျွန်တော် တစ်ခုပြောပြချင်တာက ယေရှုက ပေတရုလှေကို လိုတာ မဟုတ်ခဲ့ဘူး၊ ပေတရုက ယေရှုကို လိုတာဖြစ်တယ်။ သင့်ရဲ့အသက်တာထဲမှာ ဘုရားသခင် ဝင်ရောက်လာခြင်းက သင့်ကို ကောင်းကြီးဖြစ်စေချင်လို့ ဖြစ်တယ်။ ‌ပေတရုရဲ့ လှေထဲကို ဝင်ခွင့်တောင်းတဲ့ အခါမှာ ပေတရုက ဝင်ခွင့်ပေးခဲ့တယ်။ သင့်အသက်တာမှာလည်း ယေရှုက ဝင်ခွင့်တောင်းတဲ့အခါ သင်ဝင်ခွင့်ပေးလိုက်ပါ၊ သင်လိုအပ်နေတာ သူသိတယ်။ သင့်လိုအပ်ချက်ကို ဖြည့်ဆည်းပေးနိုင်တာက ယေရှုဆိုတာ သင်မသိတဲ့အခါ သင်အမျိူးမျိူးကြိုးစားနေရင်း သင်ပင်ပန်းနေခဲ့ပြီ။ သင်ယေရှုကို သင့်အသက်တာထဲ ဝင်ခွင့်ပေးလိုက်ပါ။ ရှမာရိမြို့က မိန်းမက ယောကျ်ားတစ်ယောက်ပြီးတစ်ယောက်ယူတာ ဘာကြောင့်လဲ? သူ့အတွက် ကောင်းမယ်ထင်ပြီး သူယူခဲ့တာလေ၊ သူ့အသက်တာမှာ ယောက်ျား ငါးယောက်နဲ့နေခဲ့ပြီး လက်ရှိမှာ ယောက်ျားတစ်ယောက်နဲ့ရှိနေခဲ့တယ်။ ယေရှုနဲ့သူတွေ့တဲ့အခါမှာ သူမရှာဖွေနေခဲ့တဲ့ သူမလိုအပ်နေခဲ့တဲ့ အရာကို သူမတွေ့ရှိသွားခဲ့တယ်။ ရေငတ်နေလို့ ရေလာခပ်တဲ့သူမက ရေဘူးကိုထားခဲ့ပြီး ပြန်သွားနိုင်ခဲ့တာ သူမအတွက် ဘယ်တော့မှ မခမ်းခြောက်နိုင်တော့တဲ့ အသက်စမ်းရေကို ရသွားခဲ့လို့ပဲ မဟုတ်လား? သင့်အသက်တာမှာ သင်ယေရှုကို ရရင်ဘာမှ မလိုတော့ဘူး။                      ရှင်ပေါလုကလဲ ခရစ်တော်ကို ရပြီးတဲ့အခါ ခရစ်တော်ကို ရတဲ့ပညာက ခပ်သိမ်းသောအရာကို ရှုံးစေသောအရာကဲ့သို့ ငါသတ်မှတ်တယ်လို့ ပြောခဲ့တယ်။ ပေတရုလှေထဲကို ယေရှုရောက်လာပြီးတဲ့အခါ တစ်ညလုံးကြိုးစားပြီး ငါးရှာနေပေမယ့် ငါးရှာမရတဲ့ တံငါသည်ပေတရုကို လှေကို ရေနက်ရာ‌ ရွှေ့ခိုင်းတယ်။ ပိုက်ကွန်ကို ချခိုင်းတယ်။ ပေတရုက နာခံပြီး လုပ်လိုက်တဲ့အခါ ပိုက်ကွန်စုတ်ပြဲလုမတတ် ငါးတွေရခဲ့တယ်။ ငါးမရှိတဲ့နေရာ ငါးရှာမရနိုင်တဲ့ အချိန်မှာ ပိုက်ကွန်စုတ်ပြဲမတတ် ရခဲ့တာ ဘုရားမျက်နှာသာပဲဖြစ်တယ်။ ဒီလို ခဲယဥ်းဆိုးယုတ်တဲ့ ကာလမှာ သင်က သူများဆီက ယူသူမဟုတ်ပဲ ပေးနိုင်သောသူဖြစ်ဖို့ သင့်ရဲ့နှုတ်က ဝန်ခံခြင်းအရာ သင်နာခံတဲ့အရာ သိပ်အရေးကြီးပါတယ်။                         ဘုရားမျက်နှာသာပါလာရင် မဖြစ်နိုင်တဲ့အရာတွေ အကုန်ဖြစ်လာတယ်။ မထင်မှတ်ထားတဲ့ အရာတွေ အားလုံးဖြစ်လာခဲ့တယ်။ ကျမ်းစာတစ်အုပ်လုံးကို ကြည့်လိုက်ရင် မျက်နှာသာရတဲ့သူတွေ အားလုံးက ဘုရားစကားကို နာခံခြင်း ရှိသူတွေပဲဖြစ်တယ်။ ဘုရားမျက်နှာသာ ပါလာရင် သူများလုပ်လို့ အဆင်မပြေတဲ့အချိန်မှာ သင်က လုပ်သမျှ ပြုလေသမျှမှာ အောင်မြင်ရတဲ့အခွင့် ဖြစ်လာတယ်။ ဘုရားသခင်က နောက်ဆုံးသောအချိန်ကာလမှာ ဘုရားသားသမီးတွေကို မျက်နှာသာနဲ့ သွားစေချင်ပြီဖြစ်တယ်။ ဘုရားစကားကို နာခံခြင်းဖြင့် ဘုရားမျက်နှာသာရသောသူများ ဖြစ်ကြပါစေ။ အယောက်စီတိုင်း ဘုရားသခင်ကောင်းကြီးပေးပါစေ။

Daily Bread

April 19, 2024 • Pastor David Lah • John 15:16, Matthew 6:10, Matthew 16:24

                      အားလုံးပဲမင်္ဂလာပါ။ ဘုရားသခင်က အချိန်တိုင်းမှာ ကောင်းမြတ်ပြီး သစ္စာဂရုဏာနဲ့ ပြည့်စုံတဲ့ဘုရားဖြစ်တဲ့အတွက် ထိုဘုရားရှင်ရဲ့ ဂုဏ်ကျေးဇူးတော်ကို ချီးမွမ်းပါတယ်။ ဒီကနေ့ ကျွန်တော် ဝေငှချင်တဲ့ နှုတ်ကပတ်တော်ကတော့ မဿဲ 6 မှာ ပါရှိတဲ့ “နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ ပြည့်စုံသကဲ့သို့ မြေကြီးပေါ်မှာ ပြည့်စုံပါစေသော။” (မဿဲ 6:10) ဆိုတဲ့ ဆုတောင်းပဌါနာ ကိုဝေငှချင်ပါတယ်။                  နိုင်ငံတော်တည်ထောင်ခြင်းဆိုတဲ့ စကားကိုတွေ့ရတယ်။ အသက်တာမှာ နှုတ်ကပတ်တော်ကို ပိုင်းခြားမသိရင် စာတန်က ရှုပ်ထွေးအောင် လုပ်တတ်တယ်။ ယုံကြည်သူကနေ တပည့်တော်အဆင့်ကို တက်လှမ်းဖို့ ဘုရားသခင်က အလိုတော်ရှိတယ်။ ယုံကြည်သူတွေ အများကြီးရှိပေမယ့် ဘုရားသခင်ရဲ့နက်နဲတဲ့ အရာတွေကို သိခွင့်ရတာက တပည့်တော် အဆင့်မှာမှ သိခွင့်ရတာဖြစ်တယ်။ ယေရှုခရစ်တော်က ကောင်းကင်ဘုံကို မတက်ကြွခင်မှာ ပြောခဲ့တာက “သွား၍ လူမျိူးတကာတို့ကို ငါ့တပည့်ဖြစ်စေခြင်းငှာ ခမည်းတော်၊ သားတော်၊ သန့်ရှင်းသော ဝိညာဥ်တော် နာမ၌ ဗတ္တိဇံ ပေးကြပါ” လို့ မိန့်မှာခဲ့တယ်။ ယုံကြည်သူဖြစ်စေခြင်းငှာလို့ မပြောခဲ့ဘူး။                    တပည့်တော်နဲ့ ယုံကြည်သူက ဘယ်လိုကွာခြားသလဲဆိုတာ ကျွန်တော် ပြောပြသွားချင်ပါတယ်။ နိုင်ငံတော်တည်ထောင်ပါစေ အလိုတော်က ကောင်းကင်ဘုံမှာ ပြည့်စုံသလို မြေကြီးပေါ်မှာ ပြည့်စုံပါစေလို့ ပြောခဲ့တာက ကျွန်တော်တို့ အသက်တာထဲမှာ ဘုရားရဲ့နိုင်ငံတော်ကို တည်ထောင်ချင်တာ ဖြစ်တယ်။ ကောင်းကင်မှာ ဘုရားရဲ့အလိုတော် ပြည့်စုံသလို မြေကြီးပေါ်မှာ လည်း ဘုရားရဲ့အလိုတော်ကို ပြည့်စုံစေချင်တာ ဖြစ်တယ်။ သင့်အသက်တာထဲမှာ ဘုရားသခင်က ဝင်ရောက်ပြီး အုပ်စိုးတာဖြစ်တယ်။ သင့်အလိုအတိုင်း အသက်ရှင်နေတာ မဟုတ်‌တော့ပဲ ဘုရားအလိုတော်အတိုင်း ဘုရားရဲ့အုပ်စိုးခြင်းကို ခံယူလိုက်တာဖြစ်တယ်။ ဘုရားကို ဝန်ခံတဲ့အသက်တာ ဖြစ်သွားတဲ့အခါ နိုင်ငံတော်တည်ထောင်နိုင်မှာ ဖြစ်တယ်။အဲ့ဒီအခါကျမှ ဘုရားရဲ့အလိုတော်က ကောင်းကင်ပေါ်မှာ ပြည့်စုံသလို မြေကြီးပေါ်မှာ ပြည့်စုံလာမှာဖြစ်တယ်။                       သင့်ကို ဘုရားသခင်က အသွေးနဲ့ရွေးဝယ်ခဲ့တာ သူ့အလိုပြည့်စုံဖို့၊ သင့်ကိုဘုရားသခင်ချီးမြှောက်တာ သူ့အလို ပြည့်စုံဖို့ ၊ သင့်အသက်တာကို ဒီနေ့အချိန်ထိ ဘုရားသခင်ပို့ဆောင်လာတာ သင့်အသက်တာအားဖြင့် မြေကြီးပေါ်မှာ သူ့အလိုပြည့်စုံဖို့ ၊ သင့်ကို အမျိူးမျိူးသော သေခြင်းထဲကနေ ကွယ်ကာခဲ့တာ သင့်အားဖြင့် သူ့အလိုပြည့်စုံစေဖို့ဖြစ်တယ်။             အသက်တာမှာ ဘုရားကို အားကိုးခြင်းတစ်ခုခြင်းစီတိုင်းက အောင်မြင်ဖို့ သူများနဲ့မတူတဲ့ အသက်တာကို ရဖို့ အားကိုးတတ်ကြတယ်။ သင့်အလိုပြည့်စုံဖို့ သင်ဖြစ်ချင်တဲ့အရာတွေ ဖြစ်လာဖို့ရန်အတွက် ဘုရားကို အားကိုးကြတာက ကောင်းပေမယ့် သင်ဖြစ်ချင်တဲ့အရာတွေ ဖြစ်လာဖို့ ဘယ်လောက်ပဲ သင်ဆု‌တောင်းပါစေ မပေးတော့တဲ့ အချိန်တစ်ချိန်ရောက်လာရင် သင်ဘာလုပ်မလဲ? အဲ့ဒီအဆင့်ကို သွားစေချင်တာဖြစ်တယ်။                         ဘုရားက သင့်ရဲ့အထဲကနေ အလုပ် လုပ်သွားချင်တာဖြစ်တယ်။ သင့်ရဲ့အလိုကို ပြည့်စုံဖို့ သူလုပ်ပေးတဲ့အချိန် ရှိသလို သူ့အလိုကို ပြည့်စုံဖို့ လုပ်ပေးတဲ့အချိန် ရောက်လာတဲ့အခါကျရင် သူ့အလိုပြည့်စုံဖို့ သင့်အလိုကို ငြင်းပယ်ရတဲ့ အချိန်တစ်ခု ရောက်လာမယ်။ အဲ့ဒါကို ဘုရားသခင်က သူအရမ်းချီးမြှောက်မယ့် သူတိုင်းကို သင်ပေးတယ်။ ချီးမြှောက်ခံရတဲ့ သူတိုင်းက အဲ့ဒီအဆင့်ကို ကျော်ဖြတ်ရတယ်။                           ယေရှုခရစ်တော်က မုန့်ငါးလုံးနဲ့ ငါးနှစ်ကောင်ကို ချီးမွမ်းပြီး ဖဲ့ပေးနေတဲ့အချိန်မှာ အဲ့ဒီမုန့်နဲ့ငါးက ပွားနေတယ်။ ယေရှုခရစ်တော်ရဲ့ ဆုတောင်းသံကို ဘုရားက နားညောင်းပေးနေတာဖြစ်တယ်။ လာဇရု သင်္ချိူင်းမှာ သေပြီး မြေမြုပ်ထားခဲ့တာ လေးရက်ရှိပြီ။ ယေရှုရစ်တော်က ကောင်းကင်ကို မော့ကြည့်ပြီး ဒီလူတွေရှေ့မှာ ခမည်းတော်စေလွှတ်တဲ့သူ ဖြစ်ကြောင်းသိစေဖို့ ဒီအမှုအရာမှာ မစဖို့ ဆုတောင်းတဲ့အခါမှာ ဘုရားကနားညောင်းပြီး လာဇရုကို ယေရှုခရစ်တော်အားဖြင့် ပြန်ရှင်စေခဲ့တယ်။ ယေရှုက ကားတိုင်ပေါ် တက်ခါနီးမှာ “ဤခွက်သည် အကျွန်ုပ်မှ လွန်နိုင်လျင် လွန်သွားပါစေ” လို့ဆုတောင်းတယ်။ သူလုံးဝမသွားချင်ခဲ့ဘူး။ ဒါပေမယ့်ယေရှုက No Cross, No Crown ဆိုတာသိတယ်။ သူဆက်ပြီးည ဆုတောင်းခဲ့တာက “သို့သော် ကျွန်ုပ်အလိုအတိုင်း မဖြစ်ပါစေနဲ့ ကိုယ့်တော့်အလိုအတိုင်းဖြစ်ပါစေ” လို့ သူဆုတောင်းခဲ့တယ်။                           ရှင်‌ပေါလုက သူမသွားနိုင်လို့ သူ့ရဲ့ပုဝါလေးနဲ့ တင်ခိုင်းလိုက်ခြင်းအားဖြင့် အနာရောဂါကို ပျောက်စေနိုင်ဖို့ ဘုရားက အခွင့်ပေးခဲ့တယ်။ ရှင်ပေါလုရဲ့ တရားဟောပွဲမှာ ဥတုခု ဆိုတဲ့သူက အိမ်သုံးထပ်အဆင့် ကနေ ပြုတ်ကျပြီး သေသွားတဲ့အခါမှာ ရှင်ပေါလုက လက်တင် ဆုတောင်းပေးခဲတဲ့ အခါမှာ ဥတုခု အသက်ပြန်ရှင်ခဲ့တယ်။ ဒါပေမယ့် ရှင်ပေါလုက သူ့ခန္ဓာကိုယ်မှာ ဆူးနေတဲ့စူးကြောင့် သူမခံစားနိုင်လို့ ဒီရောဂါ ပျောက်ဖို့အတွက် သူဆုတောင်းတဲ့အခါမှာ သုံးကြိမ်တိုင်တိုင် အချိန်ယူပြီး ဘုရားနဲ့ ဆုတောင်းသော်ငြားလည်း သူလိုချင်တဲ့ အဖြေကို မရခဲ့ဘူး။ ရှင်ပေါလု ဆုတောင်းနေခဲ့တာ သူ့ရဲ့အလို သူ့ရဲ့ရောဂါကို ပျောက်စေချင်လို့ သူဆုတောင်းနေခဲ့တာ ဖြစ်တယ်။                         နောက်အဆင့်တစ်ခုကို ဘုရားက တက်စေချင်တဲ့အခါမှာ သင့်ရဲ့အလိုအတိုင်း ဘုရားကမပေးတော့ပဲ သူ့ရဲ့အလိုပြည့်စုံဖို့ သင့်အလိုကို ငြင်းပယ်တဲ့အချိန်ရောက်လာမယ်။ သင်က “နိုင်ငံတော်တည်ထောင်ပါစေ အလိုတော်က ကောင်းကင်ဘုံမှာ ပြည့်စုံသလို မြေကြီးပေါ်မှာ ပြည့်စုံပါစေ” လို့ ဆုတောင်းမယ်ဆိုရင်တော့ “ဤခွက်သည် အကျွန်ုပ်မှ လွန်နိုင်လျင် လွန်သွားပါစေ” ဆိုတဲ့ ယုံကြည်သူအဆင့်လောက် ဆုတောင်းချက်နဲ့ ရပ်သွားလို့ မရဘူး။ တပည့်တော်အဆင့် တက်လှမ်းတော့မယ် ဆိုရင်တော့ ဆုတောင်းချက်က ကွာသွားပြီ။ တောင်းရင် ရကို ရမယ်ဆိုတဲ့ ယုံကြည်သူရဲ့ အဆင့်ရှိခဲ့သလို တောင်းတိုင်း မရတော့မယ့် အဆင့်ကို ဘုရားက ဆွဲထုတ်တော့မှာ ဖြစ်တယ်။ သင့်အထဲမှာ နိုင်ငံတော် တည်ထောင်ဖို့ အတွက်ဆိုရင် သင့်ရဲ့ “ငါ” ကိုဘုရားက ရအောင်ဖယ်တယ်။ သင်က “ငါ” ဆိုတဲ့ အရာကို သင်ဖယ်နိုင်ပြီဆိုရင် ဘုရားရဲ့နိုင်ငံတော် တည်ထောင်ဖို့ အတွက် သင်ဆုတောင်းပါ။ သင်ဖြစ်ချင်နေတဲ့ ငါ့မိသားစုရေး ငါ့ရဲ့လူမှုရေး ငါ့ရဲ့စီးပွားရေးဆိုတဲ့ ငါဆိုတဲ့ အရာတွေက ဘုန်းတော်ကို ချိူးချတာဖြစ်တယ်။ “ထိုအခါ ယေရှုက၊ ငါ၌ဆည်းကပ်လိုသောသူဖြစ်လျှင် ကိုယ်ကိုကိုယ်ငြင်းပယ်ရမည်။ ကိုယ်လက်ဝါးကပ် တိုင်ကိုထမ်း၍ ငါ့နောက်သို့လိုက်ရမည်။” (မဿဲ16:24)                ဆုတောင်းတာကို မပေးတော့တဲ့အချိန်မှာ ဘုရားသခင်က ငါနားမလည်နိုင်တဲ့အရာကို လုပ်နေပြီး ငါ့ကို ဘုရားက နောက်ထပ်အဆင့် တစ်ခုကိုဆွဲတင်တော့မယ် ဆိုပြီး သင်စိတ်ချယုံကြည်ပါ။ သင်မမြင်ဖူးတဲ့ သင်မရဖူးတဲ့ အဆင့်ကို ဘုရားက ဆွဲတင်ဖို့အတွက် သင်လိုချင်တဲ့ ဆုတောင်းချက်တွေကို ဘုရားက ပေးမှာမဟုတ်ဘူး။ “သင်တို့သည် ငါ့ကိုရွေးကောက်ကြသည်မဟုတ်။ ငါသည် သင်တို့ကို ရွေးကောက်သဖြင့်၊ သင်တို့သည် သွား၍ တည်ကြည်သောအသီးကိုသီးမည်အကြောင်းနှင့် ငါ့နာမကိုအမှီပြု၍ ခမည်းတော်မှာတောင်းသမျှတို့ကို ရမည်အကြောင်း သင်တို့ကို ငါခန့်ထား၏။” (ယောဟန် 15:16)                    သင့်အသက်တာက စစ်မှန်သော တပည့်တော်ဖြစ်ဖို့ သင့်ကိုယ်သင် ငြင်းပယ်ရမယ်။ အဲ့ဒီအထဲမှာ ဝမ်းနည်းခြင်းတွေရှိမယ်၊ ချိူးဖဲ့ခြင်းတွေရှိမယ်၊ နာကျင်ခြင်းတွေ ရှိမယ်။ သင့်အနေနဲ့ သိပ်နာကျင်ရလိမ့်မယ်။ ဒါပေမယ့် မျိူးစေ့ကောင်းထွက်လာဖို့က သင့်ရဲ့မာကြောနေတဲ့ အခွံတွေကို ခွဲထုတ်ခြင်း ထုထောင်းခြင်း ဖျက်ဆီးခြင်း ခံရမယ်။ သင့်အနေနဲ့ အရမ်းနာကျင်ရပါလိမ့်မယ်။ အခွံမာတွေကို ခွာနေတဲ့အချိန်မှာ သင်နာကျင်လွန်းလို့ မခံနိုင်ပဲ ဘုရားကို တောင်းလျှောက် အော်ဟစ်နေပေမယ့် ဘုရားက သင့်ကို ငါ့သား ငါ့သမီး ခဏစောင့်ပါ ၊ မကြာခင်မှာ အညှောင့်လေး ထွက်လာတော့မယ်။ သိပ်ကောင်းတဲ့ အပင်လေး မင်းဆီမှာ ပေါ်ထွက်လာ‌တော့မယ်။ မကြာခင်မှာ များစွာသော တည်ကြည်တဲ့အသီးတွေ ထွက်လာတော့မယ်လို့ ဘုရားက သင့်ကို ပြောနေပါမယ်။ မြေကြီးရဲ့ဖိအားလို နာကျင်မှုတွေ ချိူးဖဲ့ခြင်းတွေကို တွန်းကန်ပြီး အသစ်တစ်ဖန် ထွက်ပေါ်လာမယ့် သင့်အသက်တာက ဘုရားနိုင်ငံတော် တည်ထောင်စေခဲ့ပြီ။                    တစ်ခါတစ်လေ သင့်ကို comfort zone ထဲကနေ ဘုရားသခင်က ဆွဲထုတ်တဲ့အချိန်ရှိပါတယ်၊ ဒါပေမယ့် သင်စိတ်ဓါတ်မကျပါနဲ့၊ ဘုရားသခင်က သင့်အတွက် အကောင်းဆုံးကို ပြင်ဆင်ထားပြီးသားဖြစ်တယ်။ ဘယ်အချိန်မှ သိရလဲဆိုရင် အသီးက ကွဲအက်ပြီး အတွင်းကမျိူးစေ့ အပင်ပေါက်လာတဲ့အခါ တည်ကြည်သောအသီးကို သီးနိုင်လာချိန်မှာ ကျေးဇူးတင်လိုက်တာ ကိုယ်တော်ရယ် လို့ သင်ချီးမွမ်းနိုင်ခဲ့ပြီ။ သင့်အထဲမှာ ဘုရားသခင်၏ နိုင်ငံတော်တည်ထောင်ပါစေ ၊ အလိုတော်သည် ကောင်းကင်ဘုံ၌ ပြည့်စုံသကဲ့သို့ မြေကြီးပေါ်မှာလည်း သင့်အားဖြင့် ဘုရားအလိုတော် ပြည့်စုံပါစေ။ မျက်ရည်ကျပြီး စိုက်ခဲ့ရပေမယ့် ဝမ်းမြောက်စွာ ရိတ်သိမ်းရတဲ့ ကောက်လှိုင်းတွေအတွက် ဘုရားသခင်ရဲ့ အလိုတော်ကို ပြည့်စုံစေသူများ ဖြစ်ကြပါစေ။ အယောက်စီတိုင်း ဘုရားသခင်ရဲ့ နိုင်ငံတော်ကို တည်ထောင်ခွင့် ရသူများဖြစ်ကြပါစေ။

Daily Bread

April 18, 2024 • Pastor David Lah • Psalm 34:18, Judges 11, 2 Corinthians 4:17–18

                        ဒီကနေ့က ဘုရားသခင်စီရင်သောနေ့ ဖြစ်တဲ့အတွက် ဝမ်းမြောက်စွာ အသက်ရှင်ဖို့ အကြောင်းပဲဖြစ်တယ်၊ သင့်ရဲ့ဝမ်းမြောက်ခြင်းကို ဘယ်သူမှမခိုးယူပါစေနဲ့။ ဘုရားသခင်က အင်မတန်မှ ကောင်းမြတ်တဲ့ ဘုရားရှင်ဖြစ်တယ်။ မျှော်လင့်လျက်ဝမ်းမြောက်ပါ၊ အားယူ၍ရဲရင့်ပါ၊ အခုအချိန်မှာတော့ နားမလည်နိုင်တဲ့သူတွေရှိမယ်။ အိမ်ထောင်ရေး အဆင်မပြေသူတွေ အခက်အခဲတွေနဲ့ ထိပ်တိုက် ကြုံတွေ့နေရသူတွေ အလုပ်ရဲ့ပြဿနာ သားသမီးရဲ့ပြဿနာ စသဖြင့် ပြဿနာ အခက်အခဲပေါင်း မြောက်များစွာ ရင်ဆိုင်နေရပြီး စိတ်ဓါတ်ကျ စိတ်ပျက်နေသူတွေ အများကြီး ရှိနေပါလိမ့်မယ်။ “Turn your pain into power” ဆိုတဲ့စာကြောင်းကို ကျွန်တော်ဖတ်မိတဲ့အခါ ကျွန်တော့်အနေနဲ့ ကျွန်တော့်ညီအစ်ကို မောင်နှမတွေကို နှုတ်ကပတ်တော်ဝေငှစရာ အကြောင်းဖြစ်လာခဲ့တယ်။ သင့်ဘဝမှာ ဆုံးရှုံးခြင်း၊ဝမ်းနည်းခြင်း၊ကျဆုံးခြင်းတွေနဲ့ ကြုံလာရတဲ့အခါမှာ အဲ့ဒီဆုံးရှုံးခြင်းတွေနဲ့ ညီမျှတဲ့ အောင်မြင်ခြင်းကို ဘုရားရှင်က ပြန်လည်ပေးနိုင်တာဖြစ်တယ်။ “ထာဝရဘုရားသည် ကျိုးပဲ့သောစိတ်ရှိသော သူတို့နှင့် နှလုံးကြေကွဲသောသူတို့ကို နီးတော်မူ၏။ နောင်တရှိ၍ စိတ်နှိမ့်ချသောသူတို့ကိုလည်း ကယ်တင် တော်မူ၏။”(ဆာလံ34:18)                         ဝမ်းနည်းကြေကွဲနေရတဲ့သူတွေရဲ့အနီးအနားမှာ အမြဲရှိနေခဲ့တာ ဘုရားရှင်ဖြစ်တယ်။ “Warren Buffett” ဆိုတဲ့ ကမ္ဘာ အချမ်းသာဆုံးထဲက တစ်ယောက်ဖြစ်သူက ကုမ္ပဏီတွေမှာ ရှယ်ယာဝင်တဲ့အခါ အဲ့ဒီကုမ္ပဏီက နှစ်ခါလောက် မရှုံးဖူးဘူးဆိုရင် အဲ့ဒီကုမ္ပဏီနဲ့ သူအလုပ် မလုပ်တော့ဘူး၊ ရှုံးနိမ့်ဖူးတဲ့သူကပဲ ကြီးမားခိုင်ခံ့သော အောင်မြင်ခြင်းကို ထိန်းသိမ်းထားနိုင်တဲ့သူ ဖြစ်တယ်။ ၂ ခေါက်လောက် အနည်းဆုံး ကြီးမားစွာဆုံးရှုံးမှု မရှိတဲ့သူနဲ့ သူအလုပ်မလုပ်ဖူး လို့ပြောတယ်။ ဆုံးရှုံးဖူးပြီး ပြန်ကြိုးစားတတ်တဲ့ သူနဲ့ပဲ သူကအလုပ်လုပ်တယ်။ ဘာကြောင့်လဲ ဆိုတော့ ရှုံးနိမ့်ဖူးတဲ့သူက အောင်မြင်မှုကို ရတဲ့အခါ ရေရှည်ကိုင်တွယ်ထားနိုင်မယ်။ ရှုံးနိမ့်ခြင်းတွေ ကသင့်အတွက် အချည်းအနှီးမဟုတ်ပါဘူး။                   ဆုံးရှုံးခြင်းနဲ့ညီတဲ့ အောင်မြင်ခြင်းက အနာဂတ်မှာ သင့်ကိုစောင့်နေတယ်၊ အချိန်တန်တဲ့အခါ ဘုရားသခင်က လှပစွာ လုပ်သွားမှာဖြစ်တယ်။ သင့်ရဲ့ အနာကျင်ဆုံးအရာတွေထဲကနေ အကောင်းဆုံးအရာတွေ ထွက်ပေါ်လာတတ်ပါတယ်။ သင်က why me ကနေ  try me လို့သာ ပြောင်းလဲလိုက်ပါ။ကျွန်တော်တို့ ယုံကြည်သူ ဘုရားသားသမီးတွေက အခက်အခဲတွေနဲ့ ကြုံတွေ့ရတဲ့အခါကျရင် ဘာကြောင့် ငါ့ကိုမှ ဒီလိုအခက်အခဲတွေ ကြုံရတာလဲ?Why me? လို့ မေးနေမယ့်အစား ငါရင်ဆိုင်နိုင်တယ် ငါ့ဘုရားရှင်အားဖြင့် ငါက အောင်မြင်မယ်၊ Try me! လို့ ပြောလိုက်စမ်းပါ။ ဆုံးရှုံးခြင်း ဝမ်းနည်းခြင်းတွေထဲကနေ ငါပြန်သင်ယူပြီး အဲ့ဒီအထဲကနေ ငါအောင်မြင်မှုတွေ ရယူပြမယ် ၊ ဘုရားရှင်က အကောင်းဆုံး ငါ့အတွက် ပြင်ဆင်ထားတယ်လို့ ဝန်ခံလိုက်ပါ။ ဘောလုံးတစ်လုံးကို သင်က အရှိန်ထည့်ပြီး ရိုက်ချတဲ့အခါ သင်ရိုက်ချသလောက် ဘောလုံးက မြောက်တက်သွားနိုင်တာ ဖြစ်တယ်။ အနာကျင်ဆုံး ဘဝကနေ ထိပ်ဆုံးကို ရောက်ဖို့ရန်အတွက် ဘုရားက ပြင်ဆင်ထားပြီးသားဖြစ်တယ်။                       Apple ကွန်ပြူတာကို စတင်တီထွင်ခဲ့သူ “Steve jobs” ကအသက် ၂၁ အရွယ်မှာ Apple ကုမ္ပဏီကို စတင်တည်ထောင်ခဲ့သူဖြစ်တယ်။ အသက်၂၃ အရွယ်မှာ သူ့ရဲ့ Apple ပစ္စည်းတွေကို ကမ္ဘာက စတင်အသုံးပြုလာကြတယ်။ အသက် ၃၀ အရွယ်မှာ သူ့ရဲ့ Apple ကုမ္ပဏီက ပစ္စည်းတွေကို ကမ္ဘာက တွင်တွင်ကျယ်ကျယ် အသုံးပြုနေပြီ ဖြစ်တယ်။ အဲ့ဒီအချိန်မှာ သူစတင်တည်ထောင်ခဲ့တဲ့ သူ့ကုမ္ပဏီက ဒါရိုက်တာအဖွဲ့ဝင်တွေနဲ့ အပေးအယူမတည့်တာတွေ အမြင်မတူတာတွေ ဖြစ်လာခဲ့တယ်။ သူစတင်တည်ထောင်တဲ့ ကုမ္ပဏီကပဲ သူ့ကို မောင်းထုတ်ပစ်ခဲ့တယ်။ သူထွက်သွားခဲ့ရတယ်။                  ဒါပေမယ့် သူထွက်သွားခဲ့ရပြီးနောက်မှာ ကုမ္ပဏီအသစ်တစ်ခုကို စတင်တည်ထောင်ခဲ့တယ်။ ပစ္စည်းအသစ်နဲ့ ကုမ္ပဏီအသစ်ကို သူစတင်ခဲ့တယ်။ သူအသစ်လုပ်ခဲ့တဲ့ အရာကို သူ့ကိုထုတ်ခဲ့တဲ့ Apple ကုမ္ပဏီက အရမ်း ရချင် လာခဲ့ကြတယ်။ အဲ့ဒီ ကုမ္ပဏီကို Apple ကုမ္ပဏီက ဝယ်ယူခဲ့ပြီး “Steve jobs” ကို Apple ကုမ္ပဏီရဲ့ CEO အဖြစ်နဲ့ ပြန်ဖြစ်လာစေခဲ့တယ်။ သူနောက်ဆုံးပြောခဲ့တဲ့ မိန့်ခွန်းမှာ “ငါ့ကိုသာ အဲ့ဒီ Apple ကုမ္ပဏီကသာ မောင်းမထုတ်ခဲ့ဘူးဆိုရင် သူများတစ်ခါမှ မလုပ်ဖူးတဲ့ ကုန်ပစ္စည်းအသစ်ကို ငါလုပ်နိုင်မှာ မဟုတ်ဘူး” လို့ပြောခဲ့တယ်။ သူအသစ်တီထွင်လိုက်တဲ့ ကုန်ပစ္စည်းက Apple ကုမ္ပဏီမှာ မရှိမဖြစ် လိုအပ်တဲ့ အရာတစ်ခု ဖြစ်လာခဲ့ရတယ်။ လောကမှာ သင်ဆုံးရှုံးနေလား? သင်ဝမ်းနည်းနေရလား? အဲ့ဒါတွေအားလုံးက တစ်နေ့ သင့်အတွက် ကုန်ကြမ်းတွေပဲဖြစ်တယ်။ သင့်အတွက် အကြီးမားဆုံး အောင်မြင်ခြင်း ရလာမှာဖြစ်တယ်။                        တရားသူကြီးမှတ်စာ ၁၁ ကအကြောင်းအရာလေးနဲ့ ခွန်အားပေးချင်ပါတယ်။ ဂိလဒ်ဆိုတဲ့သူတစ်ယောက်က ပြည့်တန်ဆာမနဲ့ သွားအိပ်မိပြီး ကလေးရသွားခဲ့တယ်။ ပြည့်တန်ဆာမကလည်း ကလေးကို မွေးပြီး ဂိလဒ်အိမ်မှာ သွားပစ်ထားခဲ့တယ်။ အဲ့ဒီကလေးကို ယေဖသလို့ ခေါ်တယ်။ ဂိလဒ်ရဲ့မိသားစုတွေက အဲ့ဒီကလေးကို လုံးဝဂရုမစိုက်ခဲ့ဘူး၊ အရွယ်တစ်ခုရောက်တဲ့အခါမှာ ဂိလဒ်ရဲ့ သားသမီးတွေက ယေဖသကို သူတို့နဲ့အတူ အမွေမခံထိုက်ဘူး နင်က ပြည့်တန်ဆာမရဲ့သားဖြစ်တယ်။ အမေကလည်း ပြည့်တန်ဆာမဖြစ်ပြီး မေတ္တာမပေးခဲ့ဘူး၊ အဖေကလဲ မတတ်သာလို့ လက်ခံလိုက်ရတာဖြစ်ပြီး သူ့ကို ဂရုမစိုက်ဘူး မချစ်ဘူး၊ ညီအစ်ကိုမောင်နှမတွေကလည်း သူ့ကို မောင်နှမအဖြစ် မသတ်မှတ်ကြဘူး။ အမျိူးထဲမှာ အမွေမခံထိုက်သူဖြစ်တဲ့အတွက် အိမ်ကနေ မောင်းထုတ်ခြင်းခံခဲ့ရတယ်။ ဒီအခါ ယေဖသက တစ်ယောက်ထဲ ရပ်တည်ရပေမယ့် သူက ဘုရားကို အားကိုးခဲ့တယ်။ ဘုရားကိုပဲခေါ်ခဲ့တယ်။ ဘုရားနဲ့ပဲ မိဿဟာယဖွဲ့တယ်။ ယေဖသက လူ့အနေနဲ့ အင်မတန် ဝမ်းနည်းစရာ ကောင်းပါတယ်။               ယေဖသက တောထဲမှာနေရင်းနဲ့ တိုက်ခိုက်ရေးမှာ ကျွမ်းကျင်သူဖြစ်လာတယ်။ သူ့ထံမှာ လာပြီးတပည့်ခံသူတွေလဲ ရှိလာခဲ့တယ်။ အဲ့ဒီအခါမှာ အမ္မုန်အမျိူးသားတွေက ဣသရေလအမျိူးကို စစ်လာတိုက်ကြတဲ့အခါမှာ တောထဲမှာ ရှိနေတဲ့ တစ်ချိန်က သူတို့မောင်းထုတ် ပစ်ပယ်ထားကြတဲ့ ယေဖသကို သတိရလာကြတယ်။ ယေဖသက စစ်သူကြီးအနေနဲ့ တိုက်ပွဲတွေ တစ်ခုပြီး တစ်ခုမှာ အောင်မြင်နေသူဖြစ်နေခဲ့ပြီ။ ယခင်က ဖိနှိပ်ခံရပြီး မောင်းထုတ်ခံရတဲ့ ယေဖသကို ခေါင်းဆောင်လုပ်ပေးဖို့ ခေါ်ကြတယ်။ အောက်ဆုံးကနေ အမြင့်ဆုံးကို ပြန်ချီးမြှောက်ခြင်းခံရတယ်။                                   အသက်တာမှာ သင်အနေနဲ့ ဘုရားကိုပဲအားကိုးပါ။ အဲ့ဒီဘုရားက “Turned your pain into power” ဖြစ်စေမှာ ဖြစ်တယ်။ သင်မသိလိုက်တဲ့အရာက သင့်အထဲက ဘုရားပြင်ဆင်ထားပေးတဲ့ သင့်ရဲ့လုပ်နိုင်စွမ်းက သင်ထင်ထားတာထက် ပိုကြီးပါတယ်။ သင့်ကိုယ်သင် ဘယ်တော့မှ ကန့်သတ်မထားပါနဲ့။ သင့်ဘဝမှာ အဖိနှိပ်ခံရဆုံးအရာက အအောင်မြင်ဆုံးအရာပြန်ဖြစ်စေတယ်။ နှုတ်ကပတ်တော်ထဲမှာ သင်ဆုံးရှုံးသွားတဲ့အရာတွေထက် ခုနှစ်ဆ ပြန်ကောင်းကြီးပေးမယ့် ဘုရားလို့ ပြောထားတာဖြစ်တယ်။ သင်အဆုံးရှုံးဆုံး အခြေအနေနဲ့ရင်ဆိုင်ရလား? သူများမှာ မရှိတဲ့အစွမ်းအစတွေ သူများမှာ မရှိတဲ့အောင်မြင်ခြင်းတွေ ဘုရားသခင်က ပေးဖို့ပြင်ဆင်ထားပြီးသားဖြစ်တယ်။ “အ​ကြောင်း​မူ​ကား၊ မျက်​မှောက်၌​ထင်​ရှား​သော အ​ရာ​တို့​သည် ခ​ဏ​သာ​တည်၍ မ​ထင်​ရှား​သော​အ​ရာ​တို့​သည် အ​စဉ်​အ​မြဲ​တည်​ကြောင်း​ကို ငါ​တို့​သည် ထောက်​လျက်၊ ထင်​ရှား​သော အ​ရာ​တို့​ကို မ​ကြည့်​မ​မှတ်​ဘဲ မ​ထင်​ရှား​သော​အ​ရာ​တို့​ကို ကြည့်​မှတ်​ကြ​စဉ်​အ​ခါ၊ ယ​ခု​ခ​ဏ​ခံ​ရ၍ ပေါ့​ပါး​သော ဆင်း​ရဲ​ခြင်း​ဒု​က္ခ​သည် အ​တိုင်း​ထက်​အ​လွန် ကြီး​မြတ်​လေး​လံ​သော နိ​စ္စ​ထာ​ဝ​ရ​ဘုန်း​အ​သ​ရေ​ကို ငါ​တို့​အ​ဖို့ ဖြစ်​စေ​တတ်၏။” (၂ ကောရိန္သု 4:17-18)                        ဆုံးရှုံးခြင်းနဲ့ညီတဲ့ အောင်မြင်ခြင်း ၊ နာကျင်ခြင်းနဲ့ညီတဲ့ အောင်မြင်ခြင်း ကို ဘုရားသခင်ကပြန်ပေးပါတယ်။ ကျေးဇူးတော်ချီးမွမ်းပြီး ဒီမုန်တိုင်းကို ကျွန်တော်တို့ ဖြတ်သန်းကြပြီးတဲ့အခါ သင်ဝမ်းမြောက်စရာအကြောင်းနဲ့ သက်သေခံစရာအကြောင်းတွေ ဖြစ်လာပါမယ်။ အယောက်စီတိုင်းဘုရားရှင် ကောင်းကြီးပေးပါစေ။  

Daily Bread

April 17, 2024 • Pastor David Lah • James 4:7, Galatians 2:20, John 15:4, 1 Peter 1:18–19, 1 Timothy 2:4

                      ဘုရားသခင်သည် ကောင်းမြတ်တော်မူ၍ ကရုဏာတော်သည် မကုန်သောကြောင့် ဂုဏ်ကျေးဇူးတော်ကို ချီးမွမ်းပါတယ်။ ဘုရားသခင်ထံမှလာတဲ့ ငြိမ်သက်ခြင်း ဝမ်းမြောက်ခြင်း ကျန်းမာခြင်း တို့သည် သင်နှင့်သင့်မိသားစုအပေါ်သို့ သက်ရောက်ပါစေလို့ ယေရှုခရစ်တော်နာမ၌ ဆုတောင်းပေးလိုက်ပါတယ်။ ဘယ်အခြေအနေကမှ သင့်ကိုမလှည့်ဖျားစေပါနဲ့။ ကျွန်တော်တို့ ဝမ်းမြောက်ကြရအောင်။ အကောင်းဆုံးဘုရားက ပြင်ဆင်ထားပြီးသားဖြစ်တယ်။ ကျွန်တော်တို့ တောင်းပန်ကြံစည်သမျှထက် ပိုမိုထူးခြားသော အရာတွေကို ဘုရားသခင်က ကျွန်တော်တို့အတွက် ပြင်ဆင်ထားပြီ ဖြစ်တယ်။                    စာတန်က ကျွန်တော်တို့ဆီရောက်လာမယ့် အဲ့ဒီအရာတွေကို မရောက်လာဖို့အတွက် ဆီးတားမယ် ဖျက်ဆီးမယ် ခိုးမယ် ။ ဒါတွေက သူလုပ်ရမယ့် အလုပ်တွေပဲဖြစ်တယ်။ ဘုရားသခင်က သင့်ကို ကြီးမားသောအကြံအစည်နဲ့ ချီးမြှောက်တော့မယ် ဆိုတာသိရင် စာတန်က ဘယ်တော့မှ အငြိမ်မနေဘူး။ မာရ်နတ်ရဲ့  လုပ်ရပ်က ဒီအတိုင်းပဲ။ သူများကောင်းစားရင် သူများတိုးတက်ရင် မနာလိုတဲ့သူတွေက မာရ်နတ်ရဲ့ ထိန်းချူပ်မှုကို ခံနေရသူတွေပဲ။ ကိုယ်က ဘုရားသခင်ရဲ့  အလိုတော် အကြံအစည်ထဲမှာ သွားလာနေရင် သူ့အကြံအစည်က လုံးဝမထမြောက်စေရဘူး။ ဘုရားသခင် အကြံအစည်သာလျင် ကျွန်တော်တို့အသက်တာမှာ ပြည့်စုံလာမှာဖြစ်တယ်။                    ကျွန်တော်တို့အပေါ်မှာ ဘုရားသခင် အကြံအစည် ရှိတာနဲ့အမျှ မာရ်နတ်က ဆွဲချဖို့ ကြံစည်နေတာဖြစ်တယ်။ မာရ်နတ်ရဲ့ပရိယာယ်တွေကို ကျွန်တော်တို့ ဘယ်လိုဆီးတားကြမလဲ? ပရိယာယ်တွေကို အောင်မြင်စွာနဲ့ ကျော်လွှားနိုင်ဖို့ ဘယ်လိုလုပ်မလဲ? “ထိုကြောင့်၊ ဘုရားသခင်၏အလိုတော်သို့ လိုက်ကြလော့။ မာရ်နတ်ကို ဆီးတားကြလော့။ သို့ပြုလျှင်၊ သူသည် သင်တို့ထံက ပြေးသွားလိမ့်မည်။”(ရှင်ယာကုပ် 4:7) ယုံကြည်သူထဲကို စာတန်ဝင်လို့ရလား? ဆိုတဲ့မေးခွန်းကို မေးတဲ့အခါ ရတယ် ၊ မရဘူး ငြင်းခုံကြတယ်။ ကျွန်တော် ကတော့ ယုံကြည်သူထဲကို စာတန်ဝင်လို့ မရဘူးလို့ ပြောချင်ပါတယ်။ “ငါသည်ခရစ်တော်နှင့်အတူ လက်ဝါးကပ်တိုင်မှာ အသေခံပြီ။ သို့သော်လည်းအသက်ရှင်သေး၏။ ထိုသို့ဆိုသော် ငါသည် ကိုယ်တိုင်မရှင်၊ ခရစ်တော်သည် ငါ၌ ရှင်တော်မူ၏။”(ဂလာတိ 2:20)                                   ခရစ်တော်က ကျွန်တော့်အထဲမှာ အသက်ရှင်တာဖြစ်တယ်။ ယုံကြည်သူတစ်ဦးရဲ့အထဲမှာ ခရစ်တော်ကနေရာယူ အသက်ရှင်တာဖြစ်တယ်။ တနည်းအားဖြင့် သန့်ရှင်းသောဝိညာဥ်တော်က လာရောက်ပြီး ကျွန်တော်တို့အထဲမှာ နေရာယူတာဖြစ်တယ်။ ကျွန်တော်တို့ရဲ့ အိမ်ပိုင်ရှင်က ကျွန်တော်မဟုတ်တော့ဘူး။ ခရစ်တော်ဖြစ်သွားခဲ့ပြီ။ ငါ၌တည်နေကြလော့ ငါသည်လည်း သင်တို့၌တည်နေမည်။ လို့နှုတ်ကပတ်တော် ရှိပြီးသားဖြစ်တယ်။  “ငါ၌တည်နေကြလော့။ ငါသည်လည်း သင်တို့၌တည်နေမည်။ စပျစ်ခက်သည် အပင်၌မတည်လျှင်၊ ကိုယ်အလိုအလျောက် အသီးမသီးနိုင်သကဲ့သို့၊ သင်တို့သည် ငါ၌မတည်လျှင် အသီးမသီးနိုင်ကြ။”(ယောဟန် 15:4)                            ခရစ်တော်က သင့်အထဲမှာ တည်ရှိနေမှတော့ စာတန်က သင့်အထဲကို ဝင်လို့ရတော့မလား? သင့်ကို အသွေးတော်နဲ့ ရွေးဝယ်လိုက်ပြီးဖြစ်တဲ့အတွက သင့်ကို သူပိုင်သွားခဲ့ပြီ။ သင်က ပစ္စည်းတစ်ခုကို တန်ရာတန်ကြေးပေးပြီး ရွေးဝယ်ထားရင် အဲ့ဒီပစ္စည်းက သင်ပိုင်တဲ့ပစ္စည်းဖြစ်သွားခဲ့ပြီ။ သူများလာပိုင်လို့မရတော့ဘူး။ သူများက ပိုင်ဆိုင်မရတော့ရင် ပိုင်ဆိုင်ချင်လွန်းအားကြီးတော့ လာခိုးဖို့ကြံစည်နိုင်တယ်။ သူခိုးသည် ခိုးခြင်း သတ်ခြင်း ဖျက်ဆီးခြင်းငှာ လာတတ်၏ လို့ နှုတ်ကပတ်တော်ရှိတယ်။ ဒါကြောင့် ခရစ်တော်က ငိုက်မြည်းအိပ်ပျော်ခြင်းမရှိပဲ ကြည့်နေတာဖြစ်တယ်။ မိစဉ်ဘဆက်ကျင်လည်သော အချည်းနှီးကျင့်ကြံပြုမူခြင်းမှ၊ ရွှေငွေအစရှိသော ဖောက်ပြန် ပျက်စီး တတ်သော ဥစ္စာနှင့် သင်တို့ကို ရွေးတော်မူသည်မဟုတ်။အဘယ်အပြစ်မျှမရှိ၊ အညစ်အကြေးနှင့် ကင်းစင်သော သိုးသငယ်ကဲ့သို့သော ခရစ်တော်၏ အသွေး တော်မြတ်နှင့်ရွေးတော်မူသည်ကို သိမှတ်ကြလော့။ ၁ပေ 1:18-19                   ဘုရားက ကျွန်တော်တို့ကို သူ့အသွေးတော်နဲ့ရွေးကောက်ထားပြီ ဖြစ်တဲ့အတွက်ကြောင့် ကျွန်တ်ောတို့ကို ဘုရားသခင်က ပိုင်သွားပြီဖြစ်တယ်။ ကျမ်းစာထဲမှာ နတ်ဆိုး လေဂေါင်ကို ယေရှုက နှင်ထုတ်တဲ့အခါ သူကအဲ့ဒီလူဆီက ထွက်သွားခဲ့ရတယ်။ အဲ့ဒီလူက မယုံကြည်သူဖြစ်တယ်။နတ်ဆိုးက သူ့အထဲကို ဝင်ပြီးနေရာယူထားတာဖြစ်တယ်။ ကျွန်တော်တို့ကတော့ ယေရှုခရစ်တော်ရဲ့ အသွေးတော်နဲ့ ‌ရွေးကောက်ခြင်းခံထားရပြီးသူတွေ ဖြစ်တယ်။ သင်က ပိုင်ရှင်ရှိပြီးသားဖြစ်တယ်။ အိမ်တစ်အိမ်မှာ ပိုင်ရှင်ရှိနေရင် ဘယ်သူက လာတက်နေလို့ရမလဲ? ပိုင်ရှင်က သူ့အိမ်ကို လုံခြုံစွာ သော့ခတ်ထားရင် ဘယ်သူက လာခိုးလို့ရမလဲ?  တစ်ခုသတိထားရမှာက ဟောက်သောခြင်္သေ့ကဲ့သို့ အဘယ်သူကိုမျိူရမည်နည်း ဆိုပြီး လှည့်လည်ချောင်းမြောင်းနေတာဖြစ်တယ်။ ယုံကြည်သူ သား သမီးတွေက ဘုရားကို ကျောခိုင်းနေရင်တော့ သတိပြုပါ။ ယုံကြည်သူထဲကို စာတန်ဝင်လို့ မရပေမယ့် ယုံကြည်သူတိုင်းကို idea ထည့်ပေးလို့ရတယ်။                     ယုံကြည်သူကို စာတန်က တိုက်ချင်ရင် အတွေးအခေါ်နဲ့တိုက်တယ်။ ကျမ်းစာထဲမှာ နတ်ဆိုးက ထွက်သွားတာ တစ်ကောင်ပဲ။ ဒါပေမယ့်နတ်ဆိုးက  ပြန်ဝင်တဲ့အခါ နောက်ထပ်နတ်ဆိုးတွေခေါ်ပြီး ဝင်နိုင်တယ် လို့ပြောထားတာက သူ့မှာ ပိုင်ရှင်မရှိလို့ ဖြစ်တယ်။ ပိုင်ရှင်ရှိရင်သူက ဘယ်လို ဝင်လို့ရမလဲ? ပိုင်ရှင်မရှိလို့သာ နတ်ဆိုးက ဝင်ခွင့်ရသွားတာဖြစ်တယ်။ ပိုင်ရှင်မရှိသေးရင် သင်သတိထားပါ။ စာတန်က ယုံကြည်သူရဲ့  အတွင်းနှလုံးသားကို ဝင်လို့မရတဲ့အခါ အတွေးအခေါ်နဲ့တိုက်ခိုက် တာဖြစ်တယ်။ မင်းက မကောင်းဘူး၊ မစုံလင်ဘူး၊ ညစ်ညူးတယ်၊ မင်းက မင်းက ဆိုတဲ့ အရာတွေနဲ့ သင့်ကို အားငယ်စိတ်ဝင်လာစေတယ်။ မိမိကိုယ်မိမိ သနားတဲ့စိတ်တွေ ဖြစ်လာတယ်။ အားငယ်စိတ်တွေများလာတဲ့အခါ သူများက ကိုယ့်ကိုစကားတစ်ခွန်းပြောလာရင် အဲ့ဒီစကားတစ်ခွန်းက ကိုယ့်ကိုကိုယ် သတ်သေချင်လောက်တဲ့စိတ် ဖြစ်သွားတဲ့အထိ ဖြစ်စေနိုင်တယ်။ စာတန်က ကိုယ့်ကို တိုက်ရိုက် ဆွဲချလို့မရတဲ့အခါ သူသုံးလို့ရတဲ့ အခြားတစ်ယောက်နဲ့ ကိုယ့်ကို လာတိုက်ခိုက်တယ်။                       အားငယ်စိတ် သိမ်ငယ်စိတ်ဝင်နေတယ်ဆိုတာ စာတန်ရဲ့လုပ်ရပ်ကို သင်က အခွင့်ပေးနေတာဖြစ်တယ်။ သင်ဘယ်သူလဲဆိုတာ သင့်ကိုယ်သင်မသိတာဖြစ်တယ်။ ကြောက်တတ်တဲ့စိတ်က သင့်ကို မှားယွင်းမှုတွေဖြစ်စေတယ်။ စာတန်က သင့်ကို အတွေးအခေါ်နဲ့ လာတိုက်ခိုက်နိုင်တာဖြစ်တယ်။ စာတန်က သင့်ကို အားငယ်စိတ်တွေ လာထည့်ရင် သင်အနေနဲ့ ယေရှုအားဖြင့်သင်က တတ်စွမ်းနိုင်သောသူလို့ ကြော်ြငာလိုက်ပါ။ သင့်ကို စာတန်က မပြည့်စုံသူလို့ ပြောလာရင် သင်က ယေရှုအားဖြင့် ဘုန်းအာနုဘော်၌စံပယ်တော်မူသော စည်းစိမ်ရှိသူလို့ ကြော်ြငာလိုက်ပါ။ သင့်ကို စာတန်က မကျန်းမာသူလို့ လာပြောရင် သင်က ယေရှုခရစ်တော်ခံပေးခဲ့တဲ့ ဒဏ်ရာဒဏ်ချက်တော်များအားဖြင့် သင်ကကျန်းမာသောသူလို့ ဝန်ခံလိုက်ပါ။ လူအပေါင်းတို့သည် ကယ်တင်ခြင်းသို့ရောက်၍ သမ္မာတရားကို သိစေခြင်းငှါ၊ ဘုရားသခင်အလိုတော် ရှိ၏။၁တိ 2:4                         ကျွန်တော်တို့ကယ်တင်ခြင်းကို ရပြီးကျေနပ်နေဖို့မဟုတ်ဘူး။ ကယ်တင်ခြင်းကို ရပြီး သမ္မာတရားနဲ့ လိုက်လျှောက် အသက်ရှင်တတ်ဖို့ အရေးကြီးပါတယ်။ ကိုယ့်ကို တိုက်ရိုက် တိုက်ခိုက်လို့မရတဲ့အခါမှာ အတွေးအခေါ်နဲ့ မာရ်နတ်က တိုက်တယ်။ သင့်ဆီမှာ သမ္မာတရားသာ မရှိနေရင် မာရ်နတ်ထည့်ပေးတဲ့ အတွေးအခေါ်အောက်မှာ သင်ကကျရှုံးမယ်။ မာရ်နတ် ထည့်ပေးချင်တဲ့ အတွေးအခေါ်ကို သင်က နှုတ်ကပတ်တော်နဲ့ ပြန်ထည့်ပေးနိုင်ရင် သင်ကမာရ်နတ်ကို ဆီးတားအောင်မြင်နိုင်သောသူ ဖြစ်သွားမယ်။ သမ္မာတရားကိုခံယူပြီး နှိုးဆော်သံကို နားလည်သူ နားထောင်သူက မင်္ဂလာရှိသောသူဖြစ်တယ်။                             နှုတ်ကပတ်တော်နဲ့ သင့်အသက်တာကို တည်ဆောက်ပါ။ သင့်အတွေးအခေါ်ကို နှုတ်ကပတ်တော်နဲ့ ဖြည့်ပါ။ ကျေးဇူးတော်များများ ချီးမွမ်းပါ။ နှုတ်ကပတ်တော်က သင့်ရဲ့ခြေရှေ့မှာ မီးခွက်ဖြစ်ပြီး သင့်လမ်းခရီးကို လင်းစေမယ်လို့ ကျမ်းစာလာတဲ့အတိုင်း စာတန်ဆွဲချချင်တဲ့ မှောင်မိုက်ထဲမှာ သင်လမ်းမလျှောက်မိဖို့က နှုတ်ကပတ်တော်ဆိုတဲ့ အလင်းနဲ့ သင့်အသက်တာမှာ အသက်ရှိသွားနိုင်ဖို့ပဲဖြစ်တယ်။ ယုံကြည်သူမှန်ရင် မာရ်နတ်က သင့်အထဲကို ဝင်လို့မရဘူး။ ဒါပေမယ့် သင့်အတွေးအခေါ်ကို ဖျက်ဆီးဖို့ ကြံစည်မှာဖြစ်တယ်။ သင်က နှုတ်ကပတ်တော်နဲ့ သွားလာတဲ့သူဖြစ်ရင် မာရ်နတ်ကို သင်ဆီးတားနိုင်သူဖြစ်ပြီ။ နှုတ်ကပတ်တော်နဲ့မရပ်တည်နိုင်ရင် ဘုရားထံမှာ ခွန်အားတောင်းပါ။ မာရ်နတ်ကို အောင်သောသူများဖြစ်ကြပါစေ။